Marko 12:1-44
12 Mpoonya wakatalika kubaambila muzikozyanyo ulaamba: “Muntu umwi wakalima muunda wamisaansa+ akuuyakila lubaya, wakasya dindi lyakukandila misaansa akuyaka ngazi;+ mpoonya muunda wakausiya mumaanza aabalimi akuunka kucisi cimbi.+
2 Nocakasika ciindi cakutebula wakatuma muzike wakwe kubalimi kutegwa akamubwezele micelo iili mbwiibede yamumuunda wamisaansa kulimbabo.
3 Pele bakamujata, bamuuma akumutanda acinkwamaanza.
4 Alimwi wakatuma muzike aumbi, awalo ooyu bakamuuma amutwe akumusampaula.+
5 Mpoonya wakatuma umbi, ooyu bakamujaya, alimwi wakatuma abambi banji, bamwi bakabauma kakuli bamwi bakabajaya.
6 Limwi kumamanino wakasyaazya buyo mwana ngwayandisya+ ngwaakabatumina kayeeya kuti, ‘Bayoomulemeka mwanaangu.’
7 Pele balimi aabo bakalyaambauzya kuti, ‘Ooyu ngosikukona.+ Amuboole tumujaye, eelyo lukono lulaba lwesu.’
8 Aboobo bakamujata akumujaya akumusowela kunze aamuunda wamisaansa.+
9 Ino ncinzi mukamwini muunda wamisaansa ooyo ncayoocita? Uyooboola akujaya balimi aaba, eelyo muunda wamisaansa uyakuupa bambi.+
10 Sena tiimwakabala lugwalo oolu lwaamba kuti: ‘Ibbwe ndibakakaka bayaki lyaba bbwe liyandika kapati lyakukkona.*+
11 Ngu Jehova* wapa kuti cibe boobo, alimwi ncibotu kapati mumeso eesu’?”+
12 Bamvwe boobo bakali kuyanda kuti bamujate,* pele bakayoowa nkamu yabantu, nkaambo bakazyiba kuti wakali kwaamba mbabo mucikozyanyo eeci. Aboobo bakamusiya, bakaunka.+
13 Kumane bakamutumina bamwi ba Farisi abankamu ya Heroda kutegwa bamujanine kaambo kumajwi aakwe.+
14 Nibakasika aaba bakamwaambila kuti: “Omwiiyi, tulizyi kuti lyoonse waamba masimpe alimwi tolibotyi-botyi kumuntu uuli woonse, nkaambo tolangi ziimo zyabantu, pele uyiisya nzila ya Leza mukasimpe. Sena cilizumizyidwe* kutela mutelo kuli Kaisara naa pe?
15 Sena tutele naa tutateli?” Mbwaanga wakakuzyiba kuupaupa ameso kwabo, wakabaambila kuti: “Ino mundisunkila nzi? Amundipe dinari* tubone.”
16 Bakamuletela dinari lyomwe, eelyo wakababuzya kuti: “Ino cikozyanyo eeci alimwi azina eeli nzizyani?” Bakati: “Nzizya Kaisara.”
17 Jesu wakabaambila kuti: “Amupe Kaisara zintu zya Kaisara,+ pele zintu zya Leza amupe Leza.”+ Lino majwi ngaakaamba akabagambya.
18 Lino ba Saduki ibaamba kuti kunyina bubuke,+ bakaboola kuli Jesu akumubuzya kuti:+
19 “Omwiiyi, Musa wakatulembela kuti, ikuti munyina wamuntu umwi wafwa akusiya mukaintu pele tanaasiya mwana, imwanookwabo weelede kumubweza mukaintu ooyo akumuzyalila bana munyina.+
