Matayo 13:1-58
-
ZIKOZYANYO ZYA BWAMI (1-52)
-
Sikuminza (1-9)
-
Ikaambo Jesu ncaakali kubelesyela zikozyanyo (10-17)
-
Cikozyanyo casikuminza capandululwa (18-23)
-
Wiiti ansaku (24-30)
-
Nseke yamusitada alimwi abumena (31-33)
-
Kubelesya zikozyanyo kwazuzikizya businsimi (34, 35)
-
Cikozyanyo cawiiti ansaku capandululwa (36-43)
-
Lubono lusisidwe alimwi angale zibotu (44-46)
-
Lunsabwe (47-50)
-
Lubono lupya alwakaindi (51, 52)
-
-
Jesu wakakwa mumunzi okwabo (53-58)
13 Mubuzuba oobo Jesu wakazwa aŋanda akukkala kumbali aalwizi.
2 Mpoonya makamu aabantu akabungana kulinguwe cakuti wakatanta akukkala mubwato, pele nkamu yoonse yakaliimvwi kunkomwe.+
3 Mpoonya wakabaambila zintu zinji muzikozyanyo kuti:+ “Amubone! Sikuminza wakaunka kuyoominza.+
4 Naakali kuminza, imbuto zimwi zyakawida mumbali aanzila, mpoonya bayuni bakaboola akuzilya.+
5 Zimwi zyakawida anyika yamabwe aawo aatakali bulongo bunji, eelyo zyakamena cakufwambaana akaambo kakuti bulongo tiibwakali bunji.+
6 Pele izuba nolyakabala, zyakaneta alimwi zyakayuma akaambo kakutasimpa miyanda.
7 Zimwi zyakawida mumamvwa, mpoonya mamvwa akakomena akuzisyaanikizya.+
8 Pele zimwi zyakawida mubulongo bubotu alimwi zyakatalika kuzyala micelo, eeyi yakazyala micelo iiyungizyidwe ziindi izili 100, iilya izili 60, aimwi izili 30.+
9 Ooyo uujisi matwi aamvwe.”+
10 Aboobo basikwiiya bakwe bakaboola akumubuzya kuti: “Ino nkaambo nzi ncobaambila muzikozyanyo?”+
11 Wakabaingula kuti: “Nywebo mwazumizyigwa kumvwisya maseseke aa Leza+ aa Bwami bwakujulu, pele balo tabazumizyidwe pe.
12 Nkaambo kufwumbwa uujisi, uyoopegwa azimwi eelyo uyooba azinji; pele kufwumbwa uutajisi, noziba nzyajisi uyoonyangwa.+
13 Ncencico ncendibaambila muzikozyanyo; nkaambo kulanga balalanga pele tababoni, akumvwa balamvwa pele tabaswiilili nokuba kumvwisya caambwa.+
14 Alimwi businsimi bwa Isaya bulazuzikizyigwa kujatikizya mbabo. Bwaamba kuti: ‘Masimpe kumvwa muyoomvwa pele tamukamvwisyi caambwa, alimwi ncobeni kulanga muyoolanga pele tamukaboni pe.+
15 Nkaambo myoyo yabantu aaba yayuma, balamvwa amatwi aabo pele tabaciti alimwi bafwinya, ikutegwa bataboni ameso aabo akumvwa amatwi aabo, akumvwisya caambwa mumyoyo yabo akusanduka kutegwa ndibaponye.’+
16 “Pele nywebo mulikkomene nkaambo meso aanu alabona, alimwi amatwi aanu alamvwa.+
17 Nkaambo ncobeni ndimwaambila kuti, bunji bwabasinsimi abantu baluleme bakali kuyandisisya kubona zintu nzyomubona, pele tiibakazibona,+ alimwi bakali kuyandisisya kumvwa zintu nzyomumvwa, pele tiibakazimvwa pe.
