Joshua 6:1-27
6 Lino munzi wa Jeriko wakajalwa cakulomya akaambo kabana Israyeli; kunyina wakali kuzwa nokuba kunjila.+
2 Eelyo Jehova wakaambila Joshua kuti: “Bona, ndawaaba munzi wa Jeriko amwami wanguwo alimwi abasikalumamba banguwo basinguzu mumaanza aako.+
3 Lino nyoonse nobaalumi basikalumamba mweelede kunoozinguluka munzi ciindi comwe abuzuba. Mweelede kucita oobo mazuba aali cisambomwe.
4 Bapaizi bali ciloba beelede kubweza umwi aumwi mweembo walwija lwambelele akweendela kumbele lya Bbokesi. Pele mubuzuba bwaciloba, mweelede kuzinguluka munzi ziindi zili ciloba alimwi bapaizi beelede kulizya myeembo.+
5 Lino baakulizya myeembo yameja aambelele—alimwi mwaakukumvwa kulila kwamyeembo,—basikalumamba boonse beelede koongolola loongololo lwankondo. Eelyo bulambo bwamunzi buyoowa cakumaninina,+ mpoonya basikalumamba beelede kunjila mukati kawo.”
6 Aboobo Joshua mwana wa Nuni wakaita bapaizi antoomwe akubaambila kuti: “Amubweze bbokesi lyacizuminano, eelyo bapaizi bali ciloba beelede kubweza myeembo yameja aambelele iili ciloba akweendela kumbele lya Bbokesi lya Jehova.”+
7 Mpoonya wakaambila basikalumamba kuti: “Kamuya muzinguluke munzi, alimwi basikalumamba bajisi zilwanyo+ beelede kwiinda kumbele lya Bbokesi lya Jehova.”
8 Aboobo cakacitika mbubonya Joshua mbwaakabaambila, bapaizi bali ciloba ibakajisi myeembo yameja aambelele iili ciloba kubusyu bwa Jehova bakainda kumbele akulizya myeembo, eelyo bbokesi lyacizuminano ca Jehova lyakali kubatobela.
9 Lino basikalumamba ibakajisi zilwanyo bakainda kumbele lyabapaizi ibakali kulizya myeembo, eelyo nkamu imwi yabasikalumamba yakali kweendela musyule lya Bbokesi kumwi myeembo kailila.
10 Lino Joshua wakaambilide basikalumamba kuti: “Tamweelede koongolola naa kuyoba pe. Taakwe jwi lyeelede kumvwigwa kumilomo yanu kusikila buzuba nondiyoomwaambila kuti, ‘Amoongolole!’ Mpoonya aawo mukoongolole.”
11 Aboobo wakacita kuti Bbokesi lya Jehova lizinguluke munzi ciindi comwe, nobakamana bakapiluka kunkambi akoona nkukonya ooko.
12 Kumane buzuba bwakatobela Joshua wakafwuma kakucili kooko, alimwi bapaizi bakabweza Bbokesi+ lya Jehova,
13 eelyo bapaizi bali ciloba ibakajisi myeembo yameja aambelele bakali kweendela kumbele lya Bbokesi lya Jehova kabayaabulizya myeembo cakutaleka. Basikalumamba ibakajisi zilwanyo bakali kweendela kumbele lyabo, kakuli musyule kwakali basikalumamba bakali kutobela Bbokesi lya Jehova kumwi myeembo kailila.
14 Alimwi mubuzuba bwabili bakauzinguluka munzi ciindi comwe, kumane bakapiluka kunkambi. Oobu mbobakali kucita kwamazuba aali cisambomwe.+
15 Lino mubuzuba bwaciloba bakafwuma kakucili kooko, alimwi bakeenda kuzinguluka munzi mbubonya oobo ziindi zili ciloba. Buzuba oobu bulikke munzi bakauzinguluka ziindi zili ciloba.+
16 Kumane mulweendo lwaciloba bapaizi bakalizya myeembo, eelyo Joshua wakati kuli basikalumamba: “Amoongolole,+ nkaambo Jehova wamupa munzi ooyu!
17 Munzi weelede kunyonyoonwa azintu zyoonse zili mumo;+ zyoonse nzizya Jehova. Pele buyo Rahabu+ muvwuule abantu boonse mbali abo muŋanda mbobatiifwutuke, nkaambo wakasisa basikutwela mbotwakatumide.+
18 Pele nywebo amulikasye kuzintu izyaabwa kuti zinyonyoonwe,+ kutegwa mutataliki kunyomenena akubweza zintu zimwi zyeelede kunyonyoonwa+ akupa kuti nkambi yabana Israyeli yeelele kunyonyoonwa akuba amapenzi.+
19 Pele nsiliva yoonse angolida yoonse azintu zyoonse zyamukuba abutale nzizya Jehova.+ Zyeelede kubikkwa muciyobwedo ca Jehova.”+
20 Mpoonya bapaizi nobakalizya myeembo basikalumamba bakoongolola.+ Mbobakakumvwida buyo kulila kwamyeembo basikalumamba bakatalika koongolola loongololo lwankondo, mpoonya bulambo bwamunzi bwakawa cakumaninina.+ Kumane bakanjila mumunzi akuusaala.
21 Bakazinyonyoona apanga zintu zyoonse zyakali mumunzi: baalumi, bamakaintu, basankwa, bamadaala, ŋombe, mbelele ambongolo.+
22 Kumane Joshua wakaambila baalumi bobilo bakatwela nyika kuti: “Amunjile muŋanda yamukaintu uulya muvwuule, mumugwisye antoomwe abamukwasyi wakwe boonse, mbubonya mbomwakakonka kulinguwe.”+
23 Aboobo baalumi ibakatwela nyika bakanjila akumugwisya Rahabu antoomwe abausyi, banyina, banabokwabo abanamukwasyi; inzya, bakabagwisya boonse bamukwasyi wakwe,+ kumane bakabatola anze aankambi yabana Israyeli.
24 Mpoonya bakawuumpa munzi azintu zyoonse zyakali mumo. Pele nsiliva angolida azintu zyamukuba azyabutale, bakazitola kuciyobwedo cazintu ziyandisi muŋanda ya Jehova.+
25 Lino Joshua wakafwutula buyo Rahabu muvwuule abamuŋanda yabausyi aboonse bamukwasyi wakwe;+ alimwi ukkala akati kabana Israyeli kusikila sunu,+ nkaambo wakasisa basikutwela aabo Joshua mbaakatumide kutwela munzi wa Jeriko.+
26 Aciindi eeco Joshua wakakonka kuti:* “Asinganizyigwe muntu uuli woonse uutitalike kuyakulula munzi ooyu wa Jeriko. Abikka buyo ntalisyo yanguwo, mwanaakwe mutaanzi weelede kufwa, alimwi abikka zijazyo zyanguwo, mwanaakwe muniini weelede kufwa.”+
27 Aboobo Jehova wakali aa Joshua+ alimwi mpuwo yakwe yakamwaika munyika yoonse.+
Bupanduluzi buyungizyidwe
^ Naa ambweni, “wakapa kuti bantu bakonke cikonke eeci cakuti.”
