Milimo 7:1-60
7 Pele mupaizi mupati wakati: “Sena zintu eezyi nzyamasimpe?”
2 Sitefano wakavwiila kuti: “Nobaalumi, bakwesu anomatata, amuswiilile. Leza uulemekwa wakalibonya kuli taateesu Abrahamu naakali ku Mesopotamiya, katanaunka kuyookkala ku Harani,+
3 akumwaambila kuti: ‘Kozwa mucisi cako, usiye basazinyoko akuunka kucisi nconditiikutondezye.’+
4 Aboobo wakazwa kucisi caba Kasidi akuyookkala ku Harani. Mpoonya kuzwa kooko, nobakafwa bausyi,+ Leza wakamulonzyezya mucisi ecino momukkede lino.+
5 Pele kunyina naakamupa lukono luli loonse mucisi eeci, nokaba kanyika kasyoonto buyo; pele wakasyomezya kumupa nyika eeyi kaluli lukono lwakwe abaluzubo* lwakwe,+ nokuba kuti aciindi eeco tanaakajisi mwana.
6 Alimwi Leza wakamwaambila kuti baluzubo lwakwe bakali kuyooba bamuzwakule mucisi citali cabo alimwi akuti bantu bakali kuyoobacita kuba bazike akubapenzya* kwamyaka iili 400.+
7 Leza wakati, ‘Alimwi cisi eeco ncobayoobelekela mubuzike ndiyoocibeteka,+ alimwi zyaakwiinda zintu eezyi bayoozwa akuyoondikomba mubusena oobu.’+
8 “Alimwi wakamupa cizuminano cakupalulwa,+ aboobo Abrahamu wakazyala Izaka+ eelyo wakamupalula mubuzuba bwalusele,+ alimwi Izaka wakazyala* Jakobo, awalo Jakobo wakazyala basilutwe bamikwasyi* bali 12.
9 Lino basilutwe bamikwasyi aabo bakamufwida munyono Josefa,+ aboobo bakamusambala kubana Egepita.+ Pele Leza wakalaanguwe,+
10 alimwi wakamuvwuna kumapenzi aakwe oonse akumupa kukkomaninwa alimwi abusongo kumbele lya Farao mwami waku Egepita. Eelyo wakamusala kweendelezya cisi ca Egepita aŋanda yakwe yoonse.+
11 Pele kwakaba nzala mpati mu Egepita yoonse amu Kanana, inzya mapenzi mapati, alimwi bamatata tiibakali kukonzya kujana cakulya cili coonse.+
12 Pele Jakobo wakamvwa kuti kwakali cakulya* mu Egepita, eelyo wakatuma bamatata ooko ciindi cakusaanguna.+
13 Nobakaunka ciindi cabili Josefa wakalizyibya kubanabokwabo, eelyo Farao wakauzyiba mukwasyi wa Josefa.+
14 Aboobo Josefa wakatuma mulumbe ku Kanana kuyakwiita Jakobo bausyi abaluzubo lwakwe boonse,+ antoomwe bantu aabo bakali 75.+
15 Aboobo Jakobo wakaselemuka kuunka ku Egepita+ alimwi ooko nkwaakafwida,+ abalo bamatata bakafwida nkukonya ooko.+
16 Mpoonya bakabatola ku Sekemu akubazikka mucuumbwe ncaakaula Abrahamu amali aansiliva kubana ba Hamori ku Sekemu.+
17 “Ciindi nocakaswena cakuti cizuzikizyigwe cisyomezyo ncaakaambide Leza kuli Abrahamu, bantu bakazyalana akuvwula mu Egepita,
18 kusikila nokwakaba mwami uumbi mu Egepita, iwatakamuzyi Josefa.+
19 Muntu ooyu wakabelesya bucenjezu kumusyobo wesu alimwi wakasinikizya bamatata kuti balekelezye bana babo bavwanda, kutegwa batazumanani kupona.+
20 Aciindi nciconya eeco Musa wakazyalwa, alimwi wakali mubotu kapati nokuba kuli Leza.* Alimwi wakalelwa muŋanda yabausyi kwamyezi yotatwe.+
21 Pele naakalekelezyegwa,+ mwana musimbi wa Farao wakamubweza akumulela mbuli mwanaakwe wakulizyalila.+
22 Aboobo Musa wakayiisyigwa busongo boonse bwabana Egepita. Mubwini wakali anguzu mumajwi amumilimo yakwe.+
23 “Lino naakakkwanya myaka yakuzyalwa iili 40, wakayeeya kuyooswaya* banabokwabo, bana Israyeli.+
24 Lino naakabona umwi wambabo kapenzyegwa, wakamuvwuna akusubula muna Egepita kwiinda mukumujaya akaambo kayooyo wakali kupenzyegwa.