18 “Lino amuswiilile kubupanduluzi bwacikozyanyo camuntu wakaminza.+
19 Ikuti umwi wamvwa ijwi lya Bwami pele tamvwisyi ncolyaambwa, mubi+ ulaboola akukwempula zyakaminzigwa mumoyo wakwe; eeyi nembuto yakaminzigwa mumbali aanzila.+
20 Lino eeyo yakaminzigwa anyika yamabwe, ngooyo uumvwa majwi akufwambaana kwaatambula calukkomano.+
21 Pele tajisi miyanda mulinguwe, nokuba boobo ulazumanana kwakaindi, lino kwaboola makatazyo naa kupenzyegwa akaambo kajwi, ulatyompwa ndilyonya.
22 Lino eeyo iyakaminzigwa mumamvwa, ngooyo uumvwa jwi, pele kulibilika kwamubweende bwazintu obuno*+ akoongelezya kwalubono zilalisyaanikizya jwi, aboobo talizyali micelo.+
23 Pele eeyo yakaminzigwa mubulongo bubotu, ngooyo uumvwa jwi akumvwisya ncolyaamba, walo uuzyala micelo, ooyu ulazyala micelo iiyungizyidwe ziindi izili 100, uulya izili 60, aumwi izili 30.”+
24 Wakabaambila cikozyanyo acimwi kuti: “Bwami bwakujulu bulakonzya kukozyanisyigwa amuntu iwakasyanga mbuto mbotu mumuunda wakwe.
25 Bantu nobakali koona, sinkondonyina wakaboola akusyanga nsaku muwiiti, amane waunka.
26 Lino busonga nibwakasonsa akuzyala maila, azyalo nsaku zyakalibonya.
27 Aboobo bazike bamwiniŋanda bakaboola akumwaambila kuti, ‘Mwami, sena tonookasyanga mbuto mbotu mumuunda wako? Ino lino mwajanika buti nsaku?’
28 Wakabaingula kuti, ‘Sinkondoma nguwakacita boobo.’+ Bazike bakamwaambila kuti, ‘Sena ulayanda kuti tuunke tukazijwe?’
29 Wakaingula kuti, ‘Peepe, nkaambo ambweni nomujwa nsaku inga mwajwa wiiti antoomwe anzizyo.
30 Amuzileke zikomenene antoomwe kusikila ciindi cakutebula, eelyo lyakutebula ndiyakwaambila batebuzi kuti: Amusaangune kubungika nsaku akuzyaanga muzilwi kuti zyuumpwe; mwamana muyobole wiiti mubutala bwangu.’”+
31 Wakabaambila cikozyanyo acimwi kuti: “Bwami bwakujulu buli mbuli nseke yamusitada, eeyo muntu njaakabweza akusyanga mumuunda wakwe.+
32 Eeyi nenseke nsyoonto kwiinda nseke zyoonse, pele yamena ilakomena kwiinda zisyango zyoonse akuba cisamu cakuti bayuni bauluka mujulu balaboola akujana aakukkala mumitabi yancico.”
33 Wakabaambila cikozyanyo acimwi kuti: “Bwami bwakujulu buli mbuli bumena mukaintu umwi mbwaakabweza akubusanganya afulaulu wakali muzisuwo zyotatwe zipati, mane kusikila fulaulu woonse wakafwufwumuka.”+
34 Jesu wakaambila makamu aabantu zintu zyoonse eezyi muzikozyanyo. Masimpe, taakwe naakali kwaambaula ambabo kakunyina kubelesya cikozyanyo,+
35 ikutegwa azuzikizyigwe majwi aakaambwa kwiinda mumusinsimi iwakati: “Ndilajalula mulomo wangu akwaambaula muzikozyanyo; ndilaambilizya zintu zisisidwe kuzwa kumatalikilo.”*+
36 Lino naakamana kwaambila makamu aabantu kuti baunke, wakanjila muŋanda. Eelyo basikwiiya bakwe bakaboola kulinguwe akwaamba kuti: “Kotupandulwida cikozyanyo cansaku mumuunda.”