20 Kwakali babunyina bali ciloba. Wakusaanguna wakakwata, pele naakafwa tanaakasiya mwana.
21 Eelyo wabili wakamukwata, pele awalo wakafwa kakunyina kusiya mwana, awatatu ncimwi buyo.
22 Boonse bali ciloba kunyina naba omwe wakasiya mwana. Mpoonya awalo mukaintu wakafwa.
23 Mububuke, ino uyooba mukaintu wani? Nkaambo boonse ibali ciloba bakalimukwete.”
24 Jesu wakabaambila kuti: “Mulisweekede, nkaambo tamuzyi Magwalo naa nguzu zya Leza.+
25 Nkaambo babuka kuzwa kubafwu, baalumi tabakwati abalo bamakaintu tabakwatwi, pele bali mbuli bangelo kujulu.+
26 Pele kumakani aakuti bafwide bayoobuka, sena tiimwakabala mubbuku lya Musa mucibalo caamba citewo camamvwa, kuti Leza wakamwaambila kuti: ‘Ndime Leza wa Abrahamu a Leza wa Izaka a Leza wa Jakobo’?+
27 Tali Leza wabafwu, pele ngwabaumi. Mulisweekede kapati.”+
28 Umwi wabalembi iwakaliko akumvwa mbobakali kukazyanya, naakabona kuti wakabaingula kabotu wakamubuzya kuti: “Ino mulawo nzi mupati* kwiinda milawo yoonse?”+
29 Jesu wakaingula kuti: “Mupati ngwakuti, ‘Swiilila O Israyeli, Jehova* Leza wesu ngu Jehova* omwe buyo,
30 alimwi weelede kuyanda Jehova* Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.’+
31 Wabili ngwakuti, ‘Weelede kuyanda simukobonyoko mbubonya mbuli mboliyanda omwini.’+ Kunyina mulawo mupati uumbi wiinda yeeyi.”
32 Mulembi ooyu wakamwaambila kuti: “Mwiiyi, waamba kabotu, kweelana akasimpe, ‘Leza uli omwe buyo alimwi kunyina uumbi kunze lyakwe’;+
33 alimwi eeci cakuti muntu kamuyanda amoyo wakwe woonse, amaano aakwe oonse, anguzu zyakwe zyoonse alimwi akuyanda simukobonyina mbubonya mbuli mbwaliyanda mwini cilayandika kapati kwiinda zituuzyo zyuumpwa buumbulu azipaizyo zyoonse.”+
34 Lino Jesu naakabona kuti wakaamba cabusongo, wakamwaambila kuti: “Toli kulamfwu a Bwami bwa Leza.” Pele boonse bakayoowa kumubuzya mibuzyo iimbi.+
35 Pele Jesu naakazumanana kuyiisya mutempele, wakababuzya kuti: “Ino nkaambo nzi balembi ncobaamba kuti Kristo mwana wa Davida?+
36 Kwiinda mumuuya uusalala,+ Davida lwakwe wakati, ‘Jehova* wakaambila Mwami wangu kuti: “Kkala kujanza lyangu lyalulyo kusikila mane ndikabikke basinkondonyoko kunsi aamaulu aako.”’+
37 Davida lwakwe umwiita kuti Mwami, aboobo ino mbuti mbwakonzya kuba mwanaakwe?”+
Eelyo nkamu yabantu mpati yakali kumuswiilila cakukondwa.
38 Aboobo naakali kuyiisya wakati: “Amubacenjelele balembi ibayandisya kweendeenda kabasamide zisani zilamfwu alimwi bayanda kwaanzyigwa cabulemu kumisika+
39 alimwi bayandisya zyuuno zyakumbele* muzikombelo amasena aalemenede kucilalilo.+
40 Mbambabo ibasaala maanda* aabamukabafwu, alimwi balacita mambonwa* kwiinda mukupaila mipailo milamfwu. Aaba bayoopegwa cisubulo cipati.”
41 Mpoonya wakakkala munsi aazibikkilo zyamali+ akutalika kubona bantu mbobakali kubikka mali muzibikkilo zyamali, bavwubi banji bakali kubikka makkobili manji.+
42 Lino kwakaboola mukamufwu mucete iwakabikka tukkobili tobilo tujisi mpindu nsyoonto kapati.*+
43 Aboobo wakaita basikwiiya bakwe akubaambila kuti: “Ncobeni ndimwaambila kuti mukamufwu ooyu mucete wabikka mali manji kwiinda baabo boonse babikka mali muzibikkilo zyamali.+
44 Nkaambo boonse babikka kuzwa kuli yaayo aaindilide, pele walo abucete bwakwe, wabikka zyoonse nzyaajisi, zyoonse nzyaayelede kuponenawo.”+
Bupanduluzi buyungizyidwe
^ Mu Chigiriki, “mutwe wakukkona.”
^ Amubone Makani Aayungizyidwe A5.
^ Naa “bamwaange.”
^ Naa “cililuzi.”
^ Amubone Makani Aayungizyidwe B14.
^ Naa “uuyandika kapati.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “zibotu kapati.”
^ Naa “lubono.”
^ Naa “balaupaupa ameso.”
^ Mu Chigiriki, “tulepita tobilo, itweelene akkwadirani yomwe.” Amubone Makani Aayungizyidwe B14.
