Milimo 24:1-27
24 Nokwakainda mazuba osanwe mupaizi mupati Hananiya+ wakaboola abaalu bamwi antoomwe asimilawo umwi uutegwa Tertulo, eelyo mweendelezi bakamwaambila mulandu ngobakali kumupa Paulo.+
2 Lino naakaitwa, Tertulo wakatalika kumupa mulandu kati:
“Oolemekwa Felike, mbwaanga tukkede muluumuno kapati akaambo kanduwe akuti zintu zibotu zyalusumpuko zilacitwa mucisi eeci kwiinda mubweendelezi bwako bwabusongo,
3 ziindi zyoonse alimwi amumasena oonse tulalutambula luumuno cakulumba kapati.
4 Pele kutegwa nditakumanini ciindi, ndakulomba kuti muluzyalo lwako utuswiilile kwaciindi cisyoonto buyo.
5 Nkaambo tuzyi kuti mwaalumi ooyu ngusikubusya manyongwe+ alimwi upa bantu kubukila cisi+ akati kaba Juda boonse munyika yoonse alimwi ngomusololi wankamu yabukombi yabana Nazareta.+
6 Alimwi wakasola kusofwaazya tempele, aboobo twakamujata.+
7 *—
8 Wamubuzyisisya ulalimvwida omwini kuti nzyamasimpe zintu zyoonse eezyi nzyotumupeda mulandu.”
9 Naakaamba boobo ba Juda abalo bakanjilila kumulwana amajwi, kabazuminizya kuti zintu eezyi zyakali zyamasimpe.
10 Eelyo mweendelezi naakamuzumizya Paulo kuti aambe, walo wakaingula kuti:
“Akaambo kakuti ndilizyi kabotu kuti wali mubetesi wacisi eeci kwamyaka minji, ndilaangulukide kuliiminina.+
11 Nkaambo yebo ulakonzya kulivwuntauzyila omwini akuzyiba kuti takunainda mazuba aali 12 kuzwa ciindi mebo nindakaunka kuyookomba ku Jerusalemu;+
12 alimwi kunyina nobakandijana kandikazyanya amuntu uuli woonse mutempele nokuba kuyunga nkamu yabantu kuti italisye manyongwe, mube muzikombelo naa mubusena bumwi mumunzi woonse.
13 Alimwi kunyina nobanga bazisinizya kulinduwe zintu eezyi nzyobanditamikizya lino.
14 Pele ndilakazumina kaambo aaka kulinduwe kakuti, ndileenda kweelana anzila eeyo njibaamba kuti nkamu yabukombi yabuzangi, alimwi munzila eeyi mondibelekela mulimo uusetekene kuli Leza wabamatata,+ mbwaanga ndilazisyoma zintu zyoonse zyaambidwe mu Mulawo alimwi azilembedwe mu Basinsimi.+
15 Alimwi ndilijisi bulangizi kuli Leza, ibulangizi mbubonya mbobajisi abalo baalumi aaba, bwakuti kuyooba bubuke+ bwabantu baluleme abataluleme.+
16 Aboobo ndilasolekesya lyoonse kuba amanjezyeezya aasalala* kuli Leza akubantu.+
17 Eelyo nokwakainda myaka minji ndakasika kutegwa ndiletele bantu bamucisi cangu zipego zyaluse+ akutuula zituuzyo kuli Leza.
18 Lino nondakali kulanganya makani aaya, bakandijana mutempele kandisalazyidwe kweelana amulawo,+ pele tiindakali ankamu yabantu naa kutalisya manyongwe pe. Pele kwakali ba Juda bamwi bazwa kucooko ca Asiya
19 aabo ibali kweelede kuti kabaliko kumbele lyako akundipa mulandu ikuti ncobeni kabajisi kaambo kali koonse andime.+
20 Naa ibaalumi aaba mbabonya baliko abaambe beni mulandu ngobakandijanina nindakaimvwi kumbele lya Nkuta Mpati Yaba Juda,
21 kunze lyakaambo komwe aaka nkindakoompolola nindakaimvwi akati kabo kuti: ‘Ndilabetekwa aano sunu kumbele lyanu akaambo kabulangizi bwakubuka kwabafwu!’”+
22 Pele akaambo kakuti Felike wakalaazyi kabotu makani aajatikizya Nzila eeyi,+ wakawiimika mulandu akwaamba kuti: “Ndiyoomukosweda makani aanu aaya kufwumbwa aakusika Lusiya imweendelezi wabasikalumamba.”
23 Alimwi wakalailila silutwe wabasikalumamba kuti Paulo abikkwe muntolongo, pele kalyeendelela, akuti beenzinyina bazumizyigwe kumukutaukila.
24 Nokwakainda mazuba aali mbwaabede Felike wakasika antoomwe amukaintu wakwe imu Juda Durusila, alimwi wakatuma mulomo kwiita Paulo eelyo wakamuswiilila kujatikizya makani aakusyoma muli Kristo Jesu.+
25 Pele Paulo naakali kwaamba makani aabululami, kulilesya alimwi alubeta luboola,+ Felike wakayoowa akwaamba kuti: “Mbubo koya lino, pele ndaakujana ciindi cibotu ndiyookutumina mulomo alimwi.”
26 Aciindi nciconya eeco wakali kulangila kuti Paulo ulamupa mali aacisinka mulomo. Eeci ncaakali kumwiitila-itila alimwi akubandika anguwe.
27 Pele nokwakainda myaka yobilo, Felike wakalidwa cuuno a Porikiyo Fesito; alimwi akaambo kakuti Felike wakayanda kukkomaninwa aba Juda,+ wakamusiya muntolongo Paulo.
