Marko 15:1-47
15 Mbobwakaceda buyo basilutwe babapaizi antoomwe abaalu abalembi, nkokuti Nkuta Mpati Yaba Juda yoonse, bakalivwiya-vwiya akumwaanga Jesu bamane bakamutola akumusiya mumaanza aa Pilato.+
2 Aboobo Pilato wakamubuzya kuti: “Sena uli Mwami waba Juda?”+ Wakamwiingula kuti: “Yebo omwini waamba.”+
3 Pele basilutwe babapaizi bakali kumutamikizya twaambo tunji.
4 Lino Pilato wakatalika kumubuzya alimwi kuti: “Sena tojisi bwiinguzi?+ Bona twaambo tunji ntobakutamikizya.”+
5 Pele Jesu tanaakaingula kabili cakuti Pilato wakagambwa kapati.+
6 Kufwumbwa ciindi nokwakali kuba Pobwe Lyakwiindilila, wakali kubaangunwida mwaange ngobakali kuyanda.+
7 Aciindi eeco, imuntu uutegwa Baraba wakali muntolongo abeenzinyina basikuzangila mfwulumende, aabo mubuzangi bwabo ibakajaya muntu.
8 Aboobo nkamu yabantu yakaboola akutalika kulomba Pilato kuti abacitile kweelana ambwaakali kubacitila lyoonse.
9 Wakabaingula kwiinda mukubabuzya kuti: “Sena muyanda kuti ndimwaangunwide Mwami waba Juda?”+
10 Nkaambo Pilato wakalizyi kuti basilutwe babapaizi bakamwaaba akaambo kamunyono.+
11 Pele basilutwe babapaizi bakayunga nkamu yabantu kuti abaangunwide Baraba muciindi ca Jesu.+
12 Alimwi Pilato wakabaingula kwiinda mukubabuzya kuti: “Ino ndimucite buti ooyu ngomwaamba kuti Mwami waba Juda?”+
13 Alimwi bakoongolola kuti: “Komugagaila aacisamu!”*+
14 Pele Pilato wakababuzya kuti: “Nkaambo nzi? Ino ncibi nzi ncaakacita?” Bakazumanana koongololesya kabati: “Komugagaila aacisamu!”*+
15 Aboobo Pilato, kayanda kukkomanisya bantu, wakabaangunwida Baraba; alimwi amane kumukwibbauzya Jesu,+ wakabapa kutegwa akajaigwe aacisamu.+
16 Lino basikalumamba bakamutola mulubuwa lwaŋanda yamweendelezi, eelyo bakaita impi yoonse yabasikalumamba.+
17 Eelyo bakamusamika cisani cacisombo akupanga musini wamamvwa akumusamika;
18 mpoonya bakatalika kumwaambila kuti: “Wabonwa, yebo O Mwami waba Juda!”+
19 Kunze lyaboobo, bakali kumuuma tete amutwe akumuswida mate, alimwi bakali kumufwugamina.*
20 Mpoonya, nobakamana kumufwubaazya, bakamusamununa cisani eeco cacisombo akumusamika zisani zyakwe zyaatala. Kumane bakamutola kuti akagagailwe aacisamu.+
21 Alimwi bakasinikizya simweenda nzila uutegwa Simoni muna Kurene, iwakali kuzwida musyokwe, bausyi Alekizanda a Rufo, kuti anyamune cisamu cakupenzyezya* ca Jesu.+
