Luka 2:1-52
2 Lino mumazuba aayo, Kaisara Augusito wakabikka mulawo munyika yoonse wakuti bantu boonse bakalilembye.
2 (Kulilembya kwakusaanguna ooku kwakacitika ciindi Kureniyo naakali mweendelezi wa Siriya.)
3 Eelyo bantu boonse bakaunka kuyoolembwa, umwi aumwi kumunzi okwabo.
4 Awalo Josefa+ wakazwa ku Galilaya, mumunzi wa Nazareta akuya ku Judaya, mumunzi wa Davida uutegwa Betelehemu,+ mbwaanga wakali wamuŋanda alimwi wamumukwasyi wa Davida.
5 Wakaunka kutegwa bakalilembye a Mariya walo aciindi eeco iwakali kale mukaintu wakwe,+ alimwi iwakali afwaafwi kutumbuka.+
6 Nobakacili kooko, cakasika ciindi cakuti atumbuke.
7 Aboobo wakatumbuka mwana musankwa, mutaanzi kuzyalwa,+ wakamuvwungaila muzisani akumulazika mucilido cabanyama+ nkaambo tiibakajana busena muŋanda yabeenzu.
8 Alimwi mucooko nciconya eeco kwakali beembezi ibakali musyokwe kabeembela butanga bwabo masiku.
9 Kabatayeeyeli, mungelo wa Jehova* wakaima kumbele lyabo, eelyo kwakaba mumuni mpobakabede kutondezya bulemu bwa Jehova,* aboobo bakayoowa kapati.
10 Pele mungelo wakabaambila kuti: “Mutayoowi, amubone! Ndamuletela makani mabotu aayoobakkomanisya kapati bantu boonse.
11 Nkaambo sunu mumunzi wa Davida,+ mwazyalilwa mufwutuli,+ nkokuti Kristo Mwami.+
12 Lino mboobu mbomuyoomuzyiba: Muyoojana mwana muvwanda kavwungaidwe muzisani alimwi kalede mucilido cabanyama.”
13 Ndilyonya kwakalibonya makamu-makamu aakujulu+ aayo aakaba antoomwe amungelo ooyu kabatembaula Leza kuti:
14 “Aalemekwe Leza kujulu lyamajulu alimwi anyika akube luumuno kubantu mbakkomanina.”
15 Aboobo bangelo nibakabasiya akujokela kujulu, beembezi bakatalika kwaambilana kuti: “Katuya ku Betelehemu lino aawa tukabone cintu eeci cacitika, eeco Jehova* ncaatuzyibya.”
16 Mpoonya bakaunka cakufwambaana eelyo bakamujana Mariya a Josefa amwana muvwanda kalede mucilido cabanyama.
17 Nobakabona boobo, bakaluula makani ngobakaambilwa kujatikizya mwana ooyu.
18 Alimwi boonse ibakamvwa bakagambwa kumakani ngobakabaambila beembezi,
19 pele Mariya wakaayobola makani aaya mumoyo wakwe, kayeeya ncaakali kwaamba.+
20 Kumane beembezi bakajokela kabatembaula akulemeka Leza akaambo kazintu zyoonse nzyobakamvwa akubona, kazili mbubonya mbobakaambilwa.
21 Nikwakainda mazuba aali lusele, nicakasika ciindi cakuti apalulwe,+ wakaulikwa zina lyakuti Jesu, izina mungelo ndyaakaamba katanamitwa.+
22 Alimwi nicakasika ciindi cakuti basalazyigwe kweelana a Mulawo wa Musa,+ bakaunka anguwe ku Jerusalemu kutegwa bakamwaabe kuli Jehova,*
23 kweelana ambokulembedwe mu Mulawo wa Jehova* kuti: “Mwana musankwa mutaanzi kuzyalwa weelede kwaabwa kuli Jehova.”*+
24 Mpoonya bakatuula cipaizyo kweelana acaambwa mu Mulawo wa Jehova* kuti: “Inziba zyobilo naa bana bankwilimba bobilo.”+
25 Lino amubone! Kwakali muntu mu Jerusalemu iwakali kutegwa Simeoni, ooyu muntu wakali mululami alimwi mukombi, iwakali kulindila kuumbulizyigwa kwa Israyeli+ alimwi wakalijisi muuya uusalala.
