Matayo 23:1-39
23 Lino Jesu wakaambila makamu aabantu alimwi abasikwiiya bakwe kuti:
2 “Balembi aba Farisi balibikka acuuno ca Musa.
3 Aboobo zintu zyoonse nzyobamwaambila, amucite akutobela, pele mutaciti kweelana amicito yabo, nkaambo balaamba pele tabaciti nzyobaamba.+
4 Balaanga mikuli milemu akwiibikka aamagwezyo aabantu,+ pele balo tabayandi kwiiguma amunwe wabo.+
5 Milimo yoonse njobacita, balaicita kutegwa babonwe abantu,+ nkaambo balakomezya tukomo tujisi magwalo ntobasama katuli zilikwabilizyo,*+ alimwi balalampya maaya aazisani zyabo.+
6 Balayanda kukkala mumasena aalemenede kucilalilo alimwi aazyuuno zyakumbele* muzikombelo+
7 alimwi balayanda kwaanzyigwa cabulemu kumisika akuti bantu kababaita kuti Rabbi.*
8 Pele nywebo mutanikwiitwi kuti Rabbi, nkaambo mujisi Mwiiyi omwe,+ eelyo nywebo nyoonse muli babunyina.
9 Alimwi mutaiti kufwumbwa muntu anyika kuti taata, nkaambo mujisi Uso+ omwe ooyo uuli kujulu.
10 Alimwi mutanikwiitwi kuti basololi, nkaambo mujisi buyo Musololi omwe, Kristo.
11 Pele mupati akati kanu weelede kuba mubelesi wanu.+
12 Kufwumbwa uulisumpula uyoocesyegwa+ alimwi kufwumbwa uulicesya uyoosumpulwa.+
13 “Maawe kulindinywe nobalembi aba Farisi, nobasikuupaupa ameso! Nkaambo mujalila bantu kuti batanjili mu Bwami bwakujulu; nkaambo nywebo lwanu tamunjili, alimwi tamubazumizyi aabo bayanda kunjila kuti banjile.+
14 *—
15 “Maawe kulindinywe nobalembi aba Farisi, nobasikuupaupa ameso!+ Nkaambo muleenda mulwizi aanyika kutegwa musandule* muntu omwe, kumane aba umwi wanu, mumupa kweelela kunyonyoonwa mu Gehena* ziindi zyobilo kwiinda ndinywe.
16 “Maawe kulindinywe nobasololi boofwu,+ nywebo nomwaamba kuti, ‘Ikuti umwi wakonkezya tempele, tacikwe makani; pele ikuti naa umwi wakonkezya ngolida yakutempele, uleelede kuzuzikizya cikonke cakwe.’+
17 Nobafwubafwuba alimwi noboofwu! Mubwini ncili cipati, ingolida naa tempele eelyo lyasalazya ngolida?
18 Kuyungizya waawo, ‘Ikuti umwi wakonkezya cipaililo, tacikwe makani; pele ikuti naa umwi wakonkezya cipego cili mpawo, uleelede kuzuzikizya cikonke cakwe.’
19 Noboofwu! Mubwini ncili cipati, icipego naa cipaililo eeco cisalazya cipego?
20 Aboobo kufwumbwa muntu uukonkezya cipaililo ukonkezya ncico azintu zyoonse zili mpawo;
21 alimwi kufwumbwa muntu uukonkezya tempele ukonkezya ndilyo alimwi ayooyo uukkala mumo;+
22 alimwi kufwumbwa muntu uukonkezya julu ukonkezya cuuno cabwami ca Leza alimwi ayooyo uukkede mpawo.
23 “Maawe kulindinywe nobalembi aba Farisi, nobasikuupaupa ameso! Nkaambo mulapa cakkumi cazisyu zyaluyuni abboonko,+ pele tamubikkili maano kumakani mapati aa Mulawo, nkokuti bululami,+ luse,+ alusyomo. Mubwini cilayandika kupa zintu eezyi, pele eeci tacaambi kuti zintu eezyi zimbi tazyeelede kucitwa.+
24 Nobasololi boofwu,+ nomuminununa kansenya+ pele nkamela mulaimena!+
25 “Maawe kulindinywe nobalembi aba Farisi, nobasikuupaupa ameso! Nkaambo mulasanzya nkapu amutiba nkozili kunze+ pele mukati zizwide busyaacivwulemwangu*+ akutalyeendelezya.+
26 Omu Farisi moofwu, kosaanguna kusanzya mukati mwankapu amutiba ikutegwa aalo anze asalale.
27 “Maawe kulindinywe nobalembi aba Farisi, nobasikuupaupa ameso!+ Nkaambo mulikozyenye azyuumbwe zilambidwe mulambo uutuba,+ zyalo kunze izilibonya kabotu pele mukati zizwide mafwuwa aabantu bafwide abusofwaazi bwamisyobo yoonse.
28 Mbubonya buyo andinywe, kunze mulibonya kululama kubantu, pele mukati muzwide kuupaupa ameso alimwi abubi.+
29 “Maawe kulindinywe nobalembi aba Farisi, nobasikuupaupa ameso!+ Nkaambo muyaka zyuumbwe zyabasinsimi akubotezya zyuumbwe zyabalulami,+
30 alimwi mwaamba kuti, ‘Ikuti notwakali kupona kumazuba aabamatata, notwatakatola lubazu mukutila bulowa bwabasinsimi.’
31 Aboobo mulicitila bumboni nobeni kuti muli bana babaabo bakajaya basinsimi.+
32 Aboobo, amwiimanizye milimo njobakatalika bamauso.
33 “Nywebo nonzoka,+ nobana babacipile, ino mbuti mbomuyoolutija lubeta lwamu Gehena?*+
34 Aboobo, ndilamutumina basinsimi,+ bantu basongo alimwi abamayi bayiisya aabuleya.+ Bamwi muyoobajaya+ akubagagaila azisamu, eelyo bambi muyoobakwibbaula+ muzikombelo zyanu akubapenzya+ mumunzi amunzi,
35 ikutegwa bube alindinywe bulowa boonse bwabaluleme bwakatilwa anyika, kutalikila kubulowa bwa Abelo+ mululami kusikila kubulowa bwa Zekariya mwana wa Barakiya ngomwakajaya akati katempele acipaililo.+
36 Ncobeni ndimwaambila kuti, zintu zyoonse eezyi ziyoocitika kuzyalani eeli.
37 “Aakaka Jerusalemu, Jerusalemu, yebo oojaya basinsimi akubapwaya mabwe aabo batumwa kulinduwe+—lyoonse ndakali kuyanda kubafwukatila bana bako mbubonya nkuku nseke mboifwukatila twana twanjiyo mumababa aanjiyo! Pele nywebo tiimwakali kuyanda.+
38 Amubone! Ŋanda yanu yaba tongo alimwi yasiigwa kulindinywe.*+
39 Nkaambo ndimwaambila kuti, tamukandiboni limbi kuzwa ciindi ecino kusikila mukaambe kuti, ‘Ulilelekedwe ooyo uuboola muzina lya Jehova!’”*+
Bupanduluzi buyungizyidwe
^ Naa “balakomezya mafilakateri.”
^ Naa “zibotu kapati.”
^ Naa “Bafwundisi.”
^ Amubone Makani Aayungizyidwe A3.
^ Naa “mucince.”
^ Amubone Bupanduluzi Bwamabala.
^ Naa “lusaalo.”
^ Amubone Bupanduluzi Bwamabala.
^ Naa ambweni, “yasiigwa kulindinywe kalili tongo.”
^ Amubone Makani Aayungizyidwe A5.
