Levitiko 13:1-59
13 Jehova wakazumanana kwaambila Musa a Aroni kuti:
2 “Ikuti naa muntu wazimba, waba atukoto-koto naa kabala alukanda lwakwe alimwi kayeeyelwa kuti ulaabulwazi bwacinsenda,*+ nkokuti weelede kuletwa kuli Aroni mupaizi naa umwi wabana bakwe bapaizi.+
3 Mupaizi uyoobulanga-langa bulwazi ibuli alukanda. Ikuti naa boya buli waawo aali bulwazi bwacinca akutuba akuti lukanda lwalibonya kubbookela kwiinda lukanda lumbi lwamubili wakwe, nkokuti ncinsenda. Mupaizi uyoocilanga-langa akumwaamba kuti ulisofweede.
4 Pele kuti naa kabala kakatuba aalukanda lwakwe akulibonya kuti takabbookede kwiinda lukanda lumbi lwamubili akuti boya tiibwatuba, mupaizi weelede kumuzandula muntu ooyo mazuba aali ciloba.+
5 Mupaizi uyoomulanga-langa alimwi mubuzuba bwaciloba, eelyo ikuti naa kwalibonya mbuli kuti bulwazi bwamana, akuti tiibwayandilila mulukanda, weelede kumuzandula mazuba aambi aali ciloba.
6 “Mupaizi weelede kumulanga-langa lwabili mubuzuba bwaciloba, eelyo ikuti naa bulwazi tabucilibonyi kapati akuti tiibwayandilila mulukanda, mupaizi uyoomwaamba kuti ulasalala;+ twali tukoto-koto buyo. Aboobo muntu ooyo weelede kuwasya zisani zyakwe akusalala.
7 Pele kuti naa tukoto-koto tulibonya kuti twayandilila* mulukanda, musyule aakulibonya kumupaizi kuti abone naa wasalala, nkokuti weelede kuyoolibonya alimwi* kumupaizi.
8 Mupaizi uyoomulanga-langa, eelyo ikuti naa tukoto-koto twayandilila mulukanda, mupaizi uyoomwaamba kuti ulisofweede. Ncinsenda+ eeco.
9 “Ikuti muntu waba abulwazi bwacinsenda, weelede kuletwa kumupaizi,
10 eelyo mupaizi uyoomulanga-langa.+ Ikuti naa alukanda kwazwa zituba akupa kuti boya butube alimwi cilonda eeco camonkoka,+
11 mbulwazi bwacinsenda citaponi alukanda lwamubili wakwe, eelyo mupaizi weelede kumwaamba kuti ulisofweede. Taciyandiki kumuzandula pe,+ nkaambo ulisofweede.
12 Lino ikuti naa cinsenda calibonya mulukanda loonse, alimwi cayandilila mubili woonse kuzwa kumutwe kusikila kumaulu cakuti calibonya kumupaizi,
13 eelyo awalo wacilanga-langa akubona kuti cinsenda calibonya amubili woonse, weelede kwaambila muntu ooyo uujisi cinsenda kuti ulasalala.* Coonse cacinca akutuba, nkokuti ulasalala.
14 Pele kwaakulibonya cilonda cimonkokede, uyoosofwaala.
15 Mupaizi abona cilonda cimonkokede, uyoomwaamba kuti ulisofweede.+ Cilonda cimonkokede cilisofweede. Mbulwazi bwacinsenda.+
16 Pele ikuti naa cilonda eeco catuba alimwi, uyakuunka alimwi kumupaizi.
17 Mupaizi uyoomulanga-langa,+ ikuti naa bulwazi bwacinca akutuba, mupaizi uyoomwaambila muntu ooyo kuti ulasalala.
18 “Ikuti muntu waba acuute amubili wakwe kumane capona,
19 pele aawo mpocabede cuute lukanda lwatuba naa kwaba kabala katuba akusalala, weelede kuunka kuyoolitondezya kumupaizi.
20 Mupaizi uyoomulanga-langa,+ eelyo ikuti lukanda lwalibonya kubbookela kwiinda lukanda lumbi lwamubili wakwe akuti boya bwacinca akutuba, weelede kumwaamba kuti ulisofweede. Mbulwazi bwacinsenda ibwatalikila mucuute.
