Joshua 18:1-28
18 Mpoonya mbungano yoonse yabana Israyeli yakabungana ku Silo+ alimwi ooko bakaimika tente lyakuswaanganina,+ nkaambo lino bakaliizundide nyika iyakali kubusyu bwabo.+
2 Pele kwakacili misyobo yabana Israyeli iili ciloba iyatakalinapegwa lukono.
3 Aboobo Joshua wakati kubana Israyeli: “Ino mulaleka lili kusumpya buzuba bwakuunka kuyoobweza nyika eeyo Jehova Leza wabamauso njaakamupa?+
4 Amusale baalumi botatwe kuzwa kumusyobo umwi aumwi kuti ndibatume; baunke kuyakwiilanga-langa nyika akwiilemba kweelana alukono lwabo. Baakumana bakaboole alimwi kulindime.
5 Beelede kuyaapaula akati kabo muzyaabilo zili ciloba.+ Juda uyoozumanana kuba mucilawo cakwe kumusanza,+ abalo bana ba Josefa bayoozumanana kuba mucilawo cabo kunyika.+
6 Lino nywebo amukailembe nyika muzyaabilo zili ciloba, mwaakumana mukalete cilembelo kulindime, eelyo ndizoomuumina cisolo+ kubusyu bwa Jehova Leza wesu.
7 Pele ba Levi tabajisi caabilo akati kanu,+ nkaambo bupaizi bwa Jehova ndolukono lwabo;+ alimwi Gadi, Rubeni acisela camusyobo wa Manase+ bakabweza kale lukono lwabo kujwe lya Jordano, oolo Musa mubelesi wa Jehova ndwaakabapa.”
8 Baalumi aaba ibakali kuyoolemba nyika bakalibambila kuti baunke, eelyo Joshua wakabalailila kuti: “Amuunke mukailange-lange nyika akwiilemba, mwaakumana mukaboole kulindime, eelyo ndizoomuumina cisolo kubusyu bwa Jehova okuno ku Silo.”+
9 Mpoonya baalumi aaba bakaunka akwiinda moonse munyika akwiilemba mubbuku muzyaabilo zili ciloba kweelana aminzi. Eelyo nobakamana bakaboola kuli Joshua kunkambi ku Silo.
10 Mpoonya Joshua wakabaumina cisolo ku Silo kubusyu bwa Jehova.+ Ooko Joshua wakaapaula nyika kubana Israyeli muzyaabilo zyabo.+
11 Lino musyobo wabana ba Benjamini nguwakasaanguna kupegwa caabilo, eelyo nyika yacaabilo cabo yakali kwiinda akati kaba Juda+ abana Josefa.+
12 Kulubazu lwakunyika, munyinza wabo wakali kutalikila ku Jordano, mpoonya wakali kwiinda kumungenyu wa Jeriko+ kunyika akutanta mulundu kulubazu lwakumbo, wakali kugolela kunkanda ya Beti-aveni.+
13 Munyinza wakaindilila kuya ku Luzi, kunselelo aakumusanza wa Luzi, nkokuti Beteli;+ mpoonya wakali kuselemuka kuya ku Atarotu-adara+ akutanta cilundu cili kumusanza kwa Beti-horoni Wamunselelo.+
14 Wakali kunyona acilundu cilangene a Beti-horoni kumusanza akutozya kulubazu lwakumusanza akutobelezya cilawo ca Benjamini nkocili kumbo mane kuyoosika ku Kiriyati-jearimu;+ eelyo wakali kugolela ku Kiriyati-baala, nkokuti Kiriyati-jearimu imunzi wabana ba Juda.
15 Munyinza wakumusanza wakali kutalikila kumagolelo aa Kiriyati-jearimu akuunka kulubazu lwakumbo mane kuyoosika kukasensa kamaanzi kaku Nefitoa.+
16 Munyinza wakaselemuka kuya kumagolelo aacilundu cilangene a Kkuti lya Mwana wa Hinomu,+ icili mu Kkuti lya Refaimu+ kunyika alimwi akuselemuka kuya ku Kkuti* lya Hinomu, kunselelo aabana Jebusi+ kumusanza, akuzumanana kusika ku Eni-rogeli.+
17 Alimwi munyinza wakali kutozya kulubazu lwakunyika kuyoosika ku Eni-semesi mane ku Geliloti, icilawo cilangene amatantilo aa Adumi,+ kumane wakali kuselemuka kuya kubbwe+ lya Bohani+ mwana wa Rubeni.
18 Mpoonya wakaindilila kuya kunselelo kulubazu lwanyika icilawo icilangene a Araba akuselemuka kuya ku Araba.
19 Alimwi munyinza wakaindilila kuya kunselelo, Beti-hogila+ nkoili kunyika, eelyo munyinza wakali kugolela kunkomwe ya Lwizi lwa Munyo*+ nkoluli kunyika, mulonga wa Jordano nkougolela kumusanza. Ooyu ngowakali munyinza wakumusanza.
20 Jordano ngowakali munyinza wakulubazu lwakujwe. Oolu ndolwakali lukono lwabana Benjamini kweelana amikwasyi yabo aminyinza yabo kuzinguluka cilawo coonse.
21 Alimwi minzi yamusyobo wabana Benjamini kweelana amikwasyi yabo njeeyi: Jeriko, Beti-hogila, Emeki-kozizi,
22 Beti-araba,+ Zemaraimu, Beteli,+
23 Avimu, Para, Ofira,
24 Kefara-amoni, Ofini a Geba+–minzi iili 12 atunzi twayo.
25 Gibeoni,+ Rama, Beeroti,
26 Mizipe, Kefira, Moza,
27 Rekemu, Iripeeli, Tarala,
28 Zela,+ Ha-elefi, munzi wabana Jebusi, nkokuti Jerusalemu,+ Gibea +a Kiriyati–minzi iili 14 atunzi twayo.
Oolu ndolwakali lukono lwabana ba Benjamini kweelana amikwasyi yabo.
