Joshua 22:1-34
22 Mpoonya Joshua wakaita bana Rubeni, bana Gadi acisela camusyobo wa Manase
2 akubaambila kuti: “Nywebo mwacita zyoonse Musa mubelesi wa Jehova nzyaakamulailila,+ alimwi mwaswiilila majwi aangu oonse ngondakamulailila.+
3 Tiimwabasiya banabokwanu ciindi coonse eeci kusikila sunu;+ alimwi mwabamba mulawo wa Jehova Leza wanu.+
4 Lino Jehova Leza wanu wabapa kulyookezya banabokwanu mbubonya mbwaakabasyomezya.+ Aboobo kamupiluka kumatente aanu kunyika yalukono lwanu eeyo Musa mubelesi wa Jehova njaakamupa mutala* lya Jordano.+
5 Pele mweelede kulomya kutobela malailile a Mulawo Musa mubelesi wa Jehova ngwaakamupa,+ kwiinda mukuyanda Jehova Leza wanu,+ kweenda munzila zyakwe zyoonse,+ kutobela milawo yakwe,+ kukakatila kulinguwe+ akumubelekela+ amoyo wanu woonse abuumi bwanu boonse.”+
6 Kumane Joshua wakabalongezya akubaleka kuti baunke, eelyo bakaunka kumatente aabo.
7 Lino bacisela camusyobo wa Manase, Musa wakabapa lukono mu Basani,+ eelyo bacisela cimbi Joshua wakabapa nyika kumbo lya Jordano+ antoomwe abanabokwabo. Alimwi Joshua wakabalongezya naakabaleka kuti baunke kumatente aabo
8 alimwi wakati kulimbabo: “Kamupiluka kumatente aanu alubono lunji, banyama bavwubwa banji kapati, nsiliva, ngolida, mukuba, butale alimwi azisani zinji kapati.+ Amubweze zisaalo+ zyabasinkondonyoko akwaabana abanabokwanu.”
9 Kuzwa waawo bana Rubeni, bana Gadi acisela camusyobo wa Manase bakazwa kubana Israyeli bambi ku Silo, munzi uuli munyika ya Kanana, akupiluka kunyika ya Gileadi,+ inyika yalukono lwabo eeyo Musa+ njaakabapa kuti bakkale kwiinda mukulaililwa a Jehova.
10 Lino bana Rubeni, bana Gadi alimwi acisela camusyobo wa Manase nobakasika mucilawo ca Jordano icakali munyika ya Kanana, bakayaka cipaililo ooko mumbali lya Jordano, icipaililo cipati alimwi ceebeka.
11 Mpoonya bana Israyeli bambi bakaambilwa+ kuti: “Amubone! Bana Rubeni, bana Gadi acisela camusyobo wa Manase bayaka cipaililo mumunyinza wanyika ya Kanana mucilawo ca Jordano cakumbo kulubazu lwabana Israyeli.”
12 Bana Israyeli nobakamvwa boobo, mbungano yoonse yabana Israyeli yakabungana antoomwe ku Silo+ kuti baunke kuyoobalwana.
13 Mpoonya bana Israyeli bakatuma Finehasi+ mwana wa Eleazara mupaizi kubana Rubeni, bana Gadi acisela camusyobo wa Manase kunyika ya Gileadi,
14 bakamutuma abasilutwe bali kkumi, silutwe omwe waciinga cimwi acimwi kuzwa kumisyobo yoonse yabana Israyeli, alimwi umwi aumwi wakali silutwe waciinga cakwe akati kazyuulu* zyabana Israyeli.+
15 Nobakasika kubana Rubeni, bana Gadi acisela camusyobo wa Manase munyika ya Gileadi, bakabaambila kuti:
16 “Mboobu mbungano yoonse ya Jehova mboyaamba: ‘Ino nkaambo nzi ncomwacitila boobu cakutasyomeka+ kuli Leza wa Israyeli? Sunu mwaleka kutobela Jehova kwiinda mukuliyakila cipaililo kutegwa mumuzangile Jehova.+
17 Sena catuceela cibi ncotwakacita ku Peori? Tatuna kulisalazya kulincico kusikila sunu, nokuba kuti mbungano ya Jehova yakasikilwa cipenzyo.+
18 Alimwi nywebo sunu mwaleka kutobela Jehova! Ikuti nywebo sunu mwazangila Jehova, juunza bukali bwakwe buyoobukila mbungano yoonse yabana Israyeli.+
19 Ikuti naa nkaambo kakuti nyika yalukono lwanu ilisofweede, amuzabuke muunke kunyika yalukono lwa Jehova+ ooko tente lyakukombela lya Jehova nkolibede,+ akukkala akati kesu, pele mutamuzangili Jehova, alimwi mutatupi kumuzangila akaambo kakuti mwaliyakila cipaililo cimbi kunze lyacipaililo ca Jehova Leza wesu.+
20 Ciindi Akani+ mwana wa Zera naakabisya kujatikizya zintu zyakeelede kunyonyoonwa, sena bukali bwa Leza tiibwakasikila mbungano yoonse yabana Israyeli?+ Alimwi tali nguwe alikke wakafwa akaambo kacibi cakwe.’”+
21 Mpoonya bana Rubeni, bana Gadi acisela camusyobo wa Manase bakavwiila basilutwe bazyuulu* zyabana Israyeli+ kuti:
22 “Leza wabaleza, Jehova!* Leza wabaleza, Jehova!+ Ulizyi alimwi abalo bana Israyeli bayoozyiba. Ikuti naa twazangila Jehova akucita cakutasyomeka kulinguwe, Leza atatweengeleli pe buzuba obuno.