21 Pele kuti mupaizi naalanga-langa wajana kuti kunyina boya butuba, alimwi lukanda talubbookede kwiinda lukanda lumbi lwamubili wakwe alimwi kacitalibonyi kapati, weelede kumuzandula mazuba aali ciloba.+
22 Alimwi ikuti calibonya antangalala kuti cayandilila mulukanda, mupaizi uyoomwaamba kuti ulisofweede. Oobu mbulwazi.
23 Nokuba boobo, ikuti aawo aali cuute kwaba kabala akuti tiikayandilila, ncilonda buyo cacuute, aboobo mupaizi weelede kumwaamba kuti ulasalala.+
24 “Ikuti naa muntu wapya mulilo, eelyo cilonda catuba akusalala naa kutuba buyo,
25 mupaizi weelede kucilanga-langa. Ikuti naa boya acilonda bwatuba alimwi calibonya kubbookela kwiinda lukanda lumbi lwamubili, mbulwazi bwacinsenda ibwatalikila mucilonda, aboobo mupaizi weelede kumwaamba kuti ulisofweede. Mbulwazi bwacinsenda.
26 Pele kuti mupaizi naalanga-langa wajana kuti kunyina boya butuba acilonda alimwi tacibbookede kwiinda lukanda lumbi lwamubili wakwe alimwi cazibaana, weelede kumuzandula mazuba aali ciloba.+
27 Mupaizi uyoomulanga-langa alimwi mubuzuba bwaciloba, ikuti calibonya antangalala kuti cayandilila mulukanda, mupaizi uyoomwaamba kuti ulisofweede. Oobu mbulwazi bwacinsenda.
28 Pele kuti cilonda tiicayandilila mulukanda alimwi cazibaana, nkuzimba buyo kwakutumpa, aboobo mupaizi weelede kumwaamba kuti ulasalala.
29 “Ikuti mwaalumi naa mukaintu waba abulwazi amutwe naa kucilezu,
30 mupaizi uyoobulanga-langa bulwazi oobo.+ Ikuti naa lukanda lulibonya kubbookela kwiinda lukanda lumbi, aboya bwaba bwamubala wamungunga waji akuubauba, mupaizi uyakwaamba muntu ooyo kuti ulisofweede; mbulwazi bwakumutwe naa kucilezu. Ncinsenda cakumutwe naa kucilezu.
31 Pele ikuti naa mupaizi wabona kuti lukanda aawo aali bulwazi talubbookede kwiinda lukanda lumbi alimwi kunyina boya busiya alindulo, mupaizi weelede kuzandula muntu ooyo uuli abulwazi mazuba aali ciloba.+
32 Mupaizi uyoobulanga-langa bulwazi mubuzuba bwaciloba, ikuti naa bulwazi tiibwayandilila alimwi tiikwaba boya bwamubala wamungunga waji muli mbubo akuti lukanda aawo mpobubede bulwazi tiilwabbookela kwiinda lukanda lumbi,
33 weelede kugelwa, pele tayelede kugelwa aawo mpobubede bulwazi. Mpoonya mupaizi uyoomuzandula muntu ooyo uuli abulwazi mazuba aali ciloba.
34 “Mupaizi weelede kubulanga-langa alimwi bulwazi mubuzuba bwaciloba, ikuti naa bulwazi bwakumutwe akucilezu tiibwayandilila mulukanda alimwi talubbookede kwiinda lukanda lumbi, mupaizi weelede kumwaamba kuti ulasalala, aboobo muntu ooyo weelede kuwasya zisani zyakwe eelyo ulasalala.
35 Pele ikuti bulwazi bwalibonya caantangalala kuti bwayandilila mulukanda, musyule lyakusalazyigwa,
36 mupaizi uyoomulanga-langa, ikuti bulwazi bwayandilila mulukanda, mupaizi tayandiki kuti mane alange-lange naa masusu aba amubala wamungunga waji; muntu ooyo ulisofweede.
37 Nokuba boobo, ikuti kwajanika kuti bulwazi tiibwayandilila akuti kwamena masusu aasiya, nkokuti bulwazi oobo bwapona. Muntu ooyo ulasalala, eelyo mupaizi uyoomwaamba kuti ulasalala.+
38 “Ikuti mwaalumi naa mukaintu waba atubala-bala tutuba amubili,
39 mupaizi uyoobalanga-langa.+ Ikuti tubala-bala ooto katutubuluka, ncintambwe buyo catalika mulukanda lwakwe. Muntu ooyo ulasalala.
40 “Ikuti naa masusu aamwaalumi akuluka, mpoonya waba alubala, muntu ooyo ulasalala.
41 Ikuti wakuluka masusu ankumo yakwe, muntu ooyo ulasalala.
42 Pele kuti akatwikkilo naa ankumo yakwe aawo mpaakakuluka masusu kwalibonya kutuba-tuba akusalala-salala, nkokuti mbulwazi bwacinsenda bwatalikila akatwikkilo naa ankumo.
