Milimo 4:1-37
4 Lino Petro a Johane nobakacili kwaambaula abantu, kwakabbuka bapaizi, silutwe wabalindizi baatempele alimwi aba Saduki.+
2 Aaba bakalinyemede nkaambo baapostolo bakali kuyiisya bantu alimwi akwaambilizya caantangalala kuti Jesu wakabusyigwa kuzwa kubafwu.*+
3 Aboobo bakabajata akubabikka muntolongo+ kusikila buzuba bwakatobela, nkaambo akali kale mangolezya.
4 Nokuba boobo, bantu banji akati kabaabo ibakaswiilila makani aayo bakasyoma, aboobo mweelwe wabaalumi wakali kutandila ku 5,000.+
5 Buzuba bwakatobela, beendelezi baba Juda, baalu alimwi abalembi bakabungana mu Jerusalemu,
6 antoomwe a Anasi+ silutwe wabapaizi, Kayafa,+ Johane, Alekizanda alimwi abasazinyina boonse basilutwe wabapaizi.
7 Bakaimika Petro a Johane akati kabo akutalika kubabuzya kuti: “Ninguzu zyani naa ndizina lyani ndimwakabelesya kucita ceeci?”
8 Mpoonya Petro, kazwide muuya uusalala+ wakabaambila kuti:
“Nobeendelezi babantu anobaalu,
9 ikuti obuno buzuba tubetekelwa mulimo mubotu wakacitwa kumuntu uulemene+ alimwi ikuti muyanda kuzyiba wakamuponya muntu ooyu,
10 amuzyibe nywebo nyoonse abantu bamu Israyeli boonse kuti muzina lya Jesu Kristo muna Nazareta+ ooyo ngomwakajaya aacisamu+ pele Leza ngwaakabusya kuzwa kubafwu,+ nkwiinda mulinguwe imuntu ooyu ncaimvwi kumbele lyanu kaponede.
11 Eeli ‘ndebbwe nywebo nobayaki ndyomwakabona kuti linyina mpindu ilyaba bbwe liyandika kapati lyakukkona.’*+
12 Kunze lyaboobo, kunyina lufwutuko mumuntu umbi uuli woonse, nkaambo kunyina zina limbi+ munyika ilyapegwa kubantu ndyotweelede kufwutulwa andilyo.”+
13 Lino nobakabona busicamba bwa* Petro a Johane akuzyiba kuti tiibakayiide* alimwi bakali bantu-bantu buyo,+ bakagambwa kapati. Mpoonya bakazyiba kuti bakali kweenda a Jesu.+
14 Nobakali kulanga mwaalumi ooyo wakaponesyegwa kaimvwi ambabo,+ bakabula cakwaamba.+
15 Aboobo bakabalailila kuti bazwide anze aaŋanda ya Nkuta Mpati Yaba Juda, mpoonya bakatalika kulivwiya-vwiya,
16 kabaamba kuti: “Ino tubacite buti baalumi aaba?+ Nkaambo ncobeni, bacita cintu cigambya icabonwa abantu boonse bakkala mu Jerusalemu,+ alimwi tatukonzyi kucikaka pe.
17 Nokuba boobo, ikutegwa makani aaya atazumanani kumwaika kubantu bambi, atubakonge kuti batakaambi kabili muzina eeli kumuntu uuli woonse.”+
18 Bamane kwaamba boobo bakabaita akubalailila kuti bataambi cili coonse nokuba kuyiisya muzina lya Jesu.
19 Pele Petro a Johane bakaingula kuti: “Naa cililuleme mumeso aa Leza kumvwida ndinywe muciindi cakumvwida Leza, amulisalile nobeni.
20 Pele swebo, tatukonzyi kuleka kwaamba zintu nzyotwakabona akumvwa.”+
21 Aboobo, nobakamana kubakonga lwabili, bakabaangununa mbwaanga bakanyina kaambo kali koonse kakuti babasubule alimwi bakali kuyoowa bantu,+ nkaambo bantu boonse bakali kutembaula Leza kujatikizya ceeco cakacitikide.
