Matayo 12:1-50
-
Jesu, “Mwami wa Sabata” (1-8)
-
Mwaalumi upuutide janza waponesyegwa (9-14)
-
Mubelesi ngwayandisya Leza (15-21)
-
Madaimona alatandwa kwiinda mukubelesya muuya uusalala (22-30)
-
Cibi citalekelelwi (31, 32)
-
Cisamu cilazyibwa kumicelo yancico (33-37)
-
Citondezyo ca Jona (38-42)
-
Ciindi muuya uusofweede noupiluka (43-45)
-
Banyina alimwi abanabokwabo Jesu (46-50)
12 Kuciindi eeco Jesu wakainda mumyuunda yamaila mu Sabata. Lino basikwiiya bakwe bakafwa nzala, mpoonya bakatalika kupulula myaangala yamaila akulya.+
2 Nobakabona boobo, ba Farisi bakamwaambila kuti: “Bona! Basikwiiya bako bacita cintu citazumizyidwe mu Sabata.”+
3 Wakabaambila kuti: “Sena tiimwakabala ncaakacita Davida ciindi walo abaalumi mbaakali limwi nobakafwa nzala?+
4 Sena tanaakanjila muŋanda ya Leza akulya zinkwa zyacituuzyo,*+ eezyo walo abaabo mbaakali limwi nzyobatakazumizyidwe kulya ccita buyo bapaizi balikke?+
5 Naa sena tiimwakabala mu Mulawo kuti mu Sabata, bapaizi mutempele balausotoka mulawo wa Sabata pele balazumanana kubula mulandu?+
6 Pele ndimwaambila kuti imupati kwiinda tempele nkwali aano.+
7 Ikuti nimwalizyi ncaamba majwi aaya aakuti, ‘Ncendiyanda nduse+ ikutali cipaizyo,’+ nomwatababeteka bantu batakwe mulandu.
8 Nkaambo Mwanaamuntu ngo Mwami wa Sabata.”+
9 Naakazwa kubusena oobo, wakaunka mucikombelo cabo,
10 eelyo kwakali mwaalumi wakapuutide* janza.+ Aboobo kutegwa bamujanine kaambo,+ bakamubuzya kuti, “Sena cilizumizyidwe kuponya mu Sabata?”
11 Wakabaingula kuti: “Ikuti kamujisi mbelele yomwe mpoonya mbelele eeyo yawida mumulindi mu Sabata, sena kuli muntu akati kanu uutakonzyi kwiijata akwiigusya?+
12 Muntu ulayandika kapati kwiinda mbelele! Nkokuti cilizumizyidwe kucita cintu cibotu mu Sabata.”
13 Mpoonya wakaambila mwaalumi ooyo kuti: “Kovwungulula janza lyako.” Eelyo wakalivwungulula, alimwi lyakaba kabotu mbuli lyeenzinyina.
14 Pele ba Farisi bakazwa anze akupangana kuti bamujaye.
15 Jesu naakazyiba boobu, wakazwa ooko. Alimwi bantu banji bakamutobela,+ eelyo wakabaponya boonse,
16 pele wakabalailila cakusinizya kuti batamuzyibyi kubantu,+
17 ikutegwa azuzikizyigwe majwi aakaambwa kwiinda mumusinsimi Isaya iwakaamba kuti:
18 “Amubone! Mubelesi wangu+ ngondakasala, ngondiyanda,+ ooyo ngondikkomanina! Ndiyoobikka muuya wangu alinguwe,+ eelyo uyoobapa kuzyiba bululami bantu bamasi.
19 Takakazyanyi+ nokuba koongolola, alimwi taakwe uuyoomvwa jwi lyakwe mumigwagwa mipati.
20 Takatyoli tete lipwayikide, alimwi takakazimi katambo kalambe kasuka busi+ kusikila akazwidilile kuleta bululami.
21 Masimpe, masi ayoolangila muzina lyakwe.”+
22 Mpoonya bakamuletela mwaalumi wakanjidwe daimona, moofwu alimwi syaataambi, eelyo wakamuponya cakuti syaataambi ooyu wakatalika kwaambaula akubona.
23 Mpoonya makamu oonse aabantu akagambwa akutalika kwaamba kuti: “Sena ooyu inga katali ngo Mwana wa Davida?”
24 Nobakamvwa boobu, ba Farisi bakaamba kuti: “Muntu ooyu utanda madaimona kwiinda munguzu zya Belezebule,* imweendelezi wamadaimona.”+
25 Mbwaanga wakaliizyi mizeezo yabo, wakabaambila kuti: “Bwami buli boonse bwaandeene bulanyonyooka, amunzi naa ŋanda iili yoonse yaandeene ilawa.
26 Ncimwi buyo, ikuti Saatani utanda Saatani, nkokuti waandaana mwini; aboobo ino bwami bwakwe bulaima buti?
27 Alimwi ikuti mebo nditanda madaimona munguzu zya Belezebule, ino bana banu baatanda munguzu zyani? Nkakaambo kaako bayoomubeteka.
