Luka 14:1-35
14 Aciindi cimwi wakaunka kuyoolya cakulya muŋanda yaumwi wabasololi baba Farisi mu Sabata, eelyo bakali kumulangisya.
2 Lino amubone! Kumbele lyakwe kwakali muntu umwi wakazimbide mubili.*
3 Aboobo Jesu wakabuzya baabo bazyi Mulawo aba Farisi kuti: “Sena cilizumizyidwe kuponya mu Sabata naa pe?”+
4 Pele bakaumuna buyo. Mpoonya wakajata muntu ooyo, wakamuponya akumwaambila kuti aunke kwabo.
5 Mpoonya wakababuzya kuti: “Nguni akati kanu uutakonzyi kumugusya cakufwambaana mwanaakwe naa ŋombe yakwe ikuti yawida mumugoti+ mubuzuba bwa Sabata?”+
6 Pele tiibakali kukonzya kumwiingula mumakani aaya.
7 Mpoonya naakabona kuti ibantu bakatambwa bakali kulisalila masena aakukkala aalemenede, wakabaambila cikozyanyo.+ Wakati:
8 “Umwi muntu naakutamba kupobwe lyabwiinga, utakkalili mubusena bulemenede kapati.+ Nkaambo ambweni muntu umwi uulemenede kwiinda nduwe awalo wakatambwa.
9 Eelyo ooyo wakamutamba nyoonse nyobilo ulaboola akukwaambila kuti, ‘Akukkale yooyu abusena bwako.’ Eelyo yebo uyakunyamuka akweenda kofwide nsoni akuyookkalila kubusena bwaansi kapati.
10 Pele nowatambwa, koya ukakkalile kubusena bwakumamanino, kutegwa muntu ooyo wakutamba asika akwaambile kuti, ‘Mweenzuma, koya ukkalile kumbele.’ Eelyo uyooba abulemu kumbele lyabeenzunyoko boonse.+
11 Nkaambo woonse uulisumpula uyoocesyegwa alimwi woonse uulicesya uyoosumpulwa.”+
12 Mpoonya alimwi wakaambila muntu ooyo wakamutamba kuti: “Wabamba cisusulo naa cilalilo, utaiti beenzinyoko, banabokwanu, basazinyoko, naa basimukobonyoko bavwubide. Buyo-buyo, inga abalo baakukutamba, eelyo ooko inga kwaba kukupilusizya.
13 Pele nowabamba pobwe, tamba bantu bacete, basunkuta, balema, aboofwu;+
14 eelyo uyookkomana mbwaanga tabajisi cakukupilusizya. Nkaambo uyoolumbulwa mububuke+ bwabaluleme.”
15 Naakamvwa makani aaya, umwi akati kabeenzunyina wakamwaambila kuti: “Ulikkomene ooyo uulya cakulya* mu Bwami bwa Leza.”
16 Jesu wakamwaambila kuti: “Umwi muntu wakali kubamba cilalilo citalikomeneni,+ mpoonya wakatamba bantu banji.
17 Eelyo wakatuma muzike wakwe aawoola lyacilalilo kuyakwaambila bakatambidwe kuti, ‘Katuya, nkaambo zintu zyoonse zyabambwa kale.’
18 Pele boonse bakatalika kulitamizya.+ Wakusaanguna wakamwaambila kuti, ‘Ndakaula muunda aboobo ndeelede kuunka kuyakuubona; Ndalomba kuti undijatile.’
19 Aumwi wakati, ‘Ndakaula zipani zyabasune zyosanwe aboobo nduunka kuyoobona mbobabede; Ndalomba kuti undijatile.’+
20 Alimwi umbi wakati, ‘Ndakakwata onoono, aboobo tandikonzyi kuboola.’
21 Aboobo muzike wakapiluka akwaambila simalelaakwe zintu eezyi zyoonse. Mpoonya mwiniŋanda wakakalala akwaambila muzike wakwe kuti, ‘Fwambaana koya mumigwagwa amunzila zyamumunzi, ukalete bantu bacete abasunkuta aboofwu abalema.’
22 Mukuya kwaciindi muzike wakati, ‘Simalelaangu, ndacita mbubonya mbowalailila, pele nkobucili busena.’
23 Aboobo simalelo wakaambila muzike kuti, ‘Koya munzila amutuzila twiinda musyokwe, ukabakulwaizye kuti baboole ikutegwa ŋanda yangu izule.+
24 Nkaambo ndimwaambila kuti, kunyina naba omwe akati kabantu aabo bakatambidwe uuyoolabila cilalilo cangu.’”+
25 Lino makamu-makamu aabantu akali kweenda anguwe, eelyo wakacenguluka akubaambila kuti:
26 “Ikuti umwi waboola kulindime pele kabayanda kapati* bausyi, banyina, mukaintu wakwe, bana, abanabokwabo basankwa abasimbi, inzya, alimwi mane abuumi bwakwe bwini,+ takonzyi kuba sikwiiya wangu.+
27 Kufwumbwa uutanyamuni cisamu cakwe cakupenzyezya* akunditobela takonzyi kuba sikwiiya wangu.+
28 Mucikozyanyo, nguni akati kanu uuyanda kuyaka ngazi uutasaanguni kukkala ansi akubona mali aayandika, kutegwa azyibe naa ulijisi mali aakkwana kuyasya alimwi akumanizya ngazi eeyo?
29 Buyo-buyo, ulakonzya kuyaka ntalisyo ilikke akukakilwa kwiimanizya, mpoonya basikulangilila boonse bayootalika kumuseka,
30 kabati: ‘Muntu ooyu wakatalika kuyaka pele cakamwaalila kumanizya.’
31 Naa, ino mwami nzi uujisi basikalumamba bali 10,000 uuya kukulwana nkondo amwami umbi, uutasaanguni kukkala ansi kuyeeya akulomba lulayo kuli bamwi kubona naa inga wacikonzya kulwana mwami uujisi basikalumamba bali 20,000 ?
32 Ikuti wabona kuti inga tacikonzyi, ulatuma baiminizi bakwe kuyoobandika makani aaluumuno amwaminyina ooyo kacili kule.
33 Mbubonya buyo, kamuzyi kuti kunyina muntu akati kanu uutasiyi lubono lwakwe loonse uukonzya kuba sikwiiya wangu.+
34 “Mubwini munyo mubotu. Pele ikuti munyo wasampuka, ino inga wacitwa buti kuti utalike kulula alimwi?+
35 Inga taucigwasyi pe kuubikka mubulongo nomuba mumbolezi. Bantu bausowa buyo. Ooyo ujisi matwi aamvwa, aamvwe.”+
Bupanduluzi buyungizyidwe
^ Naa “wakazwide maanzi mumubili.”
^ Mu Chigiriki, “uulya cinkwa.”
^ Naa “katasulaiki.”
^ Amubone Bupanduluzi Bwamabala.