26 Alimwi Leza wakamuzyibya kwiinda mumuuya uusalala kuti, kunyina naakali kuyoofwa katanamubona Kristo wa Jehova.*
27 Kasololelwa amuuya, wakanjila mutempele, eelyo bazyali nobakaleta muvwanda Jesu kutegwa bamucitile kweelana aciyanza cilembedwe mu Mulawo,+
28 walo mwini wakamubweza mwana mumaanza akutembaula Leza akuti:
29 “O Mwami Singuzuzyoonse, komuleka lino muzike wako afwe muluumuno+ kweelana amajwi aako,
30 nkaambo meso aangu alibonena nzila yako yalufwutuko+
31 njookabamba kale iiboneka kubantu boonse,+
32 mumuni+ uumunika mumudima uuvwumbide bamasi+ alimwi uumunikila bantu bako ba Israyeli.”
33 Bausyi abanyina bakazumanana kugambwa kuzintu zyakali kwaambwa kujatikizya mwana.
34 Alimwi Simeoni wakabaleleka akwaambila Mariya banyina mwana kuti: “Bona! Ooyu mwana usalidwe kupa kuti bantu banji mu Israyeli bakawe+ akubuka,+ alimwi akuba citondezyo cakusampaula+
35 (inzya, yebo uyooyaswa panga lilamfwu),+ kutegwa nzyobayeeya mumyoyo bantu banji zikayubununwe.”
36 Lino kwakali Ana musinsimi mukaintu, mwana wa Fanuele, wamukowa wa Aseri. Ooyu mukaintu wakalicembeede alimwi wakakkala amulumi wakwe kwamyaka iili ciloba kuzwa nibakakwatana,*
37 kuzwa waawo wakaba mukamufwu, lino wakajisi myaka iili 84. Kunyina naakali kulovwa kutempele, wakali kubeleka mulimo uusetekene syikati amasiku, kuliimya kulya alimwi akupaila mipailo yakukombelezya.
38 Aciindi nciconya eeco wakaboola afwaafwi akutalika kulumba Leza, akwaamba zyamwana ooyu kuli boonse aabo ibakali kulindila lufwutuko lwa Jerusalemu.+
39 Aboobo nobakamanizya kucita zyoonse zyakali kuyandika mu Mulawo wa Jehova,*+ bakapiluka ku Galilaya kumunzi okwabo wa Nazareta.+
40 Eelyo mwana wakali kuyaabukomena akuba anguzu, busongo kabuyaabuvwula alimwi luse lwa Leza lwakazumanana alinguwe.+
41 Lino bazyali bakwe bakajisi cilengwa cakuunka ku Jerusalemu mwaka amwaka ku Pobwe Lyakwiindilila.+
42 Mpoonya naakaba amyaka iili 12, bakaunka kweelana acilengwa capobwe.+
43 Naakamana mazuba aapobwe eelyo nobakali kupiluka, mulombe Jesu wakacaala ku Jerusalemu pele bazyali bakwe tiibakazyiba kuti wacaala.
44 Kabayeeya kuti bakali kweenda limwi munkamu, bakeenda musinzo uutola buzuba boonse mpoonya bakatalika kumuyandaula akati kabasazinyina abeenzinyina.
45 Pele nobatakamujana, bakapiluka ku Jerusalemu akuyoomuyandaula cakulomya.
46 Kwiinde mazuba otatwe, bakamujana mutempele kakkede akati kabamayi kaswiilila akubabuzya mibuzyo.
47 Pele boonse aabo ibakali kumuswiilila bakali kwiile kulijata kumulomo akaambo kabusongo mbwaakajisi alimwi ambwaakali kwiingula.+
48 Lino bazyali bakwe nobakamubona bakagambwa kapati, eelyo banyina bakamubuzya kuti: “Mwanaangu, nkaambo nzi ncootucitila boobu? Mebo abauso twapenga kukuyandaula.”
49 Pele walo wakabaingula kuti: “Ino mwali kundiyandawida nzi? Sena tiimwalizyi kuti ndeelede kuba muŋanda ya Taata?”+
50 Pele tiibakamvwisya ncaakali kubaambila.
51 Mpoonya wakaunka ambabo akupiluka ku Nazareta, eelyo wakazumanana kubamvwida.+ Alimwi banyina bakaayobola makani oonse aaya mumoyo wabo.+
52 Eelyo Jesu wakali kuyaabukomena mubusongo aciimo, kayandwa kapati a Leza alimwi abantu.
Bupanduluzi buyungizyidwe
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Mu Chigiriki, “kuzwa kubunakalindu bwakwe.”
^ Amubone Makani Aayungizyidwe A5.
