Milimo 28:1-31
28 Lino nitwakafwutuka akusika mutala, twakazyiba kuti nsumbu mpotwakabede yakali kutegwa Melita.+
2 Alimwi bantu baambaula mwaambo mweenzu bakooko bakatufwida luzyalo lulibedelede. Bakakunka mulilo akututambula kabotu toonse akaambo kamvwula yakali kuwa alimwi akaambo kampeyo.
3 Pele Paulo naakabweza cileye catukuni cimwi akucibikka amulilo, akaambo kakukasaala kwakazwa cipile, wamunamatila kujanza lyakwe.
4 Lino basicisi aabo ibaambaula mwaambo mweenzu mbobakaibonena buyo nzoka nkali eeyo kailengelela kujanza lyakwe, bakatalika kwaambauzyanya kuti: “Ncobeni muntu ooyu mujayi, nkaambo nokuba kuti wafwutuka mulwizi, Bululami* tiibwamuzumizya kuzumanana kupona.”
5 Pele, wakasansa nzoka nkali eeyo mumulilo, alimwi kunyina cakacitika kulinguwe.
6 Pele bakali kulangila kuti ulazimba nokuba kuwa muzinga akufwa. Nobakalindila kwaciindi cilamfwu akubona kuti kunyina cibi cakacitika kulinguwe, bakacinca mizeezo yabo akutalika kwaamba kuti wakali leza.
7 Lino munsi-munsi abusena oobo kwakali myuunda yamuntu umwi uulemekwa munsumbu eeyo uutegwa Populiyo, alimwi wakatutambula camaanza obilo akutubamba kabotu kwamazuba otatwe.
8 Pele usyi Populiyo wakalilede akaambo kakupya mubili alimwi akusoomona kalowa, eelyo Paulo wakanjila mwaakabede akupaila, wabikka maanza aakwe alinguwe akumuponya.+
9 Eeci nocakacitika, bantu boonse ibakali kuciswa ansumbu eeyo abalo bakatalika kuboola kulinguwe akuponesyegwa.+
10 Alimwi bakatupa zipego zinji, mpoonya eelyo notwakali kutanta bwato bakatubikkila zintu zyoonse nzyotwakali kuyandika.
11 Nokwakainda myezi yotatwe twakatanta bwato ibwakalembedwe kuti “Bana Basankwa ba Zusi.” Ibwato oobo bwakazwide ku Alekizandiriya alimwi bwakali munsumbu eeyo ciindi camupeyo.
12 Nitwakasika kucito ca Surakusa, twakakkala ooko kwamazuba otatwe;
13 mpoonya kuzwa kooko twakeenda akusika ku Regiyo. Ibuzuba bwakatobela kwakaunga muwo wakumusanza, eelyo twakaakusika ku Putiyolo mubuzuba bwabili.
14 Ooko twakajana bakwesu alimwi bakatukombelezya kuti tukkale ambabo kwamazuba aali ciloba, mpoonya twakagama ku Roma.
15 Lino bakwesu bakooko nobakamvwa kuti tuli munzila, bakaboola kutucinga mane basika ku Musika wa Apiyo aku Maanda Aabeenzu Otatwe. Mbwaakababonena buyo, Paulo wakalumba Leza akuyumizyigwa.+
16 Lino nitwakasika ku Roma, Paulo wakazumizyigwa kukkala alikke kalindililwa asikalumamba.
17 Pele, nokwakainda mazuba otatwe wakabaita antoomwe baalumi balemekwa akati kaba Juda. Nobakabungana wakabaambila kuti: “Nobaalumi, bakwesu, nokuba kuti kunyina ncindakabisya kubantu nokuba kuzilengwa zyabamatata,+ ndakaangwa ku Jerusalemu akwaabwa kandili mwaange mumaanza aabana Roma.+
18 Alimwi nobakavwuntauzya,+ bakali kuyanda kundaangununa mbwaanga kwakanyina kaambo ikakali kukonzya kundipa kujaigwa nkobakajana mulindime.+
19 Pele ba Juda nobakakaka kuti ndaangununwe, ndakabona kuti kunyina cimbi ncondikonzya kucita ccita buyo kutola mulandu wangu kuli Kaisara,+ pele ikutali akaambo kakuti kuli mulandu ngondakali kuyanda kupa cisi cokwesu.
20 Aboobo akaambo kamakani aaya ndakalomba kuti ndibonane akwaambaula andinywe, nkaambo ndaangidwe nketani eeyi akaambo kabulangizi mbobajisi ba Israyeli.”+
21 Bakamwaambila kuti: “Kunyina notwakatambula magwalo kujatikizya nduwe kuzwa ku Judaya, alimwi kunyina uuli woonse akati kabakwesu bakazwa kooko wakatwaambila makani aayo nokuba kwaamba cintu cimwi cibi kujatikizya nduwe.
22 Pele twabona kuti cileelede kuti tumvwe mboyeeya, nkaambo kwaamba masimpe tulizyi kuti kumasena oonse,+ boonse baamba zintu zibyaabi kujatikizya nkamu yabukombi eeyi.”+
23 Lino bakapangana buzuba bwakuswaangana anguwe, alimwi banji bakaboola kulinguwe mubusena mwaakali kukkala. Eelyo kuzwa mafwumofwumo kusikila kumangolezya, wakabapandulwida makani kwiinda mukupa bumboni cakulomya kujatikizya Bwami bwa Leza, kutegwa abakwelelezye amakani aajatikizya Jesu+ aali mu Mulawo wa Musa+ alimwi amu Basinsimi.+
24 Bamwi bakatalika kuzisyoma zintu nzyaakaamba; pele bamwi tiibakasyoma pe.
25 Aboobo akaambo kakuti tiibakazuminana akati kabo, bakatalika kuunka mwabo-mwabo, eelyo Paulo wakaamba kaambo komwe aaka kakuti:
“Muuya uusalala wakaamba ncobeni kwiinda mumusinsimi Isaya kuli bamauso,
26 kuti, ‘Koya kubantu aaba ukabaambile kuti: “Masimpe kumvwa muyoomvwa, pele tamukamvwisyi pe, alimwi ncobeni kulanga muyoolanga, pele tamukaboni pe.+
27 Nkaambo myoyo yabantu aaba yayuma, alimwi balamvwa amatwi aabo pele tabaciti alimwi bafwinya, ikutegwa bataboni ameso aabo akumvwa amatwi aabo, akumvwisya mumyoyo yabo akusanduka kutegwa ndibaponye.”’+
28 Aboobo amuzyibe kuti makani aaya aamba mbwafwutula bantu Leza atumwa kuli bamasi;+ eelyo bayakwaaswiilila ncobeni.”+
29 *—
30 Aboobo wakazumanana kukkala ooko kwamyaka yobilo iikkwene muŋanda njaakali kulitelela mwini,+ alimwi wakali kubatambula kabotu boonse ibakali kumuswaya,
31 wakali kubakambaukila Bwami bwa Leza akuyiisya zintu zijatikizya Mwami Jesu Kristo kaangulukide kapati kwaambaula,*+ kakunyina uumukasya.
Bupanduluzi buyungizyidwe
^ Chigiriki Diʹke, ambweni kwaamba leza mukaintu sikusubula basizibi naa muzeezo buyo wabululami.
^ Amubone Makani Aayungizyidwe A3.
^ Naa “cabusicamba.”
