Joshua 20:1-9
-
Minzi yamayubilo (1-9)
20 Mpoonya Jehova wakaambila Joshua kuti:
2 “Koambila bana Israyeli kuti, ‘Amulisalile minzi yamayubilo+ njindakamwaambila kwiinda muli Musa,
3 ooko muntu wajaya muntunyina cakutazyiba nkwakonzya kutijila. Alimwi yeelede kumubeda mayubilo kuzwa kuli sikupilusya mulandu wabulowa.+
4 Weelede kutijila kuli umwi waminzi+ eeyi akuyakwiima amulyango wamunzi+ akwaambila bapati bamunzi ooyo mulandu wakwe. Mpoonya bayoomutambula mumunzi akumupa busena kuti akkale ambabo.
5 Alimwi ikuti naa sikupilusya mulandu wabulowa wamutobela, tabeelede kwaaba sikujaya muntu kulinguwe, nkaambo wakamujaya mweenzinyina cakutazyiba alimwi tanaakalimusulide pe.+
6 Weelede kukkala mumunzi ooyo kusikila akaime kumbele lyambungano+ mulubeta, alimwi weelede kuzumanana ooko kusikila mupaizi mupati+ wakuciindi eeco akafwe. Mpoonya sikujaya muntu ooyo ulakonzya kupiluka akunjila mumunzi wakwe amuŋanda yakwe,+ kumunzi ooko nkwaakazwa naakatija.’”
7 Aboobo bakasala Kedesi+ munzi uuli mu Galilaya mumalundu aa Nafutali, Sekemu+ mumalundu aa Efraimu a Kiriyati-ariba,+ nkokuti Hebroni, mumalundu aa Juda.
8 Mucilawo ca Jordano, kujwe lya Jeriko, bakasala Bezeri+ munkanda anyika iiyalene kuzwa mumusyobo wa Rubeni, Ramoti+ mu Gileadi kuzwa mumusyobo wa Gadi, a Golani+ mu Basani kuzwa mumusyobo wa Manase.+
9 Eeyi njeminzi yakasalilwa bana Israyeli boonse abeenzu bakkala akati kabo, ooko muntu wajaya muntunyina cakutazyiba nkwakonzya kutijila+ kutegwa atajaigwi asikupilusya mulandu wabulowa katanabetekwa kumbele lyambungano.+