37 Eelyo wakaingula kuti: “Sikuminza mbuto mbotu Mwanaamuntu;
38 muunda ninyika.+ Imbuto mbotu mbana ba Bwami, pele nsaku mbana bamubi,+
39 alimwi sinkondo iwakaziminza ngu Diabolosi. Butebuzi mamanino aabweende bwazintu,* mpoonya basikutebula mbangelo.
40 Aboobo, mbubonya mbuli nsaku mbozibunganizyigwa akuumpwa mumulilo, oobo mbokuyooba kumamanino aabweende bwazintu.*+
41 Mwanaamuntu uyootuma bangelo bakwe, eelyo bayoogusya mu Bwami bwakwe zintu zyoonse zilebya abantu bacita bubi,
42 eelyo bayoobasowela mubbibi lyamulilo.+ Momumo mobayoolilila akulumina ntwino.
43 Kuciindi eeco balulami bayoobala mbubonya mbuli zuba+ mu Bwami bwa Usyi. Ooyo uujisi matwi aamvwe.
44 “Bwami bwakujulu buli mbuli lubono lusisidwe mumuunda, oolo muntu ndwaakajana akulusisa; mpoonya akaambo kalukkomano ndwajisi, ulaunka akusambala zintu zyoonse nzyajisi akuula muunda ooyo.+
45 “Alimwi Bwami bwakujulu buli mbuli musambazi weendeenda uuyandaula ngale zibotu.
46 Naakajana ngale yomwe iiyandika kapati, wakaunka akuyoosambala cakufwambaana zintu zyoonse nzyaakajisi akuyuula.+
47 “Alimwi Bwami bwakujulu buli mbuli lunsabwe ndobakawaala mulwizi akujaya nswi zyamisyobo yoonse.
48 Nolwakazula, bakalukwelela kunkomwe, eelyo bakakkala ansi akusala zibotu+ akuzibikka muzisuwo, pele zibi+ bakazisowa.
49 Oobo mbokuyooba kumamanino aabweende bwazintu.* Bangelo bayootumwa kuyakwaandaanya babi kuzwa kubaluleme,
50 mpoonya bayoobasowela mubbibi lyamulilo. Momumo mobayoolilila akulumina ntwino.
51 “Sena mwamvwisya ncozyaamba zintu zyoonse eezyi?” Bakamwiingula kuti: “Inzya.”
52 Kumane wakabaambila kuti: “Aboobo muntu woonse uuyiisya buleya, naayiisyigwa makani aa Bwami bwakujulu, uli mbuli muntu mwiniŋanda uugusya muciyobwedo cakwe zintu zipya azyakaindi.”
53 Lino Jesu naakamana kwaamba zikozyanyo eezyi, wakazwa kubusena oobo.
54 Naakasika kumunzi okwabo,+ wakatalika kubayiisya mucikombelo cabo cakuti bakagambwa akubuzya kuti: “Ino muntu ooyu wakabujana kuli busongo oobu amilimo mipati eeyi?+
55 Sena ooyu tali mwana wamubezi?+ Sena banyina tali Mariya abanabokwabo sena tabali ba Jakobo, Josefa, Simoni a Judasi?+
56 Abacizyi bakwe boonse, sena tatuli limwi? Ino wakazijana kuli eezyi zyoonse?”+
57 Aboobo bakamukaka.+ Pele Jesu wakabaambila kuti: “Musinsimi ulalemekwa koonse ccita buyo mumunzi okwabo naa kuli bamuŋanda yakwe.”+
58 Aboobo okuya taakwe naakacita milimo mipati minji akaambo kakubula lusyomo kwabo.
Bupanduluzi buyungizyidwe
^ Naa “kwamuciindi ecino.” Amubone Bupanduluzi Bwamabala.
^ Naa ambweni, “kumatalikilo aanyika.”
^ Naa “aaciindi.” Amubone Bupanduluzi Bwamabala.
^ Naa “aaciindi.” Amubone Bupanduluzi Bwamabala.
^ Naa “aaciindi.” Amubone Bupanduluzi Bwamabala.
