Matayo 28:1-20
28 Noyakainda Sabata, nokwakali kuumbuluka mubuzuba bwakusaanguna bwansondo eeyo, Mariya Magadalene a Mariya umbi bakaboola kuti babone cuumbwe.+
2 Eelyo amubone! Kwakacitikide muzuzumo wanyika mupati, nkaambo mungelo wa Jehova* wakaseluka kuzwa kujulu alimwi wakasika akukunkulisya bbwe, mpoonya wakalikkede alindilyo.+
3 Lino wakali kulibonya mbuli lulabo, alimwi zisani zyakwe zyakali kutuba buu mbuli caanda.+
4 Inzya, akaambo kakumuyoowa balindizi bakakankama akuba mbuli bantu bafwide.
5 Pele mungelo wakaambila bamakaintu aaba kuti: “Mutayoowi pe, nkaambo ndilizyi kuti muyandaula Jesu iwakajaigwa aacisamu.+
6 Tako muno pe, nkaambo wabusyigwa kweelana ambwaakaamba.+ Amuboole mubone busena mpaakalede.
7 Lino kamuya cakufwambaana mukaambile basikwiiya bakwe kuti wabusyigwa kubafwu, amubone! Wamusolweda kuya ku Galilaya.+ Muyoomubona okuya. Amubone! Ooyu ngomulumbe wangu kulindinywe.”+
8 Aboobo cakufwambaana bakazwa kucuumbwe, kabayoowede alimwi akukkomana kapati, bakabalika kuyakwaambila basikwiiya bakwe.+
9 Lino, amubone! Jesu wakabayaanya akwaamba kuti: “Mwapona!” Bakaboola kulinguwe akumujata kumaulu akumufwugamina.*
10 Mpoonya Jesu wakati kulimbabo: “Mutayoowi! Kamuya, mukabaambile bakwesu kuti baunke ku Galilaya, eelyo ooko bayoondibona.”
11 Lino nobakali munzila, balindizi bamwi+ bakanjila mumunzi akwaambila basilutwe babapaizi zintu zyoonse zyakacitika.
12 Mpoonya aaba nobakamana kubungana abaalu akupangana, bakapa basikalumamba mali aansiliva aali mbwaabede
13 akwaamba kuti: “Amukaambe kuti, ‘Basikwiiya bakwe bakaboola masiku akumubba notwakali koona.’+
14 Alimwi ikuti naa eeci akacimvwe mweendelezi tuyoomupandulwida makani mbwaabede,* aboobo nywebo tamweelede kulibilika.”
15 Aboobo bakabweza mali aansiliva akucita mbuli mbobakalaililwa, alimwi makani aaya amwaigwa koonse-koonse akati kaba Juda kusikila sunu.
16 Pele basikwiiya ibali 11 bakaya ku Galilaya+ kucilundu ooko Jesu nkwaakabalailide kuti bakaswaangane.+
17 Nobakamubona, bakamufwugamina,* pele bamwi bakadooneka.
18 Jesu wakaboola akubaambila kuti: “Ndapegwa nguzu zyoonse kujulu alimwi aanyika.+
19 Aboobo kamuya mukayiisye bantu bazisi zyoonse+ kuti babe basikwiiya, akubabbapatizya+ muzina lya Taata alya Mwana alya muuya uusalala,
20 mukabayiisye kutobela zintu zyoonse nzyondakamulailila.+ Alimwi amubone! Ndilaandinywe mazuba oonse mane kusikila kumamanino aabweende bwazintu.”*+
Bupanduluzi buyungizyidwe
^ Amubone Makani Aayungizyidwe A5.
^ Naa “akumukotamina.”
^ Mu Chigiriki, “tuyoomukombelezya.”
^ Naa “bakamukotamina.”
^ Naa “aaciindi.” Amubone Bupanduluzi Bwamabala.
