Matayo 25:1-46
25 “Alimwi Bwami bwakujulu inga bwakozyanisyigwa abanakalindu bali kkumi ibakabweza malambe aabo+ akuyoocinga sibwiinga.+
2 Bosanwe akati kabo bakali bafwubafwuba, mpoonya bambi aaba bosanwe bakalicenjede.*+
3 Nkaambo bafwubafwuba bakabweza malambe aabo pele tiibakabweza mafwuta aambi ambali,
4 pele balo bacenjede bakabweza mafwuta aambi munsazi zyabo amalambe aabo.
5 Lino sibwiinga wakamuka, aboobo boonse bakatalika kufwukula mpoonya bakoona.
6 Akati kamasiku eeni, kwakamvwugwa loongololo lwakuti: ‘Wasika sibwiinga! Kamuya mukamucinge.’
7 Mpoonya boonse banakalindu aabo bakabuka akwaabamba kabotu malambe aabo.+
8 Eelyo bafwubafwuba bakaambila bacenjede kuti, ‘Amutwaabile mafwuta, nkaambo malambe eesu ayanda kuzima.’
9 Lino bacenjede bakaingula kuti: ‘Ambweni kuti tumupe taakootuzulila toonse. Pele kamuya kuli baabo basambala mukalyuulile aanu.’
10 Nobakacili kweenda kuti bakaule, sibwiinga wakasika. Banakalindu ibakalibambilide bakanjila anguwe muŋanda yapobwe lyabwiinga,+ mpoonya mulyango wakajalwa.
11 Kumane banakalindu bamwi aabo abalo bakaboola, bakati, ‘Sibwiinga, Sibwiinga, kotujalwida!’+
12 Mukwiingula wakati, ‘Kumwaambila masimpe, mebo tandimuzyi pe.’
13 “Aboobo amulangile,+ nkaambo tamuzyi buzuba nociba ciindi.+
14 “Alimwi Bwami bwakujulu buli mbuli muntu iwakayanda kuunka kucisi cimbi, wakaita bazike bakwe akubapa lubono lwakwe.+
15 Wakusaanguna wakamupa matalenta* aali musanu, wabili wakamupa obilo, watatu wakamupa lyomwe, umwi aumwi wakapegwa kweelana anguzu zyakwe, aboobo wakaunka kucisi cimbi.
16 Ndilyonya ooyo wakatambula matalenta aali musanu wakaunka waakwaabelesya mumakwebo akujana aambi aali musanu.
17 Mbubonya buyo awalo ooyo wakatambula obilo wakajana aambi obilo.
18 Pele muzike ooyo wakatambula lyomwe buyo wakaunka waakusya ansi akusisa mali* aasimalelaakwe.
19 “Lino nokwakainda ciindi cilamfwu simalelaabo bazike aabo wakaboola akubalingula.+
20 Aboobo ooyo wakatambula matalenta aali musanu wakaboola akuleta aambi matalenta aali musanu akwaamba kuti, ‘Simalelaangu, wakandipa matalenta aali musanu; bona, ndakajana aambi aali musanu.’+
21 Simalelaakwe wakati kulinguwe: ‘Wacita kabotu, omuzike mubotu alimwi uusyomeka! Wakasyomeka muzintu zisyoonto. Ndiyookusala kuti kolanganya zintu zinji.+ Konjila ukondwe antoomwe asimalelaako.’+
22 Kuzwa waawo ooyo wakatambula matalenta obilo wakaboola akwaamba kuti, ‘Simalelaangu, wakandipa matalenta obilo; bona ndakajana aambi matalenta obilo.’+
23 Simalelaakwe wakati kulinguwe: ‘Wacita kabotu, omuzike mubotu alimwi uusyomeka! Wakasyomeka muzintu zisyoonto. Ndiyookusala kuti kolanganya zintu zinji. Konjila ukondwe antoomwe asimalelaako.’
24 “Mpoonya ooyo wakatambula talenta lyomwe wakaboola akwaamba kuti: ‘Simalelaangu, ndilikuzyi kuti uli muntu muyumu moyo, uutebula mpootakasyanga akuyobola nzyootakapupulula.+
25 Aboobo ndakayoowa, eelyo ndakaunka kuyoolisisa talenta lyako ansi. Nkooko ndeeli talenta lyako.’
26 Mukwiingula simalelaakwe wakati kulinguwe: ‘Omuzike mubi alimwi mutolo, tee kayi wakalizyi kuti ndilatebula mpondatakasyanga akuyobola nzyondatakapupulula?
