Marko 5:1-43
5 Mpoonya bakasika mutala lyalwizi mucooko caba Gerasa.+
2 Lino Jesu mbwaakazwida buyo mubwato, wakaswaanganya muntu uunjidwe muuya uusofweede kazwa kunamaumbwe.
3 Wakali kukkala kunamaumbwe, alimwi kusikila kuciindi eeco, kunyina naba omwe wakali kukonzya kumwaanga, noziba nketani tiizyakali kubeleka.
4 Ziindi zinji wakali kwaangwa nsimbi anketani, pele nketani wakali kuzidunsaula azyalo nsimbi wakali kuzityolaula; alimwi taakwe wakali kukonzya kumujata.
5 Alimwi lyoonse, masiku asyikati wakali koongolola kunamaumbwe amumalundu, alimwi wakali kulinengaula amabwe.
6 Pele naakamubona Jesu kacili alamfwu, wakamubalikila akuyoomufwugamina.+
7 Mpoonya wakoongolola ajwi pati ategwa: “Ino ndijisi kaambo nzi anduwe Jesu, O Mwana wa Leza Mupatikampatila? Kokonka muzina lya Leza kuti tokoondipenzya.”+
8 Nkaambo Jesu wakali kuwaambila kuti: “Kozwa mumuntu ooyu, yebo omuuya uusofweede.”+
9 Kumane Jesu wakamubuzya kuti: “Nduwe ni zina?” Wakaingula kuti: “Ndime Makamu,* nkaambo tuli banji kapati.”
10 Alimwi wakazumanana kumukombelezya Jesu kuti ataitandi myuuya kuzwa mucisi.+
11 Lino kwakali tanga pati lyangulube+ izyakali kucela amulundu.+
12 Aboobo myuuya yakamukombelezya kuti: “Kotutandila mungulube kutegwa tunjile mulinzizyo.”
13 Wakaizumizya kunjila. Mpoonya myuuya iisofweede yakazwa akunjila mungulube, eelyo tanga lyangulube zibalilwa ku 2,000, lyakabalikila mujeleele akusotokela mulwizi, eelyo zyoonse zyakanyikila mulwizi akufwa.
14 Pele beembezi banzizyo bakatija akuyooluula makani aaya mumunzi amutunzi, eelyo bantu bakaboola kuti babone cakacitika.+
15 Aboobo bakaboola kuli Jesu, eelyo bakabona muntu iwakanjidwe madaimona, ooyo iwakajisi Makamu* ulikkede kasamide alimwi kabateme, eelyo bakayoowa kapati.
16 Lino aabo ibakalibonena bakabaambila eeci mbocakacitika kumuntu ooyo wakanjidwe madaimona alimwi amakani aangulube.
17 Aboobo bakatalika kumukombelezya Jesu kuti azwe mucooko cabo.+
18 Lino naakali kutanta bwato, muntu ooyo wakanjidwe madaimona wakamukombelezya kuti aunke anguwe.+
19 Nokuba boobo, tanaakamuzumizya pe, pele wakamwaambila kuti: “Koya kumunzi kuli bamukwasyi wako, ukabaambile zintu zyoonse Jehova* nzyaakucitila ambwaakufwida luzyalo.”
20 Muntu ooyu wakaunka akutalika kwaambilizya mu Dekapole* zintu zyoonse Jesu nzyaakamucitila, eelyo bantu boonse bakagambwa.
21 Lino Jesu naakazabuka alimwi mutala limwi kubelesya bwato, kwakamubunganina nkamu mpati yabantu, alimwi wakali kumbali aalwizi.+
22 Lino umwi wabeendelezi bacikombelo wazina lya Jairo wakaboola, eelyo naakamubona Jesu, wakamufwugamina.+
23 Wakamukombelezya ziindi zinji kati: “Mwanaangu musimbi ufwumba bulamfwu.* Ndakomba koboola ubikke maanza aako+ alinguwe kuti ayumye atafwi.”
