Malaki 1:1-14
1 Ngaaya makani mapati:
Ndeeli jwi lya Jehova ndyaakaamba kuli Israyeli kwiinda muli Malaki:*
2 “Ndilamuyanda nywebo nobantu,”+ mbwaamba Jehova.
Pele nywebo mwabuzya kuti: “Ino watondezya buti kuti ulatuyanda?”
“Sena Esau tanaakali mwanookwabo Jakobo?”+ mbwaamba Jehova. “Pele Jakobo ndakamuyanda,
3 alimwi Esau ndakamusula;+ mpoonya malundu aakwe ndakaanyonyoona+ alwalo lukono lwakwe ndakalusiila bamwaaba bamunkanda.”+
4 “Nokuba kuti bana Edomu baamba kuti, ‘Twapwaigwa, pele tulapiluka akuyooyakulula matongo,’ mboobu mbwaamba Jehova wamakamu, ‘Ncobeni bayooyaka, pele mebo ndiyookolomona, eelyo bayakwiitwa kuti, “cilawo cabubi” akuti “bantu mbaasinganya Jehova mane kukabe kutamani.”+
5 Meso aanu ayoocibona eeci, eelyo muyakwaamba kuti: “Jehova alemekwe kapati mucilawo coonse ca Israyeli.”’”
6 “‘Mwana ulabalemeka bausyi,+ awalo mubelesi ulamulemeka simalelaakwe. Aboobo ikuti naa mebo ndendime bauso,+ ino buli kuli bulemu mbondeelede kupegwa?+ Alimwi ikuti naa mebo ndendime simalelaanu,* nkaambo nzi nconditayoowegwi?’* mbwaamba Jehova wamakamu kulindinywe nobapaizi nomusampaula zina lyangu.+
“‘Pele mwabuzya kuti: “Ino twalisampaula buti zina lyako?”’
7 “‘Kwiinda mukutuula zyakulya* zisofweede acipaililo cangu.’
“‘Lino nywebo mwabuzya kuti: “Ino mbuti mbotwakusofwaazya?”’
“‘Nkwiinda mukwaamba kuti: “Itebulu lya Jehova+ lileelede kusampaulwa.”
8 Iciindi nomuleta munyama moofwu kuti apaizyigwe, mwaamba kuti: “Taakwe cilubide pe aawa.” Alimwi nomuleta munyama mulema naa uucisidwe mwaamba kuti: “Taakwe cilubide pe aawa.”’”+
“Kosola kumutola kumweendelezi wako tubone. Sena uyookukkomanina naa kukutambula kabotu?” mbwaamba Jehova wamakamu.
9 “Lino, ndakomba amumukombelezye Leza, kutegwa atufwide luzyalo. Kuti maanza aanu kaapa zipaizyo zili boobu, sena kuli muntu akati kanu ngwatiitambule kabotu?” mbwaamba Jehova wamakamu.
10 “Alimwi ino nguni akati kanu uulisungwide kujala milyango*+ kakunyina kuyanda kuti abbadelwe? Nkaambo tamusoli nokuba kuyasya mulilo wacipaililo cangu kakunyina kubbadelwa.+ Aboobo tandimuyandi pe,” mbwaamba Jehova wamakamu, “azyalo zituuzyo zili zyoonse zizwa kumaanza aanu tandiziyandi pe.”+
11 “Nkaambo kuzwa kumapolelo aazuba kusikila nkolibbilila,* izina lyangu linoolemekwa akati kamasi.+ Mumasena oonse zipaizyo zinakuumpwa akuuntumuna busi, azyalo zituuzyo zinootuulilwa zina lyangu kazili cipego cisalala; nkaambo zina lyangu linoolemekwa akati kamasi,”+ mbwaamba Jehova wamakamu.
12 “Pele nywebo mulalisampaula zina lyangu*+ kwiinda mukwaamba kuti, ‘Itebulu lya Jehova lilisofweede, ayalo micelo yandilyo, icakulya cili aalindilyo cilasesemya.’+
13 Alimwi mwaamba kuti, ‘Cilaminya cintu eeci!’ alimwi mwacisesemwa,” mbwaamba Jehova wamakamu. “Muleta banyama bakubba, ibalema alimwi abaciswa. Inzya, muleta zintu eezyi kacili cipego! Sena ndeelede kucitambula kuzwa kujanza lyanu?”+ mbwaamba Jehova.
14 “Ulisinganizyidwe muntu mumpelenge, uujisi munyama mweenze uuli kabotu mubutanga bwakwe, pele uukonka akutuula munyama uujisi kampenda kuli Jehova. Nkaambo mebo ndi Mwami mupati,”+ mbwaamba Jehova wamakamu, “aboobo zina lyangu linooyoowegwa akati kamasi.”+
Bupanduluzi buyungizyidwe
^ Nkokwaamba kuti “Mutumwa Wangu.”
^ Naa “simalelo mupati.”
^ Naa “nconditalemekwi.”
^ Mu Chihebrayo, “zinkwa.”
^ Kuboneka kuti, milyango yatempele, kauli mukuli wakwe.
^ Naa “kuzwa kujwe kusikila kumbo.”
^ Naa ambweni, “mulandisampaula.”
