Joshua 5:1-15
5 Lino bami boonse babana Amori+ ibakali kumbo* aa Jordano abami boonse babana Kanana+ ibakali mumbali aalwizi nobakamvwa kuti Jehova wakayuminizya maanzi aa Jordano kubusyu bwabana Israyeli kusikila boonse bazabuka, lyakabaleka*+ alimwi kunyina nobakacili aamputo akaambo kabana Israyeli.+
2 Aciindi eeco Jehova wakaambila Joshua kuti: “Kobamba mabwe aabosya upalule+ baalumi bana Israyeli ciindi cabili.”
3 Aboobo Joshua wakabamba mabwe aabosya akubapalula baalumi bana Israyeli ku Gibeati-haaraloti.*+
4 Nkaaka kaambo kakapa kuti Joshua abapalule: Baalumi boonse ibakazwa mu Egepita, basikalumamba boonse, bakafwa munkanda mulweendo lwabo kuzwa ku Egepita.+
5 Bantu boonse ibakazwa mu Egepita bakalipalwidwe, pele boonse bakazyalilwa munkanda mulweendo lwakuzwa ku Egepita tiibakalinapalulwa pe.
6 Bana Israyeli bakeenda myaka iili 40 + munkanda, kusikila ciindi baalumi bankondo ibakazwa mu Egepita ibatakaswiilila jwi lya Jehova+ nobakamana kufwa. Jehova wakakonkezya kulimbabo kuti tabakaiboni nyika+ eeyo Jehova njaakasyomezya kuli bamausyi kuti uyootupa,+ inyika iikunka buci amukupa.+
7 Aboobo wakabusya bana babo mubusena bwabo.+ Aaba mbambabo batakapalwidwe Joshua mbaakapalula, nkaambo tiibakapalulwa mulweendo.
8 Lino nobakamana kubapalula boonse, bakazumanana kukkala munkambi kusikila nobakapona.
9 Mpoonya Jehova wakaambila Joshua kuti: “Sunu ndamugwisizya masampu aaku Egepita.” Aboobo busena oobo bwakaulikwa kuti Giligala*+ kusikila sunu.
10 Bana Israyeli bakazumanana kukkala ku Giligala, alimwi bakacita Pobwe Lyakwiindilila kumangolezya mubuzuba bwa 14 bwamwezi+ muzibanda zya Jeriko.
11 Nolyakamana Pobwe Lyakwiindilila, buzuba bwakatobela bakatalika kulya zyakulya zyamunyika eeyo, zinkwa zitajisi bumena+ amaila aayokedwe.
12 Mpoonya buzuba bwakatobela nobakalya zyakulya zyamunyika eeyo, mana akaleka kuboneka , eelyo kunyina naakalibonya limbi kubana Israyeli,+ pele mumwaka ooyo bakatalika kulya zyakulya zyamunyika ya Kanana.+
13 Lino Joshua kali kufwaafwi a Jeriko wakatambya meso aakwe eelyo wakabona mwaalumi+ wiimvwi kumbele lyakwe kajisi panga lisomwedwe.+ Mpoonya Joshua wakeenda kuya kulinguwe akumubuzya kuti: “Sena uli kulubazu lwesu naa kulubazu lwabasinkondoma?”
14 Walo wakati: “Peepe, mebo ndaboola mbuli silutwe wampi ya Jehova.”+ Amvwe boobo Joshua wakavwuntama ansi akumwaambila kuti: “O mwami wangu, ino makani nzi ngoyanda kundaambila ndemubelesi wako?”
15 Kumane silutwe wampi ya Jehova wakaambila Joshua kuti: “Samununa mpato kumaulu aako, nkaambo busena aawo mpoimvwi bulasalala.” Mpoonya aawo Joshua wakacita oobo.+
Bupanduluzi buyungizyidwe
^ Mu Chihebrayo, “kulubazu lwakulwizi.”
^ Mu Chihebrayo, “myoyo yabo yakayaaya.”
^ Nkokwaamba kuti “Mulundu wa Ndomo.”
^ Nkokwaamba kuti “Kukunkulisya.”
