Luka 1:1-80
1 Oolemekwa kapati Teyofilo, mbwaanga ibanji bakasoleka kujana akulemba makani ngotusyoma cakumaninina,+
2 kweelana ambobakatwaambila makani aaya aabo ibakalibonena ameso kuzwa kumatalikilo+ alimwi ibakaambilizya mulumbe wangawo,+
3 ndakabona kuti ncibotu kuti andime ndikulembele makani aayo mbwaabede nkaambo ndakaziccililizya cakulomya zintu zyoonse kuzwa kumatalikilo,+
4 ikutegwa usinizye kuti zintu nzyookayiisyigwa mulomo mpande nzyamasimpe.+
5 Kumazuba aa Heroda,*+ mwami wa Judaya, kwakali mupaizi umwi uutegwa Zekariya, umwi wankamu yabapaizi balunyungu lwa Abija.+ Mukaintu wakwe wakali umwi wabana basimbi ba Aroni, izina lyakwe wakali Elizabeta.
6 Boonse bobilo bakaliluleme kuli Leza, bakali kweenda kabanyina kampenda kweelana amilawo yoonse alimwi amalailile oonse aa Jehova.*
7 Pele bakanyina mwana, nkaambo Elizabeta tanaakali kuzyala, alimwi boonse bobilo bakalicembeede.
8 Lino naakali kubeleka mulimo wabupaizi kuli Leza munkamu mwaakabede,+
9 kweelana acilengwa cakaliko cabupaizi, cakali ciindi cakwe cakutuula tununkilizyo+ naakanjila mutempele lya Jehova.*+
10 Bantu boonse bakali kupaila anze muwoola lyakutuula tununkilizyo.
11 Wakabona mungelo wa Jehova* kaimvwi kululyo lwacipaililo catununkilizyo.
12 Naakabona boobo, Zekariya wakanyongana alimwi wakayoowa kapati.
13 Pele mungelo wakamwaambila kuti: “Utayoowi Zekariya, nkaambo kulomba kwako kwamvwugwa, aboobo mukaintu wako, Elizabeta, uyookuzyalila mwana musankwa, eelyo ukamuulike zina lyakuti Johane.+
14 Yebo uyookondwa akusekelela kapati, alimwi bantu banji bayookondwa akaambo kakuzyalwa kwakwe,+
15 nkaambo unooli mupati mumeso aa Jehova.*+ Pele teelede kunywa waini naa bukoko buli boonse pe,+ alimwi unoozwide muuya uusalala nociba ciindi katanazyalwa,*+
16 alimwi uyoopilusya ibunji bwabana ba Israyeli kuli Jehova* Leza wabo.+
17 Alimwi uyakuunka kumbele lya Leza kajisi muuya anguzu mbuli zya Elija+ kuti apilusye myoyo yabamatata kubana+ alimwi aabo bataswiilili uyoobapilusya kubusongo bugwasya bwabalulami ikutegwa akabambile Jehova* bantu balibambilide.”+
18 Zekariya wakabuzya mungelo kuti: “Mbuti mbondikonzya kwaasyoma makani aaya? Nkaambo ndacembaala, alimwi awalo mukaintu wangu myaka yakwe yakwelenkana.”
19 Mungelo wakamwiingula kuti: “Ndime Gabriyeli,+ ooyo wiima kubusyu bwa Leza,+ alimwi ndatumwa kuti ndikanane anduwe akukwaambila makani aaya mabotu.
20 Pele bona! Ulaba syaataambi alimwi tokoocikonzya kwaambaula kusikila buzuba zintu eezyi noziyoocitika nkaambo tonoosyoma majwi aangu aayo aayoozuzikizyigwa aciindi cibikkidwe.”
21 Aciindi eeco bantu bakali kumulindila Zekariya, eelyo bakalibilika nkaambo wakamuka kapati kuzwa mutempele.
22 Naakazwa, tanaakali kukonzya kwaambaula ambabo, mpoonya bakazyiba kuti wabona cilengaano mutempele. Wakali kwiile kutambaika maanza kulimbabo pele kataambauli.
