Levitiko 5:1-19
5 “‘Ikuti muntu wabisya mukuti tanaamba cibi ncaakacita muntu umwi, ciindi naamvwa kwaambilizya kubuleya kwakuti muntu umwi acitile bumboni*+ kukaambo aaka, kakuli mubwini walo ngukamboni naa wakalibonena ameso naa kuli ncazyi kujatikizya cibi eeco, nkokuti uyoosubulwa akaambo kamulandu wakwe.
2 “‘Naa muntu waguma cintu cisofweede, kufwumbwa naa munyama uufwide wamusyokwe, munyama uuvwubwa naa cimwi cazilenge zyeenda mubunji,+ ulasofwaala alimwi ulaamulandu, nokuba kuti waciguma katazyi.
3 Naa ikuti cakutazyiba muntu waguma cintu cili coonse cisofweede cizwa kumuntu+–kufwumbwa cintu cisofweede cikonzya kumusofwaazya–alimwi wazyiba kuti wakaguma cintu cisofweede, nkokuti ulaba amulandu.
4 “‘Naa kuti muntu wakonka cakubinda kuti ulacita cintu cimwi–cibotu naa cibi, kufwumbwa naa ncinzi–alimwi tanaakazyi, pele lino wazyiba kuti wakakonka cakubinda, ulaba amulandu.*+
5 “‘Ikuti waba amulandu kujatikizya cimwi cazintu eezyi, weelede kulyaambilila+ mbwaakabisya.
6 Alimwi uyooleta cituuzyo camilandu kuli Jehova kucibi ncaakacita,+ nkokuti kabelele naa kapongo kapwizi, kuti cibe cituuzyo cazibi. Mpoonya mupaizi uyoomanya mulandu wacibi cakwe.
7 “‘Ikuti katacikonzyi kuleta mbelele, nkokuti weelede kuletela Jehova nziba zyobilo naa bana bankwilimba bobilo+ cibe cituuzyo camilandu kucibi ncaakacita, yomwe njacituuzyo cazibi, eelyo iimbi njacituuzyo cuumpwa.+
8 Weelede kuzileta kumupaizi, walo uyoosaanguna kutuula yeeyo yacituuzyo cazibi alimwi akwiitenda amoyo, pele mutwe kataukoswedi limwi.
9 Uyoosansaila bulowa bumwi bwacituuzyo cazibi mumabali aacipaililo, pele bulowa bwasyaala bweelede kutilwa ansi aacipaililo.+ Ncituuzyo cazibi.
10 Pele yabili uyakwiituula mbuli cituuzyo cuumpwa kweelana acilengwa;+ alimwi mupaizi uyoomanya milandu yakwe kucibi ncaakacita, eelyo uyoolekelelwa.+
11 “‘Lino kuti katakonzyi kujana nziba zyobilo naa bana bankwilimba bobilo, nkokuti weelede kuleta cipaanzi cakkumi caefa*+ cafulaulu mubotu kacili cituuzyo cazibi kucibi ncaakacita. Tayelede kubikka mafwuta naa tununkilizyo kulincico, nkaambo ncituuzyo cazibi.
12 Uyoocileta kumupaizi, alimwi mupaizi weelede kubweza fulaulu uukkwana mujanza kuti ube ciibalusyo akuwuumpa kuti usuke busi acipaililo atala aazituuzyo zya Jehova zyuumpwa. Ncituuzyo cazibi.
13 Mupaizi uyoomanya cibi muntu ooyo ncaakacita, icibi cili coonse akati kazibi eezyi, aboobo uyoolekelelwa.+ Cituuzyo casyaala ciyooba camupaizi+ mbubonya mbuli cituuzyo camaila.’”+
14 Jehova wakazumanana kwaambila Musa kuti:
15 “Kuti naa muntu wabisya cakutazyiba kuzintu zisalala zya Jehova,+ weelede kuleta mugutu uutajisi kampenda kacili cituuzyo camilandu+ kuli Jehova; muulo waco wamasyekeli* aansiliva ulabikkwa kweelana acipimyo casyekeli lyamubusena busalala.+
16 Aboobo uyoobbadela akaambo kacibi ncaakacita kuzintu zisalala alimwi uyooyungizya cipaanzi casanu alincico.+ Uyoocipa kumupaizi kutegwa mupaizi amanye mulandu+ wakwe kubelesya mugutu wacituuzyo camilandu, eelyo uyoolekelelwa.+
17 “Ikuti muntu wabisya mukuti wacita cimwi akati kazintu eezyo Jehova nzyaalailila kuti tazyeelede kucitwa, nokuba kuti wacita oobo cakutazyiba, ulaba amulandu alimwi uleelede kusubulwa akaambo kamulandu wakwe.+
18 Weelede kuleta mugutu wacituuzyo camilandu+ uutajisi kampenda kumupaizi kweelana amuulo uubikkidwe. Mpoonya mupaizi uyoomanya mulandu wakwe ngwaakacita cakutazyiba, eelyo uyoolekelelwa.
19 Ncituuzyo camilandu. Ncobeni wabisya kuli Jehova.”
Bupanduluzi buyungizyidwe
^ Mu Chihebrayo, “jwi lyakusinganya (cikonke).” Ambweni cakwaambilizya kujatikizya cibi icakali kubikkilizya kusinganya sikubisya naa kamboni ikuti naa waalilwa kucitila bumboni.
^ Kulibonya kuti aawa caamba kwaalilwa kuzuzikizya cikonke.
^ Cipaanzi cakkumi caefa cakaleelene amalita aali 2.2. Amubone Makani Aayungizyidwe B14.
^ Syekeli lyomwe lyakali kulema magilamu aali 11.4. Amubone Makani Aayungizyidwe B14.
