Marko 9:1-50
-
Jesu wasanduka (1-13)
-
Mwana musankwa uunjidwe daimona waponesyegwa (14-29)
-
Zintu zyoonse zilakonzyeka kumuntu uujisi lusyomo (23)
-
-
Lufwu lwa Jesu lwasinsimwa alimwi (30-32)
-
Basikwiiya bakazyanya kujatikizya mupati (33-37)
-
Kufwumbwa uutatulwani nguwesu (38-41)
-
Zilebyo (42-48)
-
Amube amunyo mubuumi bwanu” (49, 50)
9 Kunze lyaboobo, wakabaambila kuti: “Ncobeni ndimwaambila kuti nkobali bamwi ibaimvwi aano ibatakafwi kusikila bakasaangune kubona Bwami bwa Leza kabusikide anguzu.”+
2 Nokwakainda mazuba aali cisambomwe, Jesu wakabweza Petro, Jakobo alimwi a Johane akubatola atala aacilundu cilamfwu kabali balikke. Mpoonya wakasanduka kabalangilila;+
3 zisani zyakwe zyaatala zyakamweka, zyakatuba buu kwiinda sikuwasya zisani uuli woonse waansi aano mbwakonzya kuzitubya.
4 Alimwi Elija a Musa bakalibonya kulimbabo, alimwi aaba bakali kubandika a Jesu.
5 Mpoonya Petro wakaambila Jesu kuti: “Rabbi, ncibotu kuti tukkale aano. Aboobo atubikke matente otatwe, lyako, lya Musa alya Elija.”
6 Mubwini tanaakazyi ncaakeelede kucita, nkaambo bakaliyoowede kapati.
7 Mpoonya kwakaba kkumbi lyakabavwumbilila, alimwi mukkumbi mwakamvwugwa jwi+ ilyakati: “Ooyu Mwanaangu ngweyandisya.+ Amumuswiilile.”+
8 Mpoonya aawo bakalanga ooku akooku akujana kuti taakwe ngobakacili limwi ccita buyo Jesu.
9 Lino nobakali kuselemuka kuzwa acilundu, wakabalailila kuti batasoli kwaambila muntu naba omwe ncibabona+ kusikila Mwanaamuntu akabusyigwe kubafwu.+
10 Makani aaya bakaayobola mumoyo,* pele bakabandika mulicabo ncokwakali kwaamba ooku kubuka kubafwu.
11 Aboobo bakatalika kumubuzya kuti: “Nkaambo nzi balembi ncobaamba kuti Elija+ uleelede kusaanguna kuboola?”+
12 Wakabaambila kuti: “Elija ulasaanguna kuboola akubambulula zintu zyoonse;+ pele ino eeci ceendelana buti aceeco cilembedwe kujatikizya Mwanaamuntu kuti weelede kwiinda mumapenzi manji+ akunyansyigwa?+
13 Pele ndimwaambila kuti, Elija+ wakaboola kale alimwi bakamucita kufwumbwa ncibakali kuyanda, mbuli mbokulembedwe kujatikizya nguwe.”+
14 Lino nobakasika kuli basikwiiya bambi, bakabona nkamu mpati yabantu iyakabazingulukide, alimwi kwakali abalembi ibakali kukazyanya ambabo.+
15 Pele bantu boonse munkamu mbobakamubonena buyo, bakagambwa kapati, mpoonya bakamubalikila kuti bamwaanzye.
16 Eelyo wakababuzya kuti: “Ncinzi ncomukazyanya ambabo?”
17 Lino umwi munkamu wakamwiingula kuti: “Mwiiyi, ndaletede mwanaangu musankwa nkaambo unjidwe muuya uumulesya kwaambaula.+
18 Kufwumbwa mpuwamujatila, ulamuusya ansi, alimwi uzwa ccovwu kumulomo akuluma ntwino akubula nguzu. Ndalombede basikwiiya bako kuti bautande, pele baalilwa.”
19 Aboobo wakabaambila kuti: “Nywebo nozyalani linyina lusyomo,+ ino ndilakkala andinywe kwaciindi cilamfwu buti? Ino ndimukkazikile moyo kwaciindi cilamfwu buti? Amumulete kuno kulindime.”+
20 Aboobo bakamuleta kulinguwe musankwa ooyo, pele mbowakamubonena buyo Jesu, muuya ooyo wakamusuntula mwana. Naakawa ansi wakatalika kwaalabana, akuzwa ccovwu kumulomo.
21 Mpoonya Jesu wakabuzya bausyi kuti: “Ino eeci cakamutalika lili?” Bakaingula kuti: “Kuzwa naakacili muniini,
22 alimwi ziindi zinji umusuntwida mumulilo amumaanzi kutegwa umunyonyoone. Pele kuti kokonzya kucita cintu cili coonse, kotufwida luzyalo, utugwasye.”
