Joshua 7:1-26
7 Pele bana Israyeli bakacita cakutasyomeka kujatikizya zintu zyakeelede kunyonyoonwa, mukuti Akani+ imwana wa Karimi mwana wa Zabidi mwana wa Zera, iwamusyobo wa Juda, wakabweza zintu zimwi zyakeelede kunyonyoonwa.+ Eelyo bukali bwa Jehova bwakababukila bana Israyeli.+
2 Mpoonya Joshua wakatuma baalumi kuzwa ku Jeriko kuya ku Ai,+ uuli kufwaafwi a Beti-aveni kujwe lya Beteli+ akubaambila kuti: “Kamuya mukaitwele nyika.” Aboobo baalumi aaba bakaunka kuyootwela munzi wa Ai.
3 Nobakapiluka kuli Joshua, bakamwaambila kuti: “Kutaunki basikalumamba boonse pe. Basikalumamba bali buyo 2,000 naa 3,000 balakonzya kuuzunda munzi wa Ai. Utakatazyi basikalumamba boonse kuti baunke, nkaambo bantu abaya mbasyoonto.”
4 Aboobo baalumi basika ku 3,000 bakaunka, pele bakaakutija kubaalumi bana Ai.+
5 Baalumi bana Ai bakajaya baalumi bana Israyeli bali 36 alimwi bakabatandaanya kuzwa kunze aamulyango wamunzi mane kuyoosikila ku Sebarimu, bakazumanana kubajaya mumungenyu. Aboobo bana Israyeli bakayoowa alimwi lyakabaleka.
6 Amvwe boobo Joshua, wakazapula zisani zyakwe akuvwuntama ansi kumbele lya Bbokesi lya Jehova kusikila kumangolezya, walo abaalu ba Israyeli alimwi bakalibikka mavwu amitwe yabo.
7 Mpoonya Joshua wakati: “O Mwami Singuzuzyoonse Jehova, ino nkaambo nzi ncookeenzya bantu aaba musinzo woonse ooyu akuzoobazabusya Jordano, kuti tuzikwaabwe mumaanza aabana Amori kuti batunyonyoone? Nicakabota nitwakazumanana kukkala mutala* lya Jordano!
8 Amundijatile O Jehova, ino ndaambe nzi kakuli bana Israyeli batija kuli basinkondonyina?
9 Bana Kanana abantu boonse bakkede munyika baakwaamvwa makani aaya, bayootuzinguluka akuzimaanya zina lyesu anyika, ino uyoocita buti kujatikizya zina lyako lilemekwa?”+
10 Mpoonya Jehova wakaingula Joshua kuti: “Konyamuka! Ino uvwuntamina nzi?
11 Bana Israyeli babisya. Basotoka cizuminano+ cangu ncondakabalailila kuti babambe. Bakabweza zintu zimwi zyeelede kunyonyoonwa,+ bakazibba+ akuzisisa akati kazintu zyabo.+
12 Aboobo bana Israyeli tabakacikonzyi kuzunda basinkondonyina pe. Bayootija kuli basinkondonyina nkaambo baba cintu ceelede kunyonyoonwa. Nsikabi limbi andinywe pe, ccita kuti mucinyonyoone cintu ceelede kunyonyoonwa icili akati kanu.+
13 Konyamuka ubasalazye bantu!+ Kobaambila kuti, ‘Mukalisalazye juunza, nkaambo mboobu mbwaamba Jehova Leza wa Israyeli: “Nobana Israyeli, kuli cintu ceelede kunyonyoonwa akati kanu. Tamukacikonzyi kubazunda basinkondonyoko kusikila mane mukacigwisye cintu ceelede kunyonyoonwa icili akati kanu.
14 Alimwi mafwumofwumo mweelede kuboola, musyobo amusyobo, eelyo musyobo ooyo Jehova ngwayoojata+ uyooboola afwaafwi, mukwasyi amukwasyi, eelyo mukwasyi ooyo Jehova ngwayoojata uyooboola afwaafwi, ŋanda aŋanda, eelyo ŋanda eeyo Jehova njayoojata iyooboola afwaafwi, muntu umwi aumwi.
15 Ooyo uyoojatwa acintu ceelede kunyonyoonwa uyakuumpwa mumulilo,+ walo azintu zyoonse nzyajisi, nkaambo wasotoka cizuminano+ ca Jehova alimwi akaambo kakuti wacita cintu cabufwubafwuba mu Israyeli.”’”
16 Aboobo buzuba bwakatobela Joshua wakafwuma kakucili kooko akwiita bana Israyeli afwaafwi, musyobo amusyobo, eelyo musyobo wa Juda wakajatwa.
17 Wakaita mikwasyi ya Juda afwaafwi akujata mukwasyi wabana Zera,+ kuzwa waawo wakaita mukwasyi wabana Zera afwaafwi, muntu amuntu, eelyo Zabidi wakajatwa.
18 Kumane mukwasyi wa Zabidi wakaitwa afwaafwi, muntu amuntu, eelyo Akani imwana wa Karimi mwana wa Zabidi imwana wa Zera, iwamusyobo wa Juda wakajatwa.+
19 Mpoonya Joshua wakati kuli Akani: “Mwanaangu, komupa bulemu Jehova Leza wa Israyeli akulyaambilila cibi cako kulinguwe. Kondaambila, ino ncinzi ncoocita? Utandisisi pe.”
20 Eelyo Akani wakavwiila Joshua kuti: “Masimpe, ndime ndakabisizya Jehova Leza wa Israyeli, mboobu mbondakacita.
21 Nindakabona cisani cibotu alimwi ceebeka caku Sinara+ akati kazisaalo, amasyekeli* aansiliva aali 200 angolida iilema masyekeli aali 50, ndakatalika kuzinyomenena eelyo ndakazibweza. Zilisisidwe muvwu ansi mutente lyangu antoomwe amali kunsi lyacisani.”
22 Mpoonya aawo Joshua wakatuma batumwa ibakazuzila kutente, eelyo bakacijana cisani kacisisidwe mutente lyakwe antoomwe amali kunsi lyaco.
23 Aboobo bakazigwisya zintu eezyo mutente akuzileta kuli Joshua akubana Israyeli boonse alimwi akuzibikka kumbele lya Jehova.
24 Lino Joshua antoomwe abana Israyeli boonse mbaakali limwi, bakabweza Akani+ mwana wa Zera, nsiliva, cisani, ngolida,+ bana bakwe basankwa abasimbi, ŋombe zyakwe, mbongolo zyakwe, mbelele zyakwe, mpongo zyakwe, atente lyakwe alimwi azintu zyakwe zyoonse akuzitola ku Kkuti* lya Akori.+
25 Mpoonya Joshua wakati: “Ino nkaambo nzi ncootuletela mapenzi?+ Jehova ulakupa cisubulo sunu.” Mpoonya bana Israyeli boonse bakamupwaya mabwe,+ kumane bakabaumpa mumulilo.+ Oobu mbobakabapwaya mabwe boonse.
26 Bakalundika mulwi wamabwe atala lyakwe, aayo aaciliko kusikila sunu. Aboobo bukali bupati bwa Jehova bwakamana.+ Nkakaambo kaako busena oobo bwakaulikwa kuti Kkuti lya Akori,* kusikila sunu.
Bupanduluzi buyungizyidwe
^ Nkokuti, kulubazu lwakujwe.
^ Syekeli lyomwe lyakali kulema magilamu aali 11.4. Amubone Makani Aayungizyidwe B14.
^ Naa “Cibanda.”
^ Nkokwaamba kuti “Mapenzi; Kutandwa.”