24 Mpoonya Jesu wakaunka anguwe, alimwi nkamu mpati yabantu yakali kumuccilila akumusyaanikizya.
25 Lino kwakali mukaintu iwakali kuciswa kalobola+ kwamyaka iili 12.+
26 Wakapenga kapati* mumaanza aabasilisi banji alimwi wakasowa lubono lwakwe loonse, nokuba boobo tanaakapona pe, pele bulwazi bwakaindila.
27 Naakamvwa mpuwo ya Jesu, wakaboola munkamu kusyule lyakwe akujata cisani cakwe caatala,+
28 nkaambo wakali kulyaambauzya kuti: “Kuti ndijate buyo cisani cakwe caatala ndilapona.”+
29 Mpoonya aawo bulowa bwakali kuzwa bwakaleka, alimwi wakalimvwa kuti waponesyegwa kubulwazi bwakamukatazyide kapati.
30 Mpoonya aawo Jesu wakalimvwa kuti nguzu+ zyakazwa mulinguwe, eelyo wakaceba munkamu akubuzya kuti: “Ino nguni wajata cisani cangu caatala?”+
31 Pele basikwiiya bakwe bakamwaambila kuti: “Uliibwene nkamu yabantu eeyi mboikusyaanikizya, sena inga wabuzya kuti, ‘Nguni wandijata?’”
32 Pele, wakali kulanga-langa kutegwa abone yooyo wakamujata.
33 Mpoonya mukaintu ooyu kayoowede alimwi kakankama, kazyi cakamucitikila, wakaboola akufwugama kumbele lyakwe akumwaambila makani oonse mbwaabede.
34 Jesu wakamwaambila kuti: “Mwanaangu, lusyomo lwako lwakuponya. Koya muluumuno,+ alimwi utakaciswi kabili kubulwazi oobu ibwali kukupenzya.”+
35 Naakacili kwaambaula, bantu bamwi kuzwa kuŋanda yamweendelezi wacikombelo bakaboola akwaamba kuti: “Mwanaako musimbi wafwa kale! Nkaambo nzi ncocimukatazya Mwiiyi?”+
36 Pele Jesu wakabamvwa nobakali kwaambaula, eelyo wakaambila mweendelezi wacikombelo kuti: “Utayoowi pe,* kosyoma buyo.”+
37 Lino tanaakazumizya muntu uuli woonse kumutobela ccita buyo Petro, Jakobo alimwi a Johane imunyina Jakobo.+
38 Aboobo bakasika kuŋanda yamweendelezi wacikombelo, mpoonya wakabona bantu bayobeka alimwi abaabo bakali kulila akoomoka.+
39 Naakanjila muŋanda, wakababuzya kuti: “Nkaambo nzi ncomulila akuyobeka boobu? Ooyu mwana tafwide pe, pele uloona.”+
40 Aboobo bakatalika kumuseka. Pele naakabatandila anze boonse, wakabweza bausyi mwana abanyina antoomwe abaabo mbaakali limwi, akunjila ooko kwakali mwana.
41 Kumane wakajata janza lyamwana akumwaambila kuti: “Talitha kumi,” calo icaamba kuti: “Musimbi, ndikwaambila kuti, buka!”+
42 Mpoonya aawo mwana musimbi wakabuka akutalika kweenda. (Musimbi ooyu wakajisi myaka iili 12.) Eelyo babone buyo boobo, bakakkomana kapati.
43 Pele wakabalailila cakwiinduluka-induluka* kuti+ kutabi muntu naba omwe uuzyiba makani aaya, mpoonya Jesu wakaamba kuti musimbi ooyo apegwe cakulya.
Bupanduluzi buyungizyidwe
^ Mu Chigiriki, “Legioni.”
^ Mu Chigiriki, “Legioni.”
^ Amubone Makani Aayungizyidwe A5.
^ Naa “Cooko Caminzi Iili Kkumi.”
^ Naa “uyanda kufwa.”
^ Naa “Wakacisizyigwa kapati.”
^ Naa “Leka kuyoowa.”
^ Naa “wakabalailila cakusinizya.”
