Joshua 3:1-17
-
Bana Israyeli bazabuka Jordano (1-17)
3 Mpoonya Joshua abana Israyeli boonse bakafwuma akunyamuka kuzwa ku Sitimu+ akuboola ku Jordano. Bakoona ooko kabatanazabuka.
2 Nokwakainda mazuba otatwe, basilutwe+ bakainda munkambi yoonse
3 akulailila bantu kuti: “Kufwumbwa mwalibona bbokesi lyacizuminano ca Jehova Leza wanu abapaizi ba Levi kabalinyamwide,+ mweelede kunyamuka kuzwa waawo mpomukkede akulitobela.
4 Pele mweelede kweendela kulaale andilyo, tukokola tusika ku 2,000 ;* mutasweni afwaafwi andilyo pe, kutegwa mutondezyegwe nzila njomweelede kwiinda, nkaambo nzila eeyo tamunayiindide pe.”
5 Lino Joshua wakaambila bantu kuti: “Amulisalazye,+ nkaambo juunza Jehova uyoocita zintu zigambya akati kanu.”+
6 Mpoonya Joshua wakaambila bapaizi kuti: “Amubweze bbokesi+ lyacizuminano mweendele kumbele lyabantu.” Aboobo bakalibweza bbokesi lyacizuminano akwiinda kumbele lyabantu.
7 Eelyo Jehova wakaambila Joshua kuti: “Sunu ndilatalika kukupa kuti ulemekwe mumeso aabana Israyeli,+ kutegwa bazyibe kuti ndinooli anduwe+ mbubonya mbondakali a Musa.+
8 Weelede kulailila bapaizi banyamwide bbokesi lyacizuminano kuti: ‘Mwaakusika buyo mpaatalikila maanzi aamu Jordano,+ amukaime nji mpoonya aawo.’”
9 Mpoonya Joshua wakati kubana Israyeli: “Amuboole muswiilile majwi aa Jehova Leza wanu.”
10 Kumane Joshua wakati: “Kuliceeci mulazyiba kuti Leza muumi uli akati kanu,+ akuti masimpe uyootanda bana Kanana, bana Heti, bana Hivi, bana Perizi, bana Girigasi, bana Amori abana Jebusi kuzwa kubusyu bwanu.+
11 Amubone! Bbokesi lyacizuminano lya Mwami wanyika yoonse lilainda kumbele lyanu kunjila mu Jordano.
12 Lino amusale baalumi bali 12 kuzwa kumisyobo ya Israyeli, omwe kuzwa kumusyobo umwi aumwi,+
13 kufwumbwa buyo zituta zyabapaizi banyamwide Bbokesi lya Jehova, Mwami wanyika yoonse, zyaakulyata buyo maanzi aa Jordano, maanzi aa Jordano ayakwiima, eelyo kulubazu nkwaazwida ayakwiima mbuli bwaanda.”+
14 Aboobo bantu nobakanyamuka kuzwa waawo mpobakakkede kabalaafwaafwi kuzabuka Jordano, bapaizi bakanyamwide bbokesi+ lyacizuminano bakainda kumbele lyabantu.
15 Lino bapaizi ibakanyamwide Bbokesi nobakasika buyo ku Jordano azituta zyabo mbozyakaalyatila buyo maanzi (lino mulonga wa Jordano ulapaya mutala amutala+ mazuba oonse aakutebula),
16 mpoonya maanzi aali kulubazu nkuuzwida mulonga akaima. Akaima mbuli bwaanda kulaale kusikila ku Adamu, munzi uuli kumbali a Zaretani, eelyo aayo aakali kukunkila ku Lwizi lwa Araba, Lwizi lwa Munyo* akamana. Akaandaana, eelyo bantu bakazabuka kumbele lya Jeriko.
17 Lino bapaizi ibakanyamwide bbokesi lyacizuminano ca Jehova nobakaimvwi nji anyika njumu+ mu Jordano, bana Israyeli boonse bakazabuka anyika njumu+ kusikila bantu boonse bamaninina kuzabuka Jordano.
Bupanduluzi buyungizyidwe
^ Mamita aatandila ku 890. Amubone Makani Aayungizyidwe B14.
^ Nkokuti, Lwizi Lutajisi Buumi.