23 Ikuti naa twakaliyakila cipaililo kutegwa tuleke kutobela Jehova, akutuula zituuzyo zyuumpwa, zituuzyo zyamaila alimwi azipaizyo zyalumvwano alincico, Jehova atusubule.+
24 Pele swebo twakacita oobo akaambo kakulibilika, nkaambo twakati, ‘Kumbele aamazuba bana banu bayakwaambila bana besu kuti: “Ino mujisi makani nzi a Jehova Leza wa Israyeli?
25 Jehova wakabikka Jordano kuba munyinza akati kesu andinywe, nobana Rubeni abana Gadi. Tamujisi caabilo muli Jehova pe.” Eelyo bana banu bayoopa kuti bana besu baleke kukomba* Jehova.’
26 “Aboobo twakati, ‘Atuliyakile cipaililo, ikutali cazituuzyo zyuumpwa naa zipaizyo,
27 pele kuti cibe kamboni akati kesu andinywe+ alimwi amazyalani eesu aaboola, kuti tuyoobelekela Jehova azituuzyo zyesu zyuumpwa, zipaizyo zyalumvwano azipaizyo zimbi,+ kutegwa kumbele aamazuba bana banu batakaambili bana besu kuti: “Tamujisi caabilo muli Jehova pe.”’
28 Aboobo twakati, ‘Ikuti naa kumbele aamazuba bakaambe boobo kulindiswe akubana besu, andiswe tuyakwaamba kuti: “Amubone cikozyanyo cacipaililo ca Jehova ncobakayaka bamatata, kutali cazituuzyo zyuumpwa naa zipaizyo, pele kuti cibe kamboni akati kesu andinywe.”’
29 Tatukonzyi kuzangila Jehova acaali akuleka kutobela Jehova,+ kwiinda mukuyaka cipaililo cazituuzyo zyuumpwa, zituuzyo zyamaila azipaizyo, kunze lyacipaililo ca Jehova Leza wesu icili kumbele lyatente lyakukombela!”+
30 Lino Finehasi mupaizi, basilutwe bambungano alimwi abasilutwe bazyuulu* zyabana Israyeli mbaakali limwi nobakamvwa majwi ngobakaamba bana ba Rubeni, bana ba Gadi abana ba Manase, bakakkutila+ amakani aaya.
31 Aboobo Finehasi mwana wa Eleazara mupaizi wakaambila bana ba Rubeni, bana ba Gadi abana ba Manase kuti: “Sunu twazyiba kuti Jehova mpali akati kesu, nkaambo tiimwacita cakutasyomeka cili boobu kuli Jehova. Lino mwavwuna bana Israyeli kujanza lya Jehova.”
32 Kumane Finehasi mwana wa Eleazara mupaizi abasilutwe bakapiluka kuzwa kubana Rubeni abana Gadi kunyika ya Gileadi akuunka kunyika ya Kanana kubana Israyeli bambi akuyoobalwiida makani.
33 Lino bana Israyeli bakakkutila amakani aaya. Mpoonya bakatembaula Leza alimwi tiibakacili kwaamba makani aakuunka kuyoobalwana kuti banyonyoone nyika oomo bana Rubeni abana Gadi mobakakkede.
34 Aboobo bana Rubeni abana Gadi bakacuulika zina cipaililo,* nkaambo bakati “ngukamboni akati kesu kuti Jehova ngu Leza mwini-mwini.”
Bupanduluzi buyungizyidwe
^ Nkokuti, kulubazu lwakujwe.
^ Naa “kamikowa.”
^ Naa “bamikowa.”
^ Naa “Leza, Jehova.”
^ Mu Chihebrayo, “kuyoowa.”
^ Naa “bamikowa.”
^ Kuboneka kuti cipaililo eeci cakaulikwa kuti Kamboni.