22 Aboobo bakamuleta kubusena butegwa Gologota, ibbala lyaamba kuti “Busena bwa Cipapa Camutwe”+ ikuti lyasandululwa.
23 Ooko bakasoleka kumupa waini uuvweledwe musamu uukola uutegwa muro,+ pele wakakaka.
24 Bakamugagaila acisamu akwaabana zisani zyakwe zyaatala kwiinda mukuuma cisolo kutegwa babone ncatiibweze umwi aumwi.+
25 Lino cakali ciindi cawoola lyatatu,* alimwi bakamugagaila aacisamu.
26 Lino bakalemba mabala aamba mulandu ngobakamupa aakuti: “Mwami Waba Juda.”+
27 Kunze lyaboobo, mumabali aakwe bakabikka zigwebenga zyobilo aazisamu, cimwi kululyo lwakwe acimwi kulumwensyi lwakwe.+
28 *—
29 Alimwi aabo ibakali kwiinda bakali kumusampaula akugunya-gunya mitwe+ kabaamba kuti: “Ha! Yebo ookonzya kumwaya tempele akuliyakulula mumazuba otatwe,+
30 kolifwutula we kwiinda mukuseluka acisamu cakupenzyezya.”*
31 Mbubonya buyo, abalo basilutwe babapaizi antoomwe abalembi bakali kumufwubaazya kabati: “Bamwi wakali kubafwutula; pele walo mwini takonzyi kulifwutula!+
32 Aaseluke acisamu cakupenzyezya* ooyo Kristo, Mwami wa Israyeli kutegwa tubone akusyoma.”+ Nobaba baabo mbocakali limwi azisamu bakali kumusampaula.+
33 Nocakaba ciindi cawoola lyacisambomwe,* kwakaba mudima mucisi coonse kusikila kuwoola lyafwuka.*+
34 Eelyo muwoola lyafwuka, Jesu wakoongolola kuti: “Eli, Eli, lama sabakitani?” Eeci casandululwa caamba kuti: “Leza wangu, Leza wangu, ino wandilekelezyela nzi?”+
35 Mpoonya bamwi babaabo ibakaimvwi munsi-munsi nobakamvwa boobo, bakatalika kwaamba kuti: “Amumvwe! Wiita Elija.”
36 Mpoonya umwi wakabalika akunyika nsinsa muwaini uulula, waibikka kutete akumupa kuti anywe+ kati: “Amumuleke! Tulabona naa Elija ulaboola kuzoomuselusya.”
37 Pele Jesu wakoongolola kumane wakafwa.+
38 Eelyo mulembo wamutempele+ wakayauka akati kuzwa atala mane kusikila ansi.+
39 Lino silutwe wabasikalumamba iwakaimvwi munsi lyakwe naakabona cakacitika naakafwa, wakati: “Ncobeni muntu ooyu wali Mwana wa Leza.”+
40 Alimwi kwakali bamakaintu ibakali kulangilila alaale, akati kabo kwakali Mariya Magadalene a Mariya banyina Jakobo Muniini a Jose alimwi a Salome+
41 ibakali kumutobela, alimwi aabo ibakali kumukutaukila+ naakali ku Galilaya, alimwi abamakaintu bambi banji mbocakaboola limwi ku Jerusalemu.
42 Lino mbwaanga zuba lyakali afwaafwi kubbila alimwi bwakali buzuba bwa Kulibambila, nkokuti buzuba kaitanatalika Sabata,
43 kwakasika Josefa waku Aremateya umwi wa Nkuta Mpati Yaba Juda uulemekwa, ooyu awalo wakali kulindila Bwami bwa Leza. Wakalisungula kuunka kuli Pilato akuyoolomba mubili wa Jesu.+
44 Pele Pilato tanaakali kuyeeya kuti inga kafwide kale, aboobo wakaita silutwe wabasikalumamba akumubuzya naa Jesu wakalifwide kale.
45 Aboobo naakazyiba kuzwa kuli silutwe wabasikalumamba, wakamuzumizya Josefa kuubweza mubili.
46 Kumane Josefa wakaula mulembo mubotu akumwaangula, mpoonya wakamuzambaila mumulembo ooyo akumuzikka mucuumbwe+ ncobakasyide mumwala; amane wakakunkulisya bbwe akusinka kumulyango wacuumbwe.+
47 Pele Mariya Magadalene alimwi a Mariya banyina Jose tiibakaleka kulanga aawo mpaakazikkilwa.+
Bupanduluzi buyungizyidwe
^ Naa “Komujaya aacisamu!”
^ Naa “Komujaya aacisamu!”
^ Naa “kumukotamina.”
^ Amubone Bupanduluzi Bwamabala.
^ Nkokuti, cakuma 9 koloko yamafwumofwumo.
^ Amubone Makani Aayungizyidwe A3.
^ Amubone Bupanduluzi Bwamabala.
^ Amubone Bupanduluzi Bwamabala.
^ Nkokuti, cakuma 3 koloko yakumazuba.
^ Nkokuti, cakuma 12 koloko.
