Matayo 22:1-46
22 Alimwi Jesu wakabaambila kwiinda muzikozyanyo, wakati:
2 “Bwami bwakujulu inga bwakozyanisyigwa amwami iwakabamba pobwe lyabwiinga+ lyamwanaakwe musankwa.
3 Mpoonya wakatuma bazike bakwe kuyakwiita baabo bakatambidwe kupobwe lyabwiinga, pele tiibakali kuyanda kuboola.+
4 Alimwi wakatuma bazike abambi akubaambila kuti, ‘Amubaambile aabo batambidwe kuti: “Amubone! Ndabamba cakulya camasyikati, kwajaigwa ŋombe abanyama bangu baneneede, alimwi zintu zyoonse zyabambwa kale. Amuboole kupobwe lyabwiinga.”’
5 Pele kakunyina kubikkila maano bakaunka kumbi, umwi kumuunda wakwe, umwi kumakwebo aakwe;+
6 aabo bakacaala, bakajata bazike bakwe akubasampaula kumane bakabajaya.
7 “Mwami wakakalala akutuma basikalumamba bakwe, eelyo bakabanyonyoona bajayi aabo akuumpa munzi wabo.+
8 Mpoonya wakaambila bazike bakwe kuti, ‘Pobwe lyabwiinga lyabambwa, pele aabo batambidwe tiibali kweelela pe.+
9 Aboobo kamuya kunzila zizwa mumunzi, mutambe kufwumbwa ngomuyoojana kuti aboole kupobwe lyabwiinga.’+
10 Aboobo bazike aabo bakaunka mumigwagwa akubabunganya antoomwe boonse aabo mbobakajana, babi ababotu; eelyo ŋanda yabwiinga yakazula bantu aabo ibakali kulya.*
11 “Ciindi mwami naakanjila kuti alingule beenzu, wakabona muntu umwi watakasamide cisani cabwiinga.
12 Aboobo wakamubuzya kuti, ‘Ino musa wanjila buti omuno kotasamide cisani cabwiinga?’ Eelyo wakabula cakwaamba.
13 Lino mwami wakaambila babelesi bakwe kuti, ‘Amumwaange kumaanza akumaulu mumusowele anze mumudima. Ooko nkwayoolilila akulumina ntwino.’
14 “Mwami wakaita banji pele wakasala buyo basyoonto.”
15 Mpoonya ba Farisi bakaunka akumvwana kutegwa bamujanine kaambo kumajwi aakwe.+
16 Aboobo bakamutumina basikwiiya babo, antoomwe acipani cabasikutobela Heroda,+ kabati: “Omwiiyi, tulizyi kuti lyoonse waamba masimpe alimwi uyiisya nzila ya Leza mukasimpe, alimwi tolibotyi-botyi kumuntu uuli woonse, nkaambo tolangi ziimo zyabantu.
17 Aboobo kotwaambila, ino uyeeya buti? Sena cilizumizyidwe* kutela mutelo kuli Kaisara naa pe?”
18 Pele mbokunga Jesu wakalizyi mbobakali babi myoyo, wakababuzya kuti: “Ino mundisunkila nzi, nywebo nobasikuupaupa ameso?
19 Amunditondezye kkobili litelwa.” Eelyo bakamuletela dinari.*
20 Wakababuzya kuti: “Ino cikozyanyo eeci alimwi azina eeli nzizyani?”
21 Bakati: “Nzizya Kaisara.” Mpoonya wakabaambila kuti: “Aboobo amupe Kaisara zintu zya Kaisara, pele zintu zya Leza amupe Leza.”+
22 Nobakamvwa boobu bakagambwa, mpoonya bakamusiya akuunka.
23 Mubuzuba oobo ba Saduki, ibaamba kuti kunyina bubuke,+ bakaboola akumubuzya kuti:+
24 “Omwiiyi, Musa wakaamba kuti: ‘Ikuti mwaalumi wafwa katajisi bana, imwanookwabo weelede kumukwata mukaintu wakwe akumuzyalila bana munyina.’+
25 Lino kwakali babunyina bali ciloba mbotwakali limwi. Wakusaanguna wakakwata, pele wakafwa katajisi mwana, wakasiila munyina mukaintu wakwe.
26 Mbucakacitika oobu kuli wabili awatatu, akuli boonse bali ciloba.
27 Mpoonya awalo mukaintu wakafwa.
28 Aboobo mububuke, ino uyooba mukaintu wani aali baaba bali ciloba? Nkaambo boonse bakalimukwete.”
29 Mukwiingula Jesu wakabaambila kuti: “Mulisweekede nkaambo tamwaazyi Magwalo naa nguzu zya Leza;+
30 nkaambo mububuke baalumi tabakwati alimwi bamakaintu tabakwatwi, pele bali mbuli bangelo kujulu.+
31 Kujatikizya bubuke bwabafwide, sena tiimwakabala nzyaakamwaambila Leza naakati:
32 ‘Ndime Leza wa Abrahamu a Leza wa Izaka a Leza wa Jakobo’?+ Tali Leza wabafwu, pele ngwabaumi.”+
33 Naakamvwa boobo, makamu aabantu akagambwa ambwaakali kuyiisya.+
34 Lino ba Farisi nobakamvwa kuti ba Saduki wabazula, bakalibunga-bunga antoomwe.
35 Lino umwi wabo uuzyi Mulawo, wakamusunka kwiinda mukumubuzya kuti:
36 “Omwiiyi, ino nguuli mulawo mupati mu Mulawo?”+
37 Wakamwaambila kuti: “‘Weelede kuyanda Jehova* Leza wako amoyo wako woonse, abuumi bwako boonse alimwi amizeezo yako yoonse.’+
38 Ooyu ngomulawo mupati alimwi ngonguwe wakusaanguna.
39 Alimwi ngooyu wabili uuli mbuli yooyu: ‘Weelede kuyanda simukobonyoko mbubonya mbuli mboliyanda omwini.’+
40 Amilawo eeyi yobilo mpaayeeme Mulawo woonse a Basinsimi.”+
41 Lino ba Farisi nobakabungene antoomwe, Jesu wakababuzya kuti:+
42 “Ino mbuti mbomuyeeya kujatikizya Kristo? Ino mwanaani?” Bakamuvwiila kuti: “Mwana wa Davida.”+
43 Wakababuzya kuti: “Aboobo, ino nkaambo nzi Davida kwiinda mukusololelwa amuuya+ ncamwiita kuti Mwami naamba kuti,
44 ‘Jehova* wakaambila Mwami wangu kuti: “Kkala kujanza lyangu lyalulyo kusikila mane ndikabikke basinkondonyoko kunsi aamaulu aako”’?+
45 Aboobo, ikuti Davida umwiita kuti Mwami, ino mwanaakwe buti?”+
46 Eelyo kunyina wakakonzya kumuvwiila noliba jwi lyomwe, alimwi kuzwa buzuba oobo, taakwe wakasola kabili kumubuzya mubuzyo.
Bupanduluzi buyungizyidwe
^ Naa “ibakakkede kutebulu.”
^ Naa “cililuzi.”
^ Amubone Makani Aayungizyidwe B14.
^ Amubone Makani Aayungizyidwe A5.
^ Amubone Makani Aayungizyidwe A5.
