Mika 1:1-16
1 Ndeeli jwi lya Jehova ilyakamusikila Mika*+ waku Moresati mumazuba aa Jotamu,+ Ahazi,+ a Hezekiya,+ ibami ba Juda,+ alimwi ndyaakaambilwa mucilengaano cijatikizya Samariya a Jerusalemu:
2 “Amumvwe, nywebo nobantu nyoonse!
Kobikkila maano, yebo onyika azintu zyoonse zili mulinduwe,Amuleke Mwami Singuzuzyoonse Jehova abe kamboni kumulandu wanu+—Jehova abe kamboni kuzwa mutempele lyakwe lisalala.
3 Nkaambo amubone! Jehova ulazwa mubusena bwakwe;Alimwi ulaseluka ansi akulyatauka masena aasumpukide aanyika.
4 Aboobo malundu alanyenguluka kunsi aamaulu aakwe,+Aalo makkuti* alaandukaMbuli bunzuka bweenzemuka mumulilo,Mbuli maanzi aapoomoka kujeleele.
5 Zyoonse eezyi zyacitika akaambo kabuzangi bwa Jakobo,+Akaambo kazibi zyabamuŋanda ya Israyeli.
Ino buzangi bwa Jakobo ninzi?
Sena tali Samariya?+
Alimwi ino masena aakukombela aa Juda ninzi?+
Sena tali Jerusalemu?
6 Ndiyoocita kuti Samariya abe zitantaala buyo musyokwe,Busena bulimwa myuunda yamisaansa;Mabwe aakwe ndiyakwaafwusila* mukkuti,Azyalo ntalisyo zyakwe ndiyoozibikka antangalala.
7 Zikozyanyo zyakwe zyoonse zibezedwe ziyoopwayaulwa,+Azyalo zipego zyoonse nzyapegwa kazili muulo wakumubbadela*+ ziyakuumpwa mumulilo.
Mituni yakwe yoonse ndiyakwiinyonyoona.
Nkaambo wakalijanina zintu eezyi kubelesya mali aabuvwuule,Kumane alimwi ziyooba mali aabbadelwa bavwuule.”
8 Akaambo kaceeci ndiyoolila akoomoka;+Ndiyakweenda amampata alimwi amantanda.+
Ndiyoowuula mbuli bamwaaba,Akulila mbuli mbozilila mpowani.
9 Nkaambo cilonda cakwe tacisilikiki;+Cakomena akusika mane ku Juda.+
Cilwazi casakana akusika kumulyango wabantu bangu, ku Jerusalemu.+
10 “Mutaambilizyi makani aaya mu Gati;Tamweelede kulila pe.
Amwaalabane mulusuko ku Beti-afira.*
11 Amuzabuke kamuli mantanda alimwi kazimujisi nsoni, nywebo nomukkala mu Safira.
Bantu bakkala ku Zanana tiibazwa pe.
Beti-ezeli wakali mayubilo aanu, pele lino kulila nkokuyoolimvwisya buyo kulikke ooko.
12 Bantu bakkala mu Maroti bali kulindila bubotu,Pele kumulyango wa Jerusalemu kwaboola cintu cibi kuzwa kuli Jehova.
13 Amukobeke nkalaki kucipani camabbiza, nywebo nomukkala ku Lakisi.+
Ndendinywe mwakatalisya cibi camwana musimbi wa Ziyoni,Nkaambo mulindinywe mwakajanwa milandu yabuzangi bwa Israyeli.+
14 Aboobo Moresati-gati muyoomupa zipego zyakulayana anguwe.
Maanda aaku Akizibi+ akali aakucenga bami ba Israyeli.
15 Ndiyoomuletela sikuzunda*+ nywebo nomukkala mu Maresha.+
Bulemu bwa Israyeli buyoosika nokuba ku Adulamu.+
16 Amulikulule akuligela masusu oonse akaambo kabana banu mbomuyandisya.
Amulikulule mube aminkulu mbuli sikube,*Nkaambo batolwa mubuzike kuzwa kulindinywe.”+
Bupanduluzi buyungizyidwe
^ Ooku nkufwiinsyigwa kwazina lyakuti Mikayeli naa Mikaya, lyalo ilyaamba kuti, “Nguni Uuli Mbuli Jehova?”
^ Naa “Azyalo zibanda.”
^ Mu Chihebrayo, “ndiyakwaatila.”
^ Naa “Azyalo zyakuvwola zyoonse zyamubuvwuule bwakwe.”
^ Naa “Amwaalabane mulusuko muŋanda ya Afira.”
^ Naa “sikwaatula.”
^ Ibbala lya Chihebrayo lyakabelesyegwa lilakonzya kwaamba asikwaze.