22 Nkaambo muntu ooyo iwakaponesyegwa munzila yamaleele wakajisi myaka yakuzyalwa yiinda ku 40.
23 Nobakaangununwa bakaunka kubasyominyina akuyoobalwiida nzyobakabaambila basilutwe babapaizi alimwi abaalu.
24 Nobakamvwa makani aaya, amoyo omwe boonse bakapaila kuli Leza balaamba:
“O Mwami Singuzuzyoonse, nduwe wakalenga julu, nyika, lwizi azintu zyoonse zili mumo,+
25 alimwi nduwe wakaamba kwiinda mumuuya uusalala kumulomo wataateesu Davida,+ mubelesi wako kuti: ‘Nkaambo nzi masi ncaakanyongana alimwi abantu ncobakali kuzinzibala kuyeeya zintu zyabuyo?
26 Bami bamunyika eeyi bakalibambila alimwi beendelezi bakabungana antoomwe kuti balwane Jehova* amunanike* wakwe.’+
27 Nkaambo ncobeni, boonse bobilo Heroda a Ponto Pilato+ antoomwe abamasi alimwi abantu bamu Israyeli bakabungana antoomwe mumunzi ooyu ikutegwa balwane mubelesi wako uusalala Jesu, ooyo ngookananika,+
28 ikutegwa bacite ceeco munguzu zyako amukuyanda kwako ncookakanzila limwi kuti cicitike.+
29 Lino Jehova,* koswiilila kukonga kwabo alimwi kopa bazike bako kuzumanana kukanana ijwi lyako cabusicamba,
30 notandabika janza lyako kuponya bantu, alimwi akucita zitondezyo azintu zigambya+ kwiinda muzina lyamubelesi wako uusalala Jesu.”+
31 Eelyo nobakamana kukombelezya* boobu, busena oomo mobakaswaangene antoomwe bwakazungaanizyigwa, alimwi boonse bakazula muuya uusalala+ eelyo bakali kwaamba ijwi lya Leza cabusicamba.+
32 Kunze lyaboobo, inkamu yabantu aabo ibakasyoma yakali amoyo omwe amuzeezo omwe, alimwi kunyina naba omwe akati kabo iwakali kwaamba kuti zintu nzyaakajisi zyakali zyakwe alikke, pele bakali kwaabana zintu zyoonse.+
33 Alimwi baapostolo bakazumanana kupa bumboni canguzu kapati kujatikizya bubuke bwa Mwami Jesu,+ alimwi luzyalo lupati lwa Leza lwakali aalimbabo boonse.
34 Mubwini kunyina wakabulide cintu akati kabo,+ nkaambo boonse ibakajisi myuunda naa maanda bakali kuzisambala akuleta mali aakajanwa,
35 akwaapa baapostolo.+ Mpoonya baapostolo bakali kwaabanya bantu, umwi aumwi kweelana akubula kwakwe.+
36 Aboobo Josefa ooyo baapostolo ngobakapa izina lyakuti Barnaba+ (ilyaamba kuti “Mwana Waluumbulizyo” lyasandululwa), imu Levi muna Kupro,
37 wakasambala nyika njaakajisi eelyo mali ngaakajana wakaaleta akwaapa baapostolo.+
Bupanduluzi buyungizyidwe
^ Naa “makani aajatikizya bubuke bwa Jesu kuzwa kubafwu.”
^ Mu Chigiriki, “mutwe wakukkona.”
^ Naa “mbobakali kwaambaula cakutayoowa ba.”
^ Nkokuti, tiibakaiya kuzikolo zyaba Rabbi; ikutali kuti tiibakacizyi kubala akulemba.
^ Amubone Makani Aayungizyidwe A5.
^ Naa “a Kristo.”
^ Amubone Makani Aayungizyidwe A5.
^ Naa “kupaila canguzu.”
