Luka 19:1-48
19 Eelyo Jesu wakanjila mu Jeriko kali sikwiindilila.
2 Lino oomu mwakali muntu umwi wazina lya Zakeyo, wakali mupati wabasimutelo; alimwi wakalivwubide.
3 Wakali kuyandisya kubona mbwabede ooyu Jesu, pele wakaalilwa kumubona akaambo kankamu yabantu mbwaanga wakali mufwaafwi.
4 Aboobo wakabalikila kumbele waakutanta mumukuyu kutegwa amubone nkaambo wakali kuyanda kwiinda nzila eeyo.
5 Lino Jesu naakasika abusena oobo, wakalanga mujulu akumwaambila kuti: “Zakeyo, fwambaana koseluka, nkaambo sunu ndeelede kukkala muŋanda yako.”
6 Mpoonya wakaseluka cakufwambaana akumutambula camaanza obilo muŋanda yakwe.
7 Bantu nobakabona ceeci, boonse bakatalika kuŋuŋuna, balaamba: “Waunka kuyooswaya muntu sizibi.”+
8 Pele Zakeyo wakaimikila akwaambila Mwami kuti: “Bona! Cisela calubono lwangu, O Mwami, ndilacipa bacete, alimwi kufwumbwa ceeco ncindakanyanga muntu kwiinda mukumubejelezya, ndilamujolela akumuyungizyila ziindi zyone.”+
9 Amvwe boobo, Jesu wakamwaambila kuti: “Sunu lufwutuko lwaboola muŋanda eeyi nkaambo ooyu awalo mwana wa Abrahamu.
10 Nkaambo Mwanaamuntu wakaboolela kuyandaula akufwutula basweekede.”+
11 Nobakali kuswiilila makani aaya wakabaambila cikozyanyo acimwi, nkaambo wakali afwaafwi kusika ku Jerusalemu eelyo bakali kuyeeya kuti Bwami bwa Leza bwakali kuyoolibonya ndilyonya.+
12 Aboobo wakati: “Umwi muntu wamumukwasyi wamwami wakaunka kucisi cili kulamfwu+ kuti akapegwe bwami mpoonya akupiluka.
13 Wakaita bazike bakwe bali kkumi, wabapa imamaina* aali kkumi akubaambila kuti, ‘Amucite makwebo kusikila ndikaboole.’+
14 Pele bantu bamucisi cakwe tiibakali kumuyanda, eelyo bakatuma baiminizi kumutobela kuyakwaamba kuti, ‘Tatumuyandi muntu ooyu kuti abe mwami wesu.’
15 “Eelyo naakapiluka kapedwe nguzu zyakweendelezya,* wakaita bazike bakwe aabo mbaakapede mali,* kutegwa azyibe mpindu njobakajana mumakwebo aabo.+
16 Aboobo wakusaanguna wakaboola akwaamba kuti, ‘Mwami, imaina yako yakazyala mamaina aali kkumi.’+
17 Wakamwaambila kuti, ‘Wakacita kabotu, omuzike mubotu! Akaambo kakuti wasyomeka mumakani maniini, ulaba mweendelezi waminzi iili kkumi.’+
18 Lino wabili wakaboola akwaamba kuti, ‘Imaina yako O Mwami, yakazyala mamaina osanwe.’+
19 Ooyu awalo wakamwaambila kuti, ‘Ayebo koba mweendelezi waminzi yosanwe.’
20 Pele umbi wakaboola akwaamba kuti, ‘O Mwami, njeeyi imaina yako njindakasisa kiivwungaidwe mukasani.
21 Ulizyi, ndakakuyoowa nkaambo uli muntu mukali; ulabweza ncootakabikka alimwi ulatebula ncootakasyanga.’+
22 Wakamwaambila kuti, ‘Kumajwi aako ndilakupa mulandu, omuzike mubi. Tee kayi wakalizyi kuti ndili muntu mukali, uubweza ncondatakabikka akutebula ncondatakasyanga?+
