Joshua 4:1-24
-
Mabwe aaciibalusyo (1-24)
4 Lino bantu boonse nobakamana kuzabuka Jordano, Jehova wakaambila Joshua kuti:
2 “Kosala baalumi bali 12 akati kabantu, omwe kuzwa kumusyobo umwi aumwi,+
3 alimwi ubalailile kuti, ‘Amubweze mabwe aali 12 kuzwa akati ka Jordano, aawo aaimvwi zituta zyabapaizi,+ mwaatolelezye akuyakwaabikka abusena aawo mpomuyoolala sunu.’”+
4 Aboobo Joshua wakaita baalumi bali 12 mbaakasalide akati kabana Israyeli, mwaalumi omwe kuzwa kumusyobo umwi aumwi,
5 eelyo Joshua wakati kulimbabo: “Amwiinde kumbele lya Bbokesi lya Jehova Leza wanu akati ka Jordano, umwi aumwi wanu abweze bbwe lyomwe agwezyo lyakwe, kweelana amweelwe wamisyobo yabana Israyeli,
6 kutegwa abe citondezyo akati kanu. Ikuti naa kumbele bana banu bakamubuzye kuti, ‘Ino mabwe aaya aamba nzi?’+
7 mweelede kuyoobaambila kuti: ‘Nkaambo maanzi aa Jordano akaima kumbele lyabbokesi+ lyacizuminano ca Jehova. Nolyakainda mu Jordano maanzi akaima. Mabwe aaya ayooba ciibalusyo* kubana Israyeli lyoonse.’”+
8 Aboobo bana Israyeli bakacita mbubonya Joshua mbwaakabalailila. Bakabweza mabwe aali 12 akati ka Jordano, kweelana amweelwe wamisyobo yabana Israyeli, mbubonya Jehova mbwaakalailila Joshua. Bakaatolelezya akuyakwaabikka abusena aawo mpobakaakulala.
9 Awalo Joshua wakaimika mabwe aambi aali 12 akati ka Jordano abusena aawo aakaimvwi zituta zyabapaizi bakanyamwide bbokesi lyacizuminano,+ alimwi mpaacili abusena aawo kusikila sunu.
10 Bapaizi ibakanyamwide Bbokesi bakaliimvwi akati ka Jordano kusikila bantu nibakacita zintu zyoonse Jehova nzyaakalailila Joshua kuti abaambile kuti bacite, kweelana azintu zyoonse Musa nzyaakalailila Joshua. Eelyo bantu bakazabuka cakufwambaana.
11 Lino bantu boonse nobakamana kuzabuka, bapaizi bakazabuka a Bbokesi lya Jehova kubusyu bwabantu.+
12 Bana Rubeni abana Gadi acisela camusyobo wa Manase bakazabuka mbuli nkamu yabasikalumamba+ kumbele lyabana Israyeli bambi, mbubonya Musa mbwaakabalailila.+
13 Basikalumamba basika ku 40,000 bakazabuka kubusyu bwa Jehova kabalibambilide kulwana nkondo, bakaunka kuzibanda zya Jeriko.
14 Mubuzuba oobo Jehova wakasumpula Joshua mumeso aabana Israyeli boonse,+ eelyo bakamulemeka* kapati mubuumi bwakwe boonse mbubonya mbobakali kumulemeka Musa.+
15 Mpoonya Jehova wakaambila Joshua kuti:
16 “Kobalailila bapaizi banyamwide bbokesi+ lya Bumboni kuti bazwe mu Jordano.”
17 Aboobo Joshua wakalailila bapaizi kuti: “Amuzwe mu Jordano.”
18 Lino bapaizi ibakanyamwide bbokesi+ lyacizuminano ca Jehova nobakazwa akati ka Jordano alimwi azituta zyabo nozyakalyata ankomwe, mpoonya aawo maanzi aa Jordano akapilukila akupaya+ mbuli mbwaakabede.
19 Eelyo bantu bakazwa mu Jordano mubuzuba bwa 10 bwamwezi wakusaanguna alimwi bakaakukkala ku Giligala,+ kumunyinza wa Jeriko uuli kujwe.
20 Mabwe aali 12 ngobakabweza mu Jordano, Joshua wakaaimika ku Giligala.+
21 Kumane wakaambila bana Israyeli kuti: “Kumbele bana banu baakumubuzya kuti, ‘Ino mabwe aaya aamba nzi?’+
22 mweelede kubapandulwida kuti, ‘Bana Israyeli bakazabuka mulonga wa Jordano anyika njumu,+
23 eelyo Jehova Leza wanu naakayuminizya maanzi aa Jordano kubusyu bwabo kusikila boonse bazabuka, mbubonya Jehova Leza wanu mbwaakacita ku Lwizi Lusalala naakayuminizya maanzi kubusyu bwesu kusikila toonse twazabuka.+
24 Wakacita oobo kutegwa bantu boonse bamunyika bazyibe kuti janza lya Jehova lilaanguzu+ alimwi kutegwa lyoonse kamumuyoowa Jehova Leza wanu.’”
