Marko 3:1-35
3 Alimwi wakanjila mucikombelo, oomo mwakali mwaalumi umwi wakapuutide* janza.+
2 Aboobo bakali kumulangisisya kutegwa babone naa wakali kunoomuponya mwaalumi ooyo mu Sabata kutegwa bamupe mulandu.
3 Mpoonya wakaambila mwaalumi uupuutide* janza kuti: “Nyamuka, uboole akati.”
4 Kumane wakababuzya kuti: “Ncinzi cizumizyidwe kucita mu Sabata, sena nkucita cintu cibotu naa cintu cibi, ikufwutula buumi naa kujaya?”+ Pele bakaumuna buyo.
5 Amane kubalanga cabukali, kauside kapati akaambo kakubija kwamyoyo yabo,+ wakaambila mwaalumi ooyo kuti: “Kovwungulula janza lyako.” Mpoonya wakalivwungulula, eelyo janza lyakwe lyakaba kabotu.
6 Cakutasowa ciindi ba Farisi bakazwa anze mpoonya bakalibunga-bunga abacipani cabasikutobela Heroda+ akutalika kupangana kuti bamujaye.
7 Pele Jesu wakaunka kulwizi antoomwe abasikwiiya bakwe, alimwi nkamu mpati yabantu bazwa ku Galilaya aku Judaya yakamutobela.+
8 Alimwi akuzwa ku Jerusalemu aku Idumiya amutala lya Jordano amasena aayengelede Turo a Sidoni, nkamu mpati yabantu noyakamvwa zintu zinji nzyaakali kucita, yakaboola kulinguwe.
9 Mpoonya wakaambila basikwiiya bakwe kuti bamuletele bwato busyoonto kuti akkalile mumo kutegwa nkamu yabantu itamusyanikizyi.
10 Akaambo kakuti wakaponya bantu banji, boonse aabo ibakajisi malwazi mapati bakali kumubumba kutegwa bamujate.+
11 Nobaba bantu bakanjidwe myuuya iisofweede,+ kufwumbwa kuti bamubona, bakali kuwa muzinga kumbele lyakwe akoongolola kuti: “Uli Mwana wa Leza.”+
12 Pele ziindi zinji wakali kwiilailila cakusinizya kuti itamuzyibyi kubantu.+
13 Wakatanta acilundu akwiita baabo mbaakasala,+ mpoonya bakaunka kulinguwe.+
14 Aboobo wakapanga* kabunga kabantu bali 12, aabo alimwi mbaakaita kuti baapostolo, mbaakali kunakweenda limwi alimwi mbaakali kuyootuma kukambauka
15 akubapa nguzu zyakutanda madaimona.+
16 Lino mukabunga aaka nkaakapanga* kabantu bali 12 + kwakali Simoni, ooyo alimwi ngwaakapa zina lyakuti Petro,+
17 Jakobo mwana wa Zebedayo, alimwi a Johane imunyina Jakobo (alimwi aaba wakabapa zina lyakuti Boanerge, nkokuti “Bana ba Muzumo”),+
18 Andreya, Filipo, Bartolomayo, Matayo, Tomasi, Jakobo mwana wa Alifayo, Tadayo, Simoni mu Kanana,*
19 alimwi a Judasi Isikariote, ooyo iwakamwaaba.
Mpoonya wakanjila muŋanda,
20 eelyo alimwi nkamu yabantu yakabungana, cakunga bakaalilwa akulya.
21 Pele basazinyina nobakamvwa makani aaya, bakaunka kuti bakamujate, nkaambo bakali kwaamba kuti: “Wasondoka.”+
22 Abalo balembi ibakazwa ku Jerusalemu bakali kwaamba kuti: “Unjidwe Belezebule* alimwi utanda madaimona kwiinda munguzu zyamweendelezi wamadaimona.”+
23 Aboobo naakabaita, wakabaambila kwiinda mukubelesya zikozyanyo kuti: “Ino mbuti Saatani mbwakonzya kutanda Saatani?
24 Ikuti bwami bwaandaana, bwami oobo tabukonzyi kwiima pe;+
25 alimwi kuti ŋanda yaandaana, ŋanda eeyo tiikonzyi kwiima.
26 Alimwi ikuti Saatani walibukila akwaandaana, takonzyi kwiima, pele inga wawa.
27 Mubwini, kunyina muntu uukonzya kunjila muŋanda yamuntu singuzu akubba zintu zyakwe ccita kuti wasaanguna kumwaanga muntu ooyo singuzu. Lilikke buyo naa wacita boobo nakonzya kusaala ŋanda yakwe.
28 Ncobeni ndimwaambila kuti bantu bayoolekelelwa zintu zyoonse, kufwumbwa naa nzibi zili buti nzyobacita amasampu aali buti ngobaamba.
29 Pele kufwumbwa uusampaula muuya uusalala takalekelelwi mane kukabe kutamani,+ pele ulijisi mulandu wacibi citamani.”+
30 Jesu wakaamba boobu akaambo kakuti bakali kumwaamba kuti: “Ujisi muuya uusofweede.”+
31 Lino banyina abanabokwabo+ bakaboola, eelyo kabaimvwi anze, bakatuma muntu kuti amwiite.+
32 Lino mbwaanga nkamu yabantu yakalimuvwoomanide, bakamwaambila kuti: “Bona! Banyoko abanabokwanu bali anze, balakuyanda.”+
33 Pele wakabaingula kuti: “Ino mbaani baama abakwesu?”
34 Mpoonya wakalanga baabo ibakamuvwoomanide akwaamba kuti: “Amubone, aaba mbabaama abakwesu!+
35 Kufwumbwa uucita kuyanda kwa Leza, ooyo ngomukwesu, ngomucizyi wangu alimwi mbabaama.”+
Bupanduluzi buyungizyidwe
^ Naa “wakalebukide.”
^ Naa “uulebukide.”
^ Naa “wakasala.”
^ Naa “nkaakasala.”
^ Naa “musungu.”
^ Izina libelesyegwa kwaamba Saatani.