23 Aboobo ino nkaambo nzi ncootakaayobozya mali* aangu kuli basikuyobola? Mpoonya akupiluka, nindaabweza ampindu.’
24 “Mpoonya wakaambila baabo bakaimvwi munsi-munsi kuti, ‘Amumunyange imaina akwiipa ooyo uujisi mamaina aali kkumi.’+
25 Pele bakamwaambila kuti, ‘O Mwami, ulijisi kale mamaina aali kkumi!’—
26 ‘Ndimwaambila kuti, umwi aumwi uujisi uyoopegwa azimwi, pele ooyo uutajisi, uyoonyangwa noziba zyeezyo nzyajisi.+
27 Alimwi amubalete okuno basinkondoma aabo batakali kuyanda kuti ndibe mwami wabo, mubajaye kandilangilila.’”
28 Naakamana kwaamba zintu eezyi, wakazumanana mulweendo lwakwe lwakuya ku Jerusalemu.
29 Alimwi naakasika afwaafwi aku Betefage alimwi a Betaniya kucilundu ciitwa kuti Cilundu ca Maolifa,+ wakatuma basikwiiya bakwe bobilo,+
30 ulaamba: “Kamuya mumunzi uulya uulibonya, eelyo mwanjila mulinguwo mulajana mwana wambongolo ulaangidwe, walo uutanatantidwe muntu. Mumwaangunune akumuleta okuno.
31 Pele kuti kwaba muntu uumubuzya kuti, ‘Ino mumwaangunwida nzi?’ Mweelede kwaamba kuti: ‘Mwami ulamuyanda.’”
32 Aboobo aabo bakatumwa bakaunka, baakumujana mbubonya mbwaakabaambila.+
33 Pele nobakali kwaangununa mwana wambongolo, bamukamwini bakababuzya kuti: “Ino mumwaangunwida nzi mwana wambongolo ooyo?”
34 Bakati: “Mwami ulamuyanda.”
35 Aboobo bakamutola kuli Jesu, eelyo bakabikka zisani zyabo zyaatala amwana wambongolo akumukkazika Jesu alinguwe.+
36 Naakali kuyaabweenda, bantu bakali kuyala zisani zyabo zyaatala munzila.+
37 Naakasika afwaafwi awaawo nzila mpoitalikila kuselemuka Cilundu ca Maolifa, nkamu yoonse yabasikwiiya yakatalika kukondwa akutembaula Leza akaambo kamilimo mipati yoonse njoyakabona,
38 balaamba: “Ulilelekedwe ooyo uuboola kali Mwami muzina lya Jehova!* Luumuno kujulu, abulemu kujulu lyamajulu!”+
39 Pele ba Farisi bamwi munkamu bakamwaambila kuti: “Omwiiyi, kobakalalila basikwiiya bako.”+
40 Pele mukwiingula wakati: “Ndimwaambila kuti, ikuti aaba baumuna, mabwe alakonzya koompolola.”
41 Alimwi naakasika munsi-munsi, wakalila naakaubona munzi,+
42 ulaamba: “Eelo kaka nocainda kubota ikuti yebo omwini nowalizizyi mubuzuba obuno zintu zikonzya kukuletela luumuno—pele lino zyasiswa kumeso aako!+
43 Nkaambo mazuba ayookusikila basinkondonyoko nobayookuyakila lubaya lwazisamu zibosya kukuzinguluka alimwi bayookubikka akati akukusinkila* kumabazu oonse.+
44 Bayookuumputila ansi yebo abana bako bali mulinduwe,+ alimwi tabakasiyi bbwe atala aabbwenyina mulinduwe,+ nkaambo tonookacizyiba ciindi cako cakulingulwa.”
45 Mpoonya wakanjila mutempele akutalika kubatandila anze aabo ibakali kusambala,+
46 kabaambila kuti: “Kulilembedwe kuti, ‘Ŋanda yangu inooli ŋanda yakukombela,’+ pele nywebo mwaicita kuba ciyubilo cababbi.”+
47 Wakazumanana kuyiisya abuzuba mutempele. Pele basilutwe babapaizi abalembi abalupati-pati akati kabantu bakali kuyanda kumujaya;+
48 pele bakabula mbobacita boobo, nkaambo bantu boonse bakali anguwe lyoonse kutegwa bamuswiilile.+
Bupanduluzi buyungizyidwe
^ Maina yaba Giriki yakali kulema magilamu aali 340 alimwi yakaleelene amadirakima aali 100. Amubone Makani Aayungizyidwe B14.
^ Naa “bwami.”
^ Mu Chigiriki, “nsiliva.”
^ Mu Chigiriki, “nsiliva.”
^ Amubone Makani Aayungizyidwe A5.
^ Naa “akukupenzya.”