27 Aboobo wakeelede kupa basimpindu mali* aangu, eelyo ciindi nondasika nindaajana ampindu yangawo.
28 “‘Aboobo, amumunyange talenta ooyu akupa yooyo uujisi matalenta aali kkumi.+
29 Nkaambo umwi aumwi uujisi uyoopegwa azimwi eelyo uyooba azinji. Pele ooyo uutajisi, noziba zyeezyo nzyajisi uyoonyangwa.+
30 Lino amumusowele anze mumudima muzike ooyu uutakwe mulimo. Ooko nkwayoolilila akulumina ntwino.’
31 “Mwanaamuntu aakuboola+ mubulemu bwakwe, antoomwe abangelo boonse,+ uyookkala acuuno cakwe cabwami cabulemu.
32 Masi oonse ayoobunganizyigwa kumbele lyakwe, mpoonya uyoobaandaanya bantu mbubonya mweembezi mbwaandaanya mbelele ampongo.
33 Uyoobikka mbelele kujanza lyakwe lyalulyo,+ pele mpongo uyoozibikka kujanza lyakwe lyalumwensyi.+
34 “Mpoonya Mwami uyakwaambila baabo bali kululyo lwakwe kuti: ‘Amuboole, nywebo nomulelekedwe a Taata, amukone Bwami mbomwakabambilwa kuzwa kumatalikilo aanyika.*
35 Nkaambo nindakafwa nzala mwakandipa cakulya; nindakafwa nyota mwakandipa maanzi. Ndakali mweenzu eelyo mwakanditambula camaanza obilo;+
36 nindakali mantanda* mwakandisamika.+ Ndakali mulwazi eelyo mwakandilanganya. Ndakali muntolongo eelyo mwakandiswaya.’+
37 Lino baluleme bayoomwiingula kuti: ‘O Mwami, ino ndiilili notwakakubona kofwide nzala akukupa cakulya, naa kofwide nyota akukupa maanzi?+
38 Ino ndiilili notwakakubona koli mweenzu kumane twakutambula camaanza obilo, naa koli mantanda kumane twakusamika?
39 Ino ndiilili notwakakubona koli mulwazi naa koli muntolongo akukuswaya?’
40 Mukwiingula Mwami uyoobaambila kuti, ‘Ncobeni ndimwaambila kuti, akaambo kakuti mwakacita oobo kuli umwi wabaniini akati kabakwesu aaba, nkokuti mwakacitila ndime.’+
41 “Mpoonya aabo bali kulumwensyi lwakwe uyoobaambila kuti: ‘Amuzwe kulindime,+ nywebo nomusinganizyidwe, amunjile mumulilo uutamani+ ngwabambilidwe Diabolosi abangelo bakwe.+
42 Nkaambo ndakafwa nzala, pele tiimwakandipa cakulya; alimwi ndakafwa nyota, pele tiimwakandipa maanzi.
43 Ndakali mweenzu pele tiimwakanditambula camaanza obilo; ndakali mantanda, pele tiimwakandisamika; ndakali kuciswa alimwi ndakali muntolongo, pele tiimwakandilanganya pe.’
44 Mpoonya abalo bayoomwiingula kuti: ‘Mwami, ino ndiilili notwakakubona kofwide nzala naa nyota naa koli mweenzu naa koli mantanda naa kocisidwe naa koli muntolongo pele tiitwakakukutaukila?’
45 Lino uyoobaingula kuti: ‘Ncobeni ndimwaambila kuti, akaambo kakuti tiimwakacita oobo kuli umwi akati kabaniini aaba, nkokuti tiimwakacitila ndime.’+
46 Mpoonya aaba bayoonyonyoonwa* kukabe kutamani,+ pele baluleme bayootambula buumi butamani.”+
Bupanduluzi buyungizyidwe
^ Naa “bakali basongo.”
^ Talenta lyaba Giriki lyakali kulema makkilogilamu aali 20.4. Amubone Makani Aayungizyidwe B14.
^ Mu Chigiriki, “nsiliva.”
^ Mu Chigiriki, “nsiliva.”
^ Eeci caamba kuzwa kukumitwa naa kukuzyalwa kwabantu, nkokuti bana ba Adamu a Eva.
^ Naa “nindatakasamide bukkwene.”
^ Mu Chigiriki, “bayookosolwa; bayookwezyulwa.”
