Matayo 8:1-34
8 Naakaseluka aacilundu, makamu-makamu aabantu akamutobela.
2 Eelyo sicinsenda wakaboola akumufwugamina,* akwaamba kuti: “Mwami, ikuti koyanda, ulakonzya kundisalazya.”+
3 Aboobo wakatandabika janza lyakwe, wamujata akumwaambila kuti: “Ndilayanda! Kosalazyigwa.”+ Mpoonya aawo wakasalazyigwa kucinsenda cakwe.+
4 Eelyo Jesu wakamwaambila kuti: “Utaambili muntu naba omwe,+ pele koya ukalitondezye kumupaizi+ akupa cipego eeco Musa ncaakaamba+ kutegwa bukabe bumboni kulimbabo.”
5 Naakanjila mu Kapernauma, silutwe wabasikalumamba wakaboola kulinguwe akumukombelezya+
6 kaamba kuti: “Mwami, mubelesi wangu ulilede muŋanda, ulilebukide mubili alimwi ulipengede kapati.”
7 Wakamwaambila kuti: “Ndasika ooko ndilamuponya.”
8 Silutwe wabasikalumamba wakaingula kuti: “Mwami, tandeeleli mebo kuti unjile muŋanda yangu, pele koile kwaamba buyo jwi eelyo mubelesi wangu ulapona.
9 Nkaambo andime ndili muntu weendelezyegwa, ndilijisi basikalumamba mbondeendelezya alimwi naa ndaambila yooyu kuti, ‘Koya!’ ulaunka, alimwi naa ndaambila umbi kuti, ‘Boola!’ ulaboola, amuzike wangu ndamwaambila kuti, ‘Cita ceeci!’ ulacicita.”
10 Jesu naakamvwa boobo, wakagambwa eelyo wakaambila baabo ibakali kumutobela kuti: “Ncobeni ndimwaambila kuti, kunyina muntu ngondajana mu Israyeli uulaalusyomo lupati luli boobu.+
11 Pele ndimwaambila kuti banji kuzwa kujwe akumbo bayooboola akukkala kutebulu antoomwe a Abrahamu, Izaka a Jakobo mu Bwami bwakujulu;+
12 kakuli balo bana ba Bwami bayoosowelwa anze mumudima. Ooko nkobaya kulilila akulumina ntwino.”+
13 Eelyo Jesu wakaambila silutwe wabasikalumamba kuti: “Koya. Akube boobo kulinduwe kweelana alusyomo ndootondezya.”+ Aboobo mubelesi ooyo wakapona aciindi nciconya eeco.+
14 Lino Jesu naakasika muŋanda ya Petro, wakabona banyinazyala Petro+ kabalede akaambo kakupya mubili.+
15 Aboobo wakabajata kujanza,+ eelyo mubili wakaleka kupya, mpoonya bakabuka akutalika kumukutaukila.
16 Nokwakaba kumangolezya, bakamuletela bantu ibanji banjidwe madaimona; eelyo wakaitanda myuuya kwiinda mukwaamba buyo jwi, alimwi wakabaponya boonse aabo ibakali kuciswa,
17 ikutegwa azuzikizyigwe majwi aakaambwa kwiinda mumusinsimi Isaya kuti: “Ooyo wakabweza macise eesu akutola malwazi eesu.”+
18 Jesu naakabona nkamu yabantu yakamuzingulukide, wakalailila basikwiiya bakwe kuti bazabukile mutala eliya.+
19 Eelyo mulembi umwi wakaboola akumwaambila kuti: “O Mwiiyi, ndilakutobela kufwumbwa nkoya.”+
20 Aboobo Jesu wakamwaambila kuti: “Bamwaaba balijisi malyango abayuni bamujulu balijisi ziteente, pele Mwanaamuntu tajisi aakubikka mutwe wakwe.”+
21 Mpoonya umwi wabasikwiiya wakamwaambila kuti: “Mwami, koleka saansi nduunke ndikaakuzikke bataata.”+
22 Jesu wakamwaambila kuti: “Kozumanana kunditobela, alimwi kobaleka bafwu bazikke bafwu babo.”+
23 Eelyo naakatanta mubwato, basikwiiya bakwe bakamutobela.+
24 Lino kwakabuka guwo pati mulwizi cakuti mayuwe akali kunjila mubwato; pele walo wakalilede.+
25 Eelyo bakaboola bamubusya kabaamba kuti: “Mwami, kotuvwuna, twafwa!”
26 Pele wakababuzya kuti: “Nkaambo nzi ncomuyoowede boobu nywebo nobasilusyomo luniini?”+ Mpoonya wakanyamuka akukalalila guwo alwizi, eelyo kwakaumuna wi.+
27 Aboobo baalumi aabo bakagambwa akwaamba kuti: “Ino ooyu muntu uuli buti? Noliba guwo alimwi alwizi zilamumvwida.”
28 Lino naakasika mutala, mucooko caba Gadara, kwakamuswaanganya bantu bobilo banjidwe madaimona kabazwa kunamaumbwe.+ Bakali kuyoosya kapati cakuti kunyina wakali kukonzya kwiinda nzila eeyo.
29 Eelyo bakakwiila, balaamba: “Ino tujisi kaambo nzi anduwe, O Mwana wa Leza?+ Sena waboola kuzootupenzya+ kacitanasika ciindi?”+
30 Alaale kuzwa mpobakabede, kwakali tanga lyangulube izyakali kucela.+
31 Mpoonya madaimona akatalika kumukombelezya kuti: “Ikuti naa ututande, kotutandila mutanga lyangulube.”+
32 Wakati kulingawo: “Kamuya!” Aboobo akazwa akuyoonjila mungulube, eelyo tanga lyoonse lyakabalikila mujeleele akusotokela mulwizi akufwa mumaanzi.
33 Pele beembezi bakatija, alimwi nobakanjila mumunzi, bakaluula zyoonse kubikkilizya amakani aabantu bakanjidwe madaimona.
34 Aboobo bantu boonse mumunzi bakaboola kuli Jesu, eelyo nobakamubona, bakamukombelezya kuti azwe mucooko cabo.+
Bupanduluzi buyungizyidwe
^ Naa “akumukotamina.”