23 Lino mazuba aayo aamulimo wakwe uusetekene* naakamana, wakaunka kuŋanda yakwe.
24 Nikwakainda mazuba aali mbwaabede, Elizabeta imukaintu wakwe wakamita, alimwi kwamyezi yosanwe tanaakali kuzwa muŋanda, kati:
25 “Oobu mbwaandicitila Jehova* mazuba aano. Wandicebuka akundigusya masampu akati kabantu.”+
26 Naakakkwanya myezi iili cisambomwe kamitide, Leza wakatuma mungelo Gabriyeli+ kumunzi waku Galilaya uutegwa Nazareta,
27 kuli nakalindu+ wakasinkilidwe kumwaalumi uutegwa Josefa wamuŋanda ya Davida, izina lyanakalindu ooyu wakali Mariya.+
28 Aboobo mungelo wakanjila akwaambila Mariya kuti: “Wapona yebo ooyandwa kapati, Jehova* ulaanduwe.”
29 Pele wakanyongana kapati akaambo kamajwi aaya ngaakaamba, eelyo wakali kuyanda kuzyiba ncowaamba mooni ooyu.
30 Aboobo mungelo wakamwaambila kuti: “Utayoowi Mariya, nkaambo Leza wakukkomanina.
31 Alimwi bona! Uyoomita akuzyala mwana musankwa,+ ngoyakuulika zina lyakuti Jesu.+
32 Ooyu unooli mupati+ alimwi uyootegwa Mwana wa Mupatikampatila,+ alimwi Jehova* Leza uyoomupa cuuno cabwami ca Davida usyi,+
33 eelyo unooli Mwami uuyoolela muŋanda ya Jakobo kukabe kutamani, alimwi Bwami bwakwe tabukamani.”+
34 Pele Mariya wakamubuzya mungelo kuti: “Ino eeci ciyookonzyeka buti mbwaanga mebo tandinalede amusankwa?”+
35 Mukwiingula imungelo wakamwaambila kuti: “Muuya uusalala uyookusikila+ alimwi nguzu zya Mupatikampatila ziyooba alinduwe. Aboobo ooyo uyoozyalwa uyakwaambwa kuti uusalala,+ Mwana wa Leza.+
36 Alimwi bona! Elizabeta wamukowaako awalo wakamita mwana musankwa kubucembele, eelyo lino wakkwanya myezi iili cisambomwe, ooyo wakali kutegwa mukaintu uutazyali;
37 nkaambo kunyina cintu caambwa a Leza citakonzyi kucitika.”+
38 Mpoonya Mariya wakati: “Bona, mebo ndili muzike wa Jehova!* Akube mbubonya mbowaamba.” Kumane mungelo wakaunka.
39 Aboobo mumazuba ngoonya aayo Mariya wakanyamuka akuunka cakufwambaana kucisi camalundu, kumunzi wa Juda,
40 mpoonya wakanjila muŋanda ya Zekariya akumwaanzya Elizabeta.
41 Eelyo Elizabeta amvwe buyo kwaanzya kwa Mariya, mwana mwida lyakwe wakaputauka, mpoonya Elizabeta wakazula muuya uusalala
42 akoongolola kuti: “Yebo ulilelekedwe akati kabamakaintu boonse, alimwi ulilelekedwe mwana uuli mwida lyako!
43 Ino ndaba buti acoolwe cili boobu kuti banyina Mwami wangu baboole kulindime?
44 Nkaambo bona! Mbondamvwida ijwi lyakwaanzya kwako mumatwi aangu, imwana uuli mwida lyangu waputauka akaambo kakukondwa kapati.
45 Ulikkomene awalo ooyo mukaintu iwakasyoma nkaambo ziyoocitika zyoonse nzyaakaambilwa a Jehova.”*
46 Mpoonya Mariya wakati: “Moyo wangu ulamulemeka Jehova*+
47 amuuya wangu ulikondedwe kapati akaambo ka Leza Mufwutuli wangu,+
48 nkaambo wayeeya bucete bwamuzike wakwe.+ Lino bona! Kuzwa sunu, mazyalani oonse ayoondaamba kuti ndililelekedwe,+
49 nkaambo Singuzu wandicitila milimo mipati alimwi zina lyakwe lilasalala,+
50 alimwi kumazyalani amazyalani, aabo bamuyoowa ulabafwida luzyalo.+
51 Wacita milimo mipati ajanza lyakwe; wabamwaya aabo ibalisumpula mumakanze aamyoyo yabo.+
52 Wabawisya baalumi basinguzu muzyuuno zyabo+ akusumpula bacete;+
53 wabapa zintu zyoonse zibotu aabo bafwide nzala,+ pele bavwubi wabatanda acinkwamaanza.