23 Jesu wakamwaambila kuti: “Aayo majwi aakuti, ‘Kuti kokonzya’! Langa, zintu zyoonse zilakonzyeka kumuntu uulaalusyomo.”+
24 Mpoonya aawo bausyi bamwana bakoongolola balaamba: “Ndijisi lusyomo! Kondigwasya kuba alusyomo luyumu!”+
25 Lino Jesu abone kuti nkamu yabantu yakali kuguumukila kulimbabo, wakaukalalila muuya ooyo uusofweede kati: “Iwe omuuya syaataambi alimwi omusinke matwi, ndakulailila kuti, kozwa mulinguwe alimwi utakamunjili kabili!”+
26 Nowakamana kumoongolozya akumusuntusya mwana ziindi zinji, imuuya ooyo wakazwa, mpoonya mwana wakaba mbuli kuti ulifwide cakunga bantu banji bakali kwaamba kuti: “Wafwa!”
27 Pele Jesu wakamujata kujanza akumwiimika, eelyo wakaimikila.
28 Aboobo naakanjila muŋanda, basikwiiya bakwe bakamubuzya kumbali kuti: “Ino nkaambo nzi swebo ncotwaalilwa kuutanda?”+
29 Wakabaingula kuti: “Musyobo ooyu tuukonzyi kuzwa ccita buyo kwiinda mumupailo.”
30 Kumane bakazwa ooko akwiinda mu Galilaya, pele tanaakali kuyanda kuti muntu uuli woonse azyibe.
31 Wakali kuyiisya basikwiiya bakwe akubaambila kuti: “Mwanaamuntu uyakwaabwa mumaanza aabantu, eelyo bayoomujaya,+ pele nokuba kuti akajaigwe, uyoobuka kwaakwiinda mazuba otatwe.”+
32 Pele tiibakacimvwisya ncaakali kwaamba, alimwi bakayoowa kumubuzya.
33 Lino bakasika ku Kapernauma. Naakali muŋanda wakababuzya kuti: “Ino ncinzi ncomwali kukazyanya munzila?”+
34 Bakaile kuumuna, nkaambo munzila bakali kukazyanya kujatikizya wakali mupati akati kabo.
35 Aboobo wakakkala ansi akubaita bali Kkumi Ababili akubaambila kuti: “Ikuti muntu kayanda kuba wakusaanguna, weelede kuba wamamanino kuli boonse alimwi mubelesi waboonse.”+
36 Kumane wakabweza mwana musyoonto akumwiimika akati kabo; mpoonya wakamukumbata akubaambila kuti:
37 “Kufwumbwa uutambula mwana musyoonto+ mbuli yooyu muzina lyangu, ulanditambula andime; alimwi kufwumbwa ooyo uunditambula, tatambuli buyo ndime, pele ulamutambula ayooyo wakandituma.”+
38 Johane wakamwaambila kuti: “Omwiiyi, twakabona muntu umwi katanda madaimona kwiinda mukubelesya zina lyako, alimwi twakasola kumukasya, nkaambo tanaakali kweenda andiswe.”+
39 Pele Jesu wakati: “Mutasoli kumukasya, nkaambo kunyina muntu uucita milimo mipati muzina lyangu uukonzya kutalika kundisampaula ndilyonya.
40 Nkaambo kufwumbwa muntu uutatulwani uli kulubazu lwesu.+
41 Alimwi kufwumbwa uumupa nkapu yamaanzi kuti munywe akaambo kakuti muli bokwa Kristo,+ ncobeni ndimwaambila kuti, kunyina nayoosweekelwa bulumbu bwakwe.+
42 Pele kufwumbwa uulebya umwi wabasyoonto aaba ibasyoma, inga cainda kubota ikuti munsingo waangililwa ziyo lizingulusyigwa ambongolo akuwaalwa mulwizi.+
43 “Ikuti janza lyako kalikulebya, kolikosola. Cilainda kubota kuti ukanjile mubuumi kokosokede janza kwiinda kunjila amaanza obilo mu Gehena,* mumulilo uutakonzyi kuzimwa.+
44 *—
45 Alimwi ikuti kuulu kwako kakukulebya, kokukosola. Cilainda kubota kuti ukanjile mubuumi kolemene kwiinda kuwaalwa mu Gehena* kojisi maulu obilo.+
46 *—
47 Alimwi ikuti liso lyako kalikulebya, kolisowa.+ Cilainda kubota kuti ukanjile mu Bwami bwa Leza acimbolyo kwiinda kuwaalwa mu Gehena*+ kojisi meso obilo,
48 oomo mvwunyu mozitafwi alimwi amulilo moutazimwi.+
49 “Nkaambo umwi aumwi uyoolungwa munyo wamulilo.+
50 Munyo mubotu, pele ikuti munyo wasampuka, ino inga mwaucita buti kuti utalike kulula alimwi?+ Amube amunyo mubuumi bwanu+ akuba aluumuno akati kanu.”+
Bupanduluzi buyungizyidwe
^ Naa “Kunyina muntu ngobakaambila makani aaya.”
^ Amubone Bupanduluzi Bwamabala.
^ Amubone Makani Aayungizyidwe A3.
^ Amubone Bupanduluzi Bwamabala.
^ Amubone Makani Aayungizyidwe A3.
^ Amubone Bupanduluzi Bwamabala.
