Milimo 13:1-52
13 Lino mumbungano yaku Antiokeya kwakali basinsimi abamayi aaba:+ Barnaba, Simiyoni uutegwa Nigeri nkokuti Uusiya, Lukiya waku Kurene, Manayeni iwakali kwiiya acikolo comwe a Heroda mweendelezi wacilikiti, alimwi a Saulo.
2 Nobakali kukutaukila Jehova* akuliimya kulya, imuuya uusalala wakati: “Amundizandwide Barnaba a Saulo+ kutegwa babeleke mulimo ngondabaitila.”+
3 Mpoonya nobakamana kuliimya kulya akupaila, bakabikka maanza aabo alimbabo akubatuma.
4 Eelyo baalumi aaba ibakatumwa amuuya uusalala bakaselemuka kuya ku Selukiya, mpoonya kuzwa kooko bakatanta bwato akuunka ku Kupro.
5 Nobakasika ku Salami, bakatalika kukambauka jwi lya Leza muzikombelo zyaba Juda. Awalo Johane wakali ambabo kali mugwasyilizi.+
6 Nobakainda munsumbu yoonse mane akuyoosika ku Pafo, bakayaanya mwaalumi umwi mu Juda wiitwa kuti Bari-Jesu iwakali simabibo alimwi musinsimi mubeji.
7 Wakali amweendelezi wacooko Sergio Paulu, imwaalumi uucenjede. Wakaita Barnaba a Saulo nkaambo wakali kuyandisya kumvwa jwi lya Leza.
8 Pele Elima, simasalamuzi (oobo mbolisandululwa zina lyakwe) wakatalika kubakazya, kayanda kuti mweendelezi wacooko ooyu atamvwi majwi aalusyomo.
9 Mpoonya Saulo, ooyo alimwi uutegwa Paulo, naakazula muuya uusalala wakamulangisisya
10 akwaamba kuti: “Omuntu uuzwide musyobo uuli woonse wabumpelenge amusyobo uuli woonse wabubi, yebo omwana wa Diabolosi,+ yebo sinkondonyina wazintu zyoonse ziluleme, sena tokooleka kunyonganya nzila zibotu zya Jehova?*
11 Bona! Janza lya Jehova* lili alinduwe eelyo uloofwaala, kotaboni mumuni wazuba kwaciindi cili mbocibede.” Ndilyonya eelyo wakawidwa sikunku amudima, mpoonya wakatalika kweendeenda kayandaula muntu wakumujatilila kujanza akumweenzya.
12 Mpoonya mweendelezi wacooko naakabona cakacitika, wakaba musyomi nkaambo zyakamugambya kapati njiisyo zya Jehova.*
13 Lino Paulo abeenzinyina bakatanta bwato ku Pafo akuya ku Perge mu Pamfiliya. Pele Johane+ wakabasiya akupiluka ku Jerusalemu.+
14 Pele balo bakazumanana lweendo lwabo kuzwa ku Perge akuboola ku Antiokeya mu Pisidiya. Mpoonya nobakanjila mucikombelo+ mubuzuba bwa Sabata, bakakkala.
15 Nokwakamana kubalwa Mulawo+ alimwi a Basinsimi kubuleya, beendelezi bacikombelo bakabatumina mulomo, balaamba: “Nobaalumi, bakwesu, ikuti kakuli majwi aali oonse aakuyumya bantu ngomujisi, amwaambe.”
16 Aboobo Paulo wakanyamuka alimwi katambika ajanza lyakwe wakati:
“Nobaalumi, nobana Israyeli anywebo nobamwi nomuyoowa Leza, amuswiilile.
17 Leza wabantu aaba ba Israyeli wakasala bamataateesu, alimwi wakabasumpula bantu aaba ciindi nobakali kukkala kabali bamuzwakule mucisi ca Egepita akubagusya oomo ajanza lisumpukide.+
18 Alimwi kwaciindi citandila kumyaka iili 40 wakali kubakkazikila moyo munkanda.+
19 Naakanyonyoona zisi zili ciloba munyika ya Kanana, wakabapa nyika eeyo kuti ibe lukono lwabo.+
20 Zyoonse eezyi zyakacitika mumyaka iibalilwa ku 450.
“Kuzwa waawo wakabapa babetesi kusikila kuciindi ca Samuele musinsimi.+
21 Pele kuzwa kuciindi eeco bakali kuyanda mwami,+ eelyo Leza wakabapa Saulo mwana wa Kisi, imwaalumi wamukowa wa Benjamini,+ wakabalela kwamyaka iili 40.
22 Eelyo naakamugusya ooyu, wakabusya Davida kuti abe mwami wabo,+ ooyo ngwaakacitila bumboni akwaamba kuti: ‘Ndamujana Davida mwana wa Jese,+ imwaalumi weendelana amoyo wangu;+ walo uyoocita zintu zyoonse nzyondiyanda.’