54 Wamugwasya Israyeli mubelesi wakwe, akuyeeya luzyalo lwakwe,+
55 mbubonya mbwaakaambila bamataateesu, nkokuti Abrahamu alunyungu lwakwe+ mane kukabe kutamani.”
56 Mariya wakakkala anguwe kwamyezi yotatwe, mpoonya wakajokela kuŋanda yakwe.
57 Lino cakasika ciindi cakuti Elizabeta atumbuke, aboobo wakatumbuka mwana musankwa.
58 Mpoonya basimukobonyina abasazinyina bakamvwa kuti Jehova* wamufwida luzyalo, aboobo bakasekelela anguwe.+
59 Mubuzuba bwalusele bakaboola kuti bamupalule mwana,+ alimwi bakali kuyanda kuti bamuulike zina lyausyi, Zekariya.
60 Pele banyina bakaamba kuti: “Peepe! Ulaulikwa lyakuti Johane.”
61 Balo bakamwaambila kuti: “Taakwe wamukowa wako wiitwa azina eeli.”
62 Kumane bakabuzya usyi kwiinda mukutambaika maanza kutegwa abaambile zina ndyaakali kuyanda kuti mwana aulikwe.
63 Aboobo wakalomba cakulembela akulemba kuti: “Izina lyakwe ngu Johane.”+ Eeci cakabagambya boonse.
64 Ndilyonya eelyo, mulomo wakwe wakajaluka, alimwi mulaka wakwe wakaangululwa eelyo wakatalika kwaambaula,+ katembaula Leza.
65 Mpoonya boonse aabo bakkala mucilawo cabo bakayoowa, alimwi zintu eezyi zyoonse izyakacitika zyakaba ngamakani aakali kwaambaulwa mucooko camalundu coonse ca Judaya.
66 Alimwi boonse aabo ibakaamvwa bakaayobola mumyoyo yabo akulibuzya kuti: “Ino uyooba mwana uuli buti ooyu?” Nkaambo janza lya Jehova* masimpe lyakali anguwe.
67 Mpoonya Zekariya, usyi, wakazula muuya uusalala, aboobo wakasinsima kati:
68 “Aatembaulwe Jehova* Leza wa Israyeli,+ nkaambo wabacebuka bantu bakwe akubafwutula.+
69 Alimwi watubusizya lwija lwalufwutuko*+ muŋanda ya Davida mubelesi wakwe,+
70 mbubonya mbwaakaamba kwiinda mubasinsimi bakwe basalala bansiku+
71 kuti uyootuvwuna kuli basinkondoma akumaanza aabaabo boonse batusulide;+
72 kutufwida luzyalo akaambo kabamataateesu akuyeeya cizuminano cakwe cisalala,+
73 cikonke ncaakakonka kuli Abrahamu taateesu,+
74 twaakuvwunwa kumaanza aabasinkondoma uyootupa coolwe cakumubelekela mulimo uusetekene cakutayoowa,
75 cakusyomeka alimwi amubululami kumbele lyakwe mazuba aabuumi bwesu boonse.
76 Pele yebo, omwana uyakwiitwa kuti musinsimi wa Mupatikampatila, nkaambo uyakuunka kumbele lya Jehova* kutegwa ukamubambile nzila,+
77 akuzyibya bantu bakwe kuti uyoobafwutula kwiinda mukubalekelela zibi zyabo,+
78 akaambo kamoyo waluzyalo lwa Leza wesu. Akaambo kaluzyalo oolu, tuyoobona mumuni uuzwa kujulu uumunika mbuli nolipasula zuba,
79 kubamunikila aabo bakkede mumudima amucimvwule calufwu,+ akwaasololela maulu eesu munzila yaluumuno.”
80 Eelyo mwana ooyo wakakomena akuyuma kumuuya, alimwi wakali kukkala mucimpayuma kusikila buzuba mbwaakalitondezya caantangalala kubana Israyeli.
Bupanduluzi buyungizyidwe
^ Amubone Bupanduluzi Bwamabala.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “kacili mwida lyabanyina.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “aamulimo wakwe wabuleya.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “mufwutuli singuzu.” Amubone Bupanduluzi Bwamabala, “Lwija.”
^ Amubone Makani Aayungizyidwe A5.