43 Mupaizi uyoomulanga-langa, eelyo kuti naa kuzimba ooko kwatuba-tuba akusalala-salala akatwikkilo naa ankumo aawo mpaakakuluka masusu, alimwi kwalibonya mbuli kuti ncinsenda mulukanda lwakwe,
44 nkokuti muntu ooyo ngusicinsenda. Ulisofweede, alimwi mupaizi weelede kumwaamba kuti ulisofweede akaambo kabulwazi ibuli amutwe wakwe.
45 Zisani zyasicinsenda zyeelede kuzapaulwa, masusu aakwe taayelede kukamunwa alimwi weelede kulivwumba kumulomo akoompolola kuti, ‘Ndilisofweede, ndilisofweede!’
46 Ciindi coonse ncali abulwazi unoosofweede. Mbwaanga muntu ooyo ulisofweede, weelede kukkala alikke anze aankambi.+
47 “Ikuti naa cisani caba acinsenda, cibe cisani caboya naa camulembo muuba-uba,
48 naa mocili muntali yamubulamfwu naa yamubwamba bwacisani cakusuma naa cilukidwe, naa mucikutu naa mucintu cili coonse cacikutu,
49 akuti kwalibonya bulwazi bwamubala wanyanzabili uuvwelene awamungunga waji naa uusalala-salala mucisani naa mucikutu, muntali yamubulamfwu naa yamubwamba bwacisani naa mucintu cili coonse cacikutu, oobo mbulwazi bwacinsenda, alimwi ceelede kutondezyegwa kumupaizi.
50 Imupaizi uyoobulanga-langa bulwazi, alimwi weelede kuzandula cintu eeco cijisi bulwazi mazuba aali ciloba.+
51 Aakubulanga-langa bulwazi mubuzuba bwaciloba akubona kuti bulwazi bwayandilila kucisani naa muntali yamubulamfwu naa yamubwamba bwacisani naa mucintu cili coonse cacikutu (kufwumbwa naa cikutu cibelesyegwa mulimo nzi), bulwazi oobo ncinsenda ciyambukila alimwi cintu eeco cilisofweede.+
52 Weelede kucuumpa cisani eeco, cibe caboya naa camulembo muuba-uba, naa cintu cili coonse cacikutu caba abulwazi, nkaambo mbulwazi bwacinsenda ciyambukila. Ceelede kuumpwa mumulilo.
53 “Pele kuti mupaizi naabulanga-langa bulwazi wajana kuti tiibwayandilila kucisani naa muntali yamubulamfwu naa yamubwamba bwacisani naa mucintu cili coonse cacikutu,
54 mupaizi uyoolailila kuti bacisanzye cintu eeco cijisi cinsenda, eelyo uyoocizandula alimwi mazuba aali ciloba.
55 Mpoonya mupaizi uyoocilanga-langa cintu cijisi bulwazi camana kusanzyigwa cakulomya. Ikuti naa bulwazi tiibwacinca nokuba kuti bulwazi tiibwayandilila, cilisofweede. Weelede kucuumpa mumulilo, mbwaanga caligwa bulwazi, mukati naa aanze.
56 “Pele ikuti mupaizi naabulanga-langa bulwazi wajana kuti tabucilibonyi kapati nicamana kusanzyigwa cakulomya, uyoocizapula cibeela cacisani naa cacikutu icijisi bulwazi.
57 Nokuba boobo, ikuti kacicilibonya kucisani naa muntali yamubulamfwu naa yamubwamba bwacisani naa mucintu cili coonse cacikutu, nkokuti bulwazi oobo buyabuyandilila, alimwi weelede kuumpa cintu cili coonse cijisi bulwazi mumulilo.+
58 Pele ikuti naa bulwazi tabucilibonyi kucisani naa kucintu cili coonse cacikutu ncomwasanzya, ceelede kusanzyigwa alimwi, eelyo ciyoosalala.
59 “Ooyu ngomulawo wabulwazi bwacinsenda buli kucisani caboya naa camulembo muuba-uba, naa mocili muntali yamubulamfwu naa yamubwamba bwacisani, naa mucintu cili coonse cacikutu, kutegwa kuzyibwe naa cilasalala naa cilisofweede.”
Bupanduluzi buyungizyidwe
^ Ibbala lya Chihebrayo “lyacinsenda” lyaamba zinji alimwi lilakonzya kubikkilizya amalwazi manji aayambukila. Kuyungizya waawo, lilabikkilizya amalwazi aamwi aajanika kuzisani alimwi amumaanda.
^ Naa “bulwazi bulibonya kuti bwayandilila.”
^ Naa “ciindi cabili.”
^ Naa “taciyambukili.”