23 Kweelana acisyomezyo cakwe, kuzwa kulunyungu lwamuntu ooyu, Leza waletela ba Israyeli mufwutuli, Jesu.+
24 Katanaboola ooyu, Johane wakakambaukide kale caantangalala kubantu boonse bamu Israyeli zyalubbapatizyo lwakali citondezyo cakweempwa.+
25 Pele Johane naakali kuyaabumanizya lweendo lwakwe, wakali kwaamba kuti: ‘Ino muyeeya kuti ndime ni? Tandili nguwe pe. Pele amubone! Umwi ulaboola munsi lyangu ooyo ngonditeeleli kwaangununa mpato zyakumaulu aakwe.’+
26 “Nobaalumi, bakwesu, nywebo nobana bamukwasyi wa Abrahamu abamwi bali akati kanu ibayoowa Leza, ijwi lyalufwutuko oolu lyatuminwa ndiswe.+
27 Nkaambo bantu bakkala mu Jerusalemu abeendelezi babo tiibakamuzyiba ooyu, pele nobakalibikka mubusena bwababetesi, bakazuzikizya zintu zyakaambwa a Basinsimi,+ zyalo izibalwa cakupozya musabata imwi aimwi.
28 Nokuba kuti kunyina nobakamujanina kaambo keelede lufwu,+ bakalomba kuli Pilato kuti ajaigwe.+
29 Lino nobakazuzikizya zintu zyoonse zilembedwe kujatikizya nguwe, bakamwaangula acisamu akumulazika mucuumbwe.+
30 Pele Leza wakamubusya kubafwu,+
31 alimwi kwamazuba manji wakali kuboneka kuli baabo mbaakeenda limwi kuzwa ku Galilaya kuya ku Jerusalemu. Aabo lino mbabakamboni bakwe kubantu.+
32 “Aboobo swebo tumwaambila makani mabotu aacisyomezyo ncobakapegwa bamatata.
33 Leza wacizuzikizya coonse kulindiswe, tobana babo, kwiinda mukubusya Jesu;+ mbubonya mbokulembedwe muntembauzyo yabili kuti: ‘Yebo uli mwanaangu; sunu mebo ndaba bauso.’+
34 Alimwi kaambo aako kakuti Leza wakamubusya kubafwu kakunyina kulangilwa kupilukila kukubola, Leza wakakaamba munzila eeyi yakuti: ‘Nywebo nobantu ndiyoomutondezya luyando lutamani ilusyomeka oolo ndundakasyomezya Davida.’+
35 Aboobo muntembauzyo imbi alimwi kwaambidwe kuti: ‘Tokalekeli uusyomeka wako kuti abole.’+
36 Davida, awalo wakabelekela Leza* muzyalani lyakwe mwini, wakoona mulufwu, wakalazikwa antoomwe abamausyi alimwi wakabola.+
37 Pele ooyo Leza ngwaakabusya tanaakabola pe.+
38 “Aboobo amuzyibe nobakwesu kuti, swebo tumwaambila zyakulekelelwa kwazibi kwiinda muli yooyu,+
39 alimwi akuti muzintu zyoonse momwatakali kukonzya kululamikwa kwiinda mu Mulawo wa Musa,+ kufwumbwa uusyoma ulalulamikwa kulinzizyo kwiinda muli Jesu.+
40 Aboobo, amucenjele kuti zitamucitikili eezyi zyakaambwa a Basinsimi kuti:
41 ‘Amulange eeci, nywebo nobasikusampaula, amugambwe, amulobe, nkaambo kuli mulimo ngondicita mumazuba aanu, imulimo ooyo ngomutakonzyi kusyoma naaceya nokuba kuti muntu uumbi wamwaambila makani oonse aajatikizya nguwo.’”+
42 Lino nobakali kuzwa, bantu bakabakombelezya kuti bakabaambile makani aaya alimwi Sabata iitobela.
43 Aboobo muswaangano wamucikombelo nowakamana, ba Juda abasandule banji ibakali kukomba Leza bakamutobela Paulo a Barnaba. Eelyo aaba nobakali kwaambaula ambabo bakabakulwaizya kuti bazumanane kweenda muluzyalo lwa Leza.+
44 Mu Sabata yakatobela munzi woonse wakatiimaninine kuboola kukuswiilila jwi lya Jehova.*
45 Ba Juda nobakabona makamu aabantu, bakazula munyono alimwi cakusampaula bakatalika kukazya zintu nzyaakali kwaamba Paulo.+
46 Mpoonya cabusicamba ba Paulo a Barnaba bakabaambila kuti: “Kwakaleelede kuti jwi lya Leza lisaangune kwaambwa kulindinywe.+ Lino mbwaanga mwalikaka alimwi mutondezya kuti tamweeleli buumi butamani, mbubo, tulamusiya tuunke kuli bamasi.+
47 Nkaambo Jehova* watulailila amajwi aaya aakuti: ‘Ndakubikka kuti ube mumuni kumasi, kuti ube lufwutuko kusikila kumagolelo aanyika.’”+
48 Nobakamvwa boobo bamasi aabo, bakakondwa akulemeka jwi lya Jehova,* alimwi boonse aabo ibakali amyoyo mibotu, ibakalibambilide kutambula buumi butamani bakaba basyomi.
49 Kunze lyaboobo, ijwi lya Jehova* lyakali kuyaabumwaigwa koonse-koonse mucisi eeco.
50 Pele ba Juda bakayunga bamakaintu balaampuwo ibakali kuyoowa Leza abaalumi balupati-pati mumunzi, eelyo bakatalika kupenzya+ Paulo a Barnaba akubatanda mucisi cabo.
51 Aboobo Paulo a Barnaba bakabakunkumwida lusuko lwakali kumaulu aabo akuunka ku Ikoniyo.+
52 Alimwi basikwiiya bakazumanana kuzula muuya uusalala akukondwa.+
Bupanduluzi buyungizyidwe
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “wakacita kuyanda kwa Leza.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
