Matayo 11:1-30
11 Ciindi Jesu naakamana kubapa malailile basikwiiya bakwe bali 12, wakazwa ooko akuunka kuyooyiisya akukambauka muminzi yabo.+
2 Pele Johane kali muntolongo+ naakamvwa milimo ya Kristo, wakatuma basikwiiya bakwe+
3 kuyoomubuzya kuti: “Sena ndonduwe ooyo uuboola naa tweelede kulangila uumbi?”+
4 Jesu wakabaingula kuti: “Kamuya mukamulwiide Johane nzyomumvwide anzyomubwene, mukaambe kuti:+
5 Boofwu lino balabona+ alimwi, balema baleenda, basicinsenda+ balasalazyigwa, basinkematwi balamvwa, bafwide balabusyigwa, abalo bacete baambilwa makani mabotu.+
6 Ulikkomene ooyo uutajani cilebyo mulindime.”+
7 Basikwiiya ba Johane nobakali kupiluka, Jesu wakatalika kwaambila makamu aabantu kujatikizya Johane kuti: “Ino mwakaunkide kuyoobona nzi munkanda?+ Sena nditete liyuunwa amuwo?+
8 Ino kayi, ncinzi ncomwakaunkide kuyoobona? Sena muntu uusamide zisani ziteteete?* Aabo basama zisani ziteteete bali mumaanda aabami.
9 Mubwini, ino mwakaunkila nzi? Sena nkuyoobona musinsimi? Inzya, alimwi ndimwaambila kuti mupati kwiinda musinsimi.+
10 Ooyu ngonguwe uulembedwe mumajwi aakuti: ‘Bona! Mebo ndatuma mutumwa wangu kumbele lyako,* ooyo uuyookubambila nzila!’+
11 Ncobeni ndimwaambila kuti, akati kabaabo ibakazyalwa kubakaintu, takunabwenwe mupati kwiinda Johane Mubbapatizi, pele muntu muniini mu Bwami bwakujulu mupati kwiinda nguwe.+
12 Kuzwa kumazuba aa Johane Mubbapatizi kusikila sunu, Bwami bwakujulu nimbaakani bantu njobayanda kusika, eelyo aabo bankutwe balabujana.+
13 Nkaambo Basinsimi boonse a Mulawo bakasinsima kusikila kuciindi ca Johane,+
14 alimwi kuti kamuyanda kuzumina majwi aaya, walo ngo ‘Elija ooyo iweelede kuboola.’+
15 Ooyo uujisi matwi aamvwe.
16 “Ino zyalani eeli inga ndalikozyanisya aani?+ Lili mbuli bana baniini bakkede mumisika ibaita mbobasobana limwi
17 kuti: ‘Twakamulizyila muntolilo pele tiimwakazyana; twakoomoka pele tiimwakalyuuma acamba kutondezya kuusa.’
18 Mbubonya buyo, Johane wakaboola katalyi nokuba kunywa, pele bantu baamba kuti, ‘Ulaadaimona.’
19 Mwanaamuntu wakaboola kalya akunywa,+ pele bantu baamba kuti ‘Amubone! Imuntu mulyato alimwi uuyandisya kunywa waini, mweenzinyina wabasimutelo abasizibi.’+ Nokuba boobo, busongo bulabonwa kuti buliluleme kwiinda mumilimo yambubo.”+
20 Mpoonya wakatalika kukalalila minzi mwaakacitila bunji bwamilimo yakwe mipati, nkaambo tiiyakeempwa:
21 “Maawe kulinduwe Kolazini! Maawe kulinduwe Betesaida! Nkaambo ikuti milimo mipati iyakacitika mulinduwe noyakacitika mu Turo a Sidoni, nobakeempwa kaindi kwiinda mukusama zisani zyamasaka akulitila mulota.+
22 Pele ndimwaambila kuti, mu Buzuba bwa Lubeta, cisubulo canu cinooli cipati kwiinda cisubulo ca Turo a Sidoni.+
23 Ayebo Kapernauma,+ sena uyoosumpulwa kujulu? Uyooboola ansi mu Cuumbwe;*+ nkaambo ikuti milimo mipati iyakacitika mulinduwe noyakacitika mu Sodoma, munzi ooyu nouciliko asunu.
24 Pele ndimwaambila kuti, mu Buzuba bwa Lubeta, cisubulo canu cinooli cipati kwiinda cisubulo ca Sodoma.”+
25 Mpoonya Jesu wakati: “Ndakutembaula caantangalala Taata, O Mwami wakujulu aanyika, nkaambo wazisisa zintu eezyi kubasongo abacenjede, pele waziyubunwida bana basyoonto.+
26 Inzya Taata, nkaambo oobu mbookayanda.
27 Taata wandipa zintu zyoonse+ alimwi kunyina uumuzyi kabotu Mwana ccita Taata alikke;+ alimwi kunyina uumuzyi kabotu Taata ccita Mwana alikke, alimwi ayooyo kufwumbwa Mwana ngwaayanda kuyubunwida.+
28 Amuboole kulindime nyoonse nomukatede akulemenwa, eelyo ndilamukatalusya.
29 Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya,+ eelyo mulakatalusyigwa.2
30 Nkaambo joko lyangu talikatazyi kunyamuna,* alimwi mukuli wangu muuba.”
Bupanduluzi buyungizyidwe
^ Naa “zisani zibotu?”
^ Mu Chigiriki, “kumbele lyabusyu bwako.”
^ Naa “Cikkalilo Cabafwu.” Amubone Bupanduluzi Bwamabala.
^ Naa “taliminyi.”
