Milimo 1:1-26
1 Ooyandwa Teyofilo, mubbuku lyakusaanguna ndakalemba zintu zyoonse Jesu nzyaakacita akuyiisya,+
2 kusikila buzuba mbwaakatolwa kujulu,+ naakamana kupa malailile kwiinda mumuuya uusalala kubaapostolo mbaakasala.+
3 Naakamana kupenga, wakalitondezya kulimbabo kali muumi kwiinda mubumboni bunji busalede.+ Bakamubona mazuba oonse aali 40, alimwi wakali kubaambila kujatikizya Bwami bwa Leza.+
4 Naakabungene ambabo wakabalailila kuti: “Mutazwi mu Jerusalemu pe,+ pele kamuzumanana kulindila ceeco Taata ncaakasyomezya,+ eeco ncomwakamvwa kulindime;
5 nkaambo ncobeni Johane wakali kubbapatizya amaanzi, pele nywebo muyoobbapatizyigwa amuuya uusalala+ kakutanainda mazuba manji kuzwa sunu.”
6 Aboobo nobakabungana, bakamubuzya kuti: “Mwami, sena ulapilusya Bwami ku Israyeli aciindi ecino?”+
7 Wakabaambila kuti: “Tauli mulimo wanu wakuzyiba ziindi naa mazuba ngabikkide Taata munguzu zyakwe mwini.+
8 Pele muyootambula nguzu muuya uusalala waakusika alindinywe,+ eelyo muyooba bakamboni+ bangu mu Jerusalemu,+ mu Judaya moonse amu Samariya,+ mane kusikila kumasena aakulamfwu kapati* aanyika.”+
9 Naakamana kwaamba zintu eezyi, kabalangilila wakatolwa kujulu eelyo kkumbi lyakamuvwumba tanaakacili kulibonya kulimbabo.+
10 Eelyo nobakali kulanga kujulu naakacili kuunka, mpoonya aawo ibaalumi bobilo ibakasamide zisani zituba+ bakaima munsi lyabo
11 akwaamba kuti: “Nobaalumi bamu Galilaya, nkaambo nzi ncomwiimvwi kamulanga kujulu? Ooyu Jesu iwatambulwa kujulu kuzwa kulindinywe uyooboola mbubonya oobu mbomwamubona kaunka kujulu.”
12 Mpoonya bakapiluka ku Jerusalemu+ kuzwa kucilundu citegwa Cilundu ca Maolifa, icili kufwaafwi a Jerusalemu, ikweendwa buyo musinzo wamubuzuba bwasabata.*
13 Nobakasika, bakaunka muŋanda yamujulu oomo mobakali kukkala. Kwakali Petro, Johane, Jakobo, Andreya, Filipo, Tomasi, Bartolomayo, Matayo, Jakobo mwana wa Alifayo, Simoni musungu, alimwi a Judasi mwana wa Jakobo.+
14 Kabajisi muzeezo omwe aaba boonse bakazumanana kupaila, antoomwe abamakaintu bamwi,+ a Mariya banyina Jesu abanabokwabo Jesu.+
15 Mumazuba aayo Petro wakanyamuka akati kababwesu (imweelwe wabantu* boonse wakali kutandila ku 120 ) akwaamba kuti:
16 “Nobaalumi, bakwesu, cakali kuyandika kuti lugwalo luzuzikizyigwe oolo ilwakaambwa amuuya uusalala mubusinsimi kwiinda muli Davida kujatikizya Judasi,+ ooyo iwakasololela baabo bakajata Jesu.+
17 Nkaambo wakali kubalilwa akati kesu+ alimwi wakapedwe caabilo mumulimo ooyu.
18 (Aboobo muntu ngoonya ooyu wakaula muunda amali ngaakabbadelwa kucibi ncaakacita,+ alimwi naakaloka kalanzyide mutwe ansi wakabbosyoka da,* eelyo zyamukati zyoonse zyakafwasukila ansi.+
19 Eeci cakazyibwa kubantu boonse bakkala mu Jerusalemu, cakuti muunda ooyo mumwaambo wabo wakaitwa kuti Akelidama, nkokuti “Muunda wa Bulowa.”)
20 Nkaambo kulilembedwe mubbuku lya Intembauzyo kuti, ‘Busena mwakkala abube matongo alimwi kutabi muntu uukkala mumo,’+ akuti, ‘Mulimo wakwe wabulangizi aucitwe amuntu uumbi.’+
21 Aboobo kulayandika kuti akati kabaalumi ibakali kweenda andiswe ciindi coonse Mwami Jesu naakali kucita milimo yakwe* akati kesu,
22 kuzwa naakabbapatizyigwa a Johane+ kusikila buzuba naakatambulwa kujulu kuzwa kulindiswe,+ umwi wabaalumi aaba weelede kuba kamboni wabubuke bwakwe antoomwe andiswe.”+
23 Aboobo bakabanda mazina aabantu bobilo, Josefa uutegwa Barsaba ooyo iwakali kwiitwa kuti Jusito, alimwi a Matiya.
24 Mpoonya bakapaila akwaamba kuti: “Jehova,* yebo oozyi myoyo yabantu boonse,+ kotutondezya ngoosala akati kabaalumi aaba bobilo
25 kuti abweze busena bwamulimo ooyu alimwi abwaapostolo, nzyaakakaka Judasi akuunka kubusena bwakwe mwini.”+
26 Aboobo bakawaala cisolo kujatikizya mbabo,+ mpoonya icisolo cakawida Matiya, eelyo wakabalilwa* antoomwe abaapostolo bali 11.
Bupanduluzi buyungizyidwe
^ Naa “kumamanino.”
^ Naa “nkamu yabantu.”
^ Naa “wakaanduka akati.”
^ Mu Chigiriki, “kweendeenda.”
^ Amubone Makani Aayungizyidwe A5.
^ Nkokuti, wakabonwa kuti ngumwi wabaapostolo bambi bali 11.