28 Pele ikuti naa nditanda madaimona munguzu zyamuuya wa Leza, nkokuti Bwami bwa Leza ncobeni bwamusikila kamutabuyeeyeli.+
29 Naa, ino mbuti umwi mbwakonzya kunjila muŋanda yamuntu singuzu akubweza zintu zyakwe? Ccita kuti wasaanguna kumwaanga muntu ooyo singuzu, ndendilyo nakonzya kusaala ŋanda yakwe.
30 Kufwumbwa ooyo uutali kulubazu lwangu mulwani wangu, alimwi kufwumbwa ooyo uutabunganyi antoomwe andime ulamwaya.+
31 “Aboobo ndimwaambila kuti, bantu bayoolekelelwa cibi cili coonse akusampaula kuli koonse, pele tabakalekelelwi ikuti basampaula muuya.*+
32 Mucikozyanyo, kufwumbwa uusampaula Mwanaamuntu, uyoolekelelwa;+ pele kufwumbwa uusampaula muuya uusalala takalekelelwi pe mubweende bwazintu obuno* naa oobo buboola.+
33 “Nywebo ndinywe mupa kuti cisamu cibote amicelo yaco ibote naa kuti cibije amicelo yaco ibije, nkaambo cisamu cilazyibwa kumicelo yaco.+
34 Nobana babacipile,+ ino mbuti mbomukonzya kwaamba zintu zibotu kakuli muli babi? Nkaambo mulomo waamba zizwide mumoyo.+
35 Nkaambo muntu mubotu ulagusya zintu zibotu kuzwa muciyobwedo cakwe cibotu, kakuli muntu mubi ulagusya zintu zibi kuzwa muciyobwedo cakwe cibi.+
36 Ndimwaambila kuti mu Buzuba bwa Lubeta, bantu bayoolyaambilila+ kujatikizya majwi oonse aatagwasyi ngobaamba;
37 nkaambo kumajwi aako uyakwaambwa kuti uli mululami, alimwi kumajwi aako uyoopegwa mulandu.”
38 Lino mukumwiingula balembi aba Farisi bamwi bakaamba kuti: “Mwiiyi, tuyanda kubona citondezyo kulinduwe.”+
39 Mpoonya wakabaingula kuti: “Izyalani libi alimwi lyabumambe* lizumanana kuyanda kupegwa citondezyo, pele kunyina citondezyo ncoliyoopegwa ccita buyo citondezyo ca Jona musinsimi.+
40 Nkaambo mbubonya Jona mbwaakali mwida lyamuswi kwamazuba otatwe isyikati amasiku,+ awalo Mwanaamuntu uyooba mukati kanyika kwamazuba otatwe isyikati amasiku.+
41 Bantu baku Nineve bayoobusyigwa mu Buzuba bwa Lubeta antoomwe azyalani eeli, eelyo bayoolipa mulandu, nkaambo balo bakeempwa kumakani ngaakakambauka Jona.+ Pele amubone! Imupati2kwiinda Jona mpali aano.+
42 Mwami mukaintu wakumusanza uyoobusyigwa mubuzuba bwalubeta antoomwe azyalani eeli, eelyo uyoolipa mulandu, nkaambo walo wakaboola kuzwa kumagolelo aanyika kutegwa azoomvwe busongo bwa Solomoni.+ Pele amubone! Imupati kwiinda Solomoni mpali aano.+
43 “Ciindi muuya uusofweede nouzwa mumuntu, ulainda mumasena aatakwe maanzi kuyandaula busena bwakulyookezyela, pele taujani busena pe.+
44 Mpoonya ulaamba kuti, ‘Ndilapiluka kuŋanda yangu nkondakazwa,’ eelyo wasika ulajana kuti taakwe uukkala muŋanda eeyo alimwi ilikukwidwe akubambwa kabotu.
45 Lino ulaunka kuyooleta myuuya iimbi iili ciloba mibi kwiinda nguwo, eelyo yanjila mukati ilakkala mumonya oomo; eelyo bukkale bwamamanino bwamuntu ooyo bulabija kapati kwiinda bwakusaanguna.+ Oobo mbociyooba kuzyalani libi eeli.”
46 Naakacili kwaambaula amakamu aabantu, banyina abanabokwabo+ bakaliimvwi anze, kabayanda kwaambaula anguwe.+
47 Mpoonya muntu umwi wakamwaambila kuti: “Bona! Banyoko abanabokwanu baliimvwi anze bayanda kwaambaula anduwe.”
48 Lino ikwiingula muntu ooyo wakati: “Ino baama mbaani abakwesu mbaani?”
49 Eelyo wakatondeka basikwiiya bakwe akwaamba kuti: “Bona! Aaba mbabaama abakwesu!+
50 Nkaambo kufwumbwa uucita kuyanda kwa Taata uuli kujulu, ooyo ngomukwesu, ngomucizyi wangu alimwi mbabaama.”+
Bupanduluzi buyungizyidwe
^ Naa “zinkwa zyacitondezyo.”
^ Naa “wakalebukide.”
^ Izina libelesyegwa kwaamba Saatani.
^ Kusampaula ooku caamba kusampaula Leza naa zintu zisetekene.
^ Naa “muciindi ecino.” Amubone Bupanduluzi Bwamabala.
^ Naa “litasyomeki.”
