Joshua 2:1-24
2 Mpoonya cakusisikizya Joshua mwana wa Nuni wakatuma baalumi bobilo basikutwela kuzwa ku Sitimu.+ Wakabaambila kuti: “Kamuya mukatwele nyika ya Kanana, kwaambisya munzi wa Jeriko.” Aboobo bakaunka alimwi bakaakusika kuŋanda yamukaintu muvwuule wazina lya Rahabu,+ eelyo bakakkala ooko.
2 Kumane mwami wa Jeriko wakaambilwa kuti: “Kwasika baalumi bana Israyeli masiku kuzootwela nyika.”
3 Amvwe boobo mwami wa Jeriko wakatumya mulomo kuli Rahabu, wakati: “Gwisya baalumi ibaboola kulinduwe, aabo bali muŋanda yako, nkaambo baboolela kutwela nyika yoonse.”
4 Pele mukaintu ooyo wakabweza baalumi bobilo aaba akubasisa. Mpoonya wakati: “Masimpe, baalumi baliboolede kulindime, pele tiindalizyi nkobazwida.
5 Alimwi nikwaba kulubundubundu ciindi mulyango wamunzi niwali afwaafwi kujalwa, baalumi aaba baunka. Tandizyi nkobatozya, nokuba boobo kuti mwabatandila cakufwambaana, mulabeenzya.”
6 (Naakali kwaamba boobo, wakabatolede aciluli akubasisa muzisiko zyabutonje nzyaakayanikide aciluli.)
7 Eelyo baalumi bamwami bakabatandila kutozya kulubazu lwaku Jordano kuzito,+ alimwi mulyango wamunzi wakajalwa mbobakazwida buyo aabo ibakali kubatandila.
8 Lino basikutwela kabatanoona, mukaintu ooyu wakaunka kulimbabo atala aaciluli.
9 Eelyo wakati kulimbabo: “Ndili masimpe kuti Jehova uyoomupa nyika+ alimwi tuliyoowede akaambo kandinywe.+ Bantu boonse bamunyika iino balilibilikide akaambo kandinywe,+
10 nkaambo twakamvwa Jehova mbwaakayuminizya maanzi aamu Lwizi Lusalala kubusyu bwanu nomwakazwa mu Egepita+ alimwi ambomwakabacita bami bobilo babana Amori, Sihoni+ a Ogi,+ aabo mbomwakanyonyoona mutala* lya Jordano.
11 Notwakaamvwa makani aaya lyakatuleka* alimwi kunyina naba omwe wakacili aamputo, nkaambo Jehova Leza wanu ngu Leza wakujulu aansi aano.+
12 Aboobo lino, amundisyomezye cakukonka muzina lya Jehova kuti muyootondezya luyando lutamani kuŋanda yataata mbubonya mbondatondezya luyando lutamani kulindinywe; alimwi mweelede kundipa citondezyo cisyomeka.
13 Mweelede kubafwutula bataata, bamaama abanabokwesu basankwa abasimbi alimwi amikwasyi yabo yoonse, mweelede kuzootufwutula kuzwa kulufwu.”+
14 Mpoonya baalumi aaba bakati kulinguwe: “Tuyakwaaba maumi eesu akaambo kandinywe! Kuti utaambili muntu makani aaya aajatikizya lweendo lwesu, aswebo tuyoosyomeka kulinduwe akutondezya luyando lutamani ciindi Jehova aakutupa nyika iino.”
15 Kuzwa waawo wakabaselusya antambo awindo, nkaambo ŋanda yakwe yakayakidwe kubulambo bwamunzi alimwi wakali kukkala atala aabulambo.+
16 Eelyo wakati kulimbabo: “Kamuya kumalundu mukayube ooko mazuba otatwe, kutegwa aabo bamutandila batamujani. Mpoonya baakupiluka, anywebo mukaunke kulindinywe.”
17 Baalumi aabo bakati kulinguwe: “Kutegwa tutakabi amulandu mumakani aacikonke eeci ncootupa kukonka,+
18 twaakuboola munyika iino ukaange ntambo eeyi iisalala awindo mpowatuselusizya. Weelede kubayobolola bauso, banyoko, banabokwanu aboonse bamuŋanda yabauso akubanjizya muŋanda yako.+
19 Kufwumbwa uyoozwa muŋanda akuunka anze, bulowa bwakwe buyooba alinguwe alimwi swebo tatukabi amulandu wabulowa bwakwe pe. Pele kuti naa umwi wabaabo banooyookkede anduwe muŋanda akajaigwe, mulandu wabulowa bwakwe uyooba alindiswe.
20 Pele kuti ukaayubunune makani aalweendo lwesu,+ tatukabi amulandu uujatikizya cikonke cako eeci ncootupa kukonka.”
21 Mpoonya walo wakaingula kuti: “Akube mbubonya mbomwaamba.”
Kumane wakabaleka, eelyo bakaunka. Kuzwa waawo, wakaanga ntambo iisalala awindo.
22 Aboobo bakaunka kumalundu akukkala ooko mazuba otatwe kusikila nobakapiluka basikubatandila. Alimwi basikubatandila aabo bakabayandaula mumigwagwa yoonse, pele tiibakabajana pe.
23 Baalumi aaba bobilo bakaselemuka kuzwa kumalundu, bazabuka mulonga akuboola kuli Joshua mwana wa Nuni. Eelyo bakamulwiida zintu zyoonse zyakabacitikila.
24 Mpoonya bakaambila Joshua kuti: “Jehova wayaaba nyika yoonse mumaanza eesu.+ Alimwi bantu boonse bakkala mumo balilibilikide akaambo kandiswe.”+