25 Wakali kuyeeya kuti ibanabokwabo balazyiba kuti Leza wakali kubapa lufwutuko kwiinda mulinguwe, pele balo tiibakaazyiba makani aaya pe.
26 Buzuba bwakatobela wakalibonya kulimbabo nobakali kulwana, eelyo wakasola kubayanzanya muluumuno, ulaamba: ‘Nobaalumi, muli babunyina. Nkaambo nzi ncomupenzyanya boobu?’
27 Pele ooyo wakali kupenzya mweenzinyina wakamutonkela kooko, akwaamba kuti: ‘Nguni wakakubikka kuba mweendelezi amubetesi wesu?
28 Sena uyanda kundijaya mbubonya mbookajaya muna Egepita jilo?’
29 Naakamvwa boobo, Musa wakatija akukkala kali muzwakule mucisi ca Midiyani, ooko nkwaakaakuzyalila bana basankwa bobilo.+
30 “Nokwakainda myaka iili 40, imungelo wakalibonya kulinguwe mumulilo uuyaka mucitewo camamvwa kali munkanda ya Cilundu ca Sinai.+
31 Musa naakabona ceeci, wakagambwa kapati. Pele naakaswena munsi kuti alangisisye, wakamvwa jwi lya Jehova* kaliti:
32 ‘Ndime Leza wabamauso, Leza wa Abrahamu a Izaka a Jakobo.’+ Musa wakatalika kukankama alimwi tanaakasola kabili kulangisisya.
33 Jehova* wakamwaambila kuti: ‘Kosamununa mpato kumaulu aako, nkaambo busena aawo mpoimvwi bulasalala.
34 Masimpe ndaabona mapenzi aabantu bangu ibali mu Egepita, alimwi ndakumvwa kutongela kwabo,+ aboobo ndilaseluka kutegwa ndibavwune. Lino koboola ndikutume ku Egepita.’
35 Musa ngomunya ooyu ngobakakaka kabati: ‘Nguni wakakubikka kuba mweendelezi amubetesi?’+ ngonguwe ngwaakatuma Leza+ kuti abe mweendelezi amuvwuni kwiinda mujanza lyamungelo iwakalibonya kulinguwe mucitewo camamvwa.
36 Mwaalumi ooyu ngonguwe wakabagwisya,+ wakacita zintu zigambya azitondezyo mu Egepita+ aku Lwizi Lusalala,+ alimwi amunkanda kwamyaka iili 40.+
37 “Ooyu ngo Musa wakaambila bana Israyeli kuti: ‘Leza uyoomubusizya musinsimi uuli mbuli ndime akati kabanabokwanu.’+
38 Ooyu ngonguwe iwakali akati kambungano munkanda antoomwe amungelo+ iwakaambaula anguwe+ aa Cilundu ca Sinai naakali abamatata, alimwi wakatambula majwi aasetekene aatamani kuti amupe.+
39 Bamatata bakakaka kumuswiilila, pele bakamuyumbila ambali+ alimwi mumyoyo yabo bakapiluka ku Egepita,+
40 kabati kuli Aroni: ‘Kotupangila baleza batusololele. Nkaambo tatuzyi camucitikila Musa ooyu iwakatusololela kutugusya mucisi ca Egepita.’+
41 Aboobo bakapanga moombe kumazuba aayo akuleta cipaizyo kumutuni ooyo, mpoonya bakatalika kusekelela amilimo yamaanza aabo.+
42 Aboobo Leza wakabafwutatila akubaleka kuti bakombe makamu aakujulu+ mbubonya mbokulembedwe mubbuku lya Basinsimi kuti: ‘Nobaŋanda ya Israyeli, sena ndime ngomwakali kutuulila zituuzyo azipaizyo kwamyaka iili 40 munkanda?
43 Peepe, pele mwakali kunyamuna tente lya Moloki+ amutuni wanyenyeezi yaleza Refano, izikozyanyo nzyomwakalipangila kutegwa kamukomba. Aboobo ndiyoomutandila kule kwiindilila ku Babuloni.’+
44 “Bamatata bakajisi tente lyabumboni munkanda, mbubonya Leza mbwaakalailila naakali kwaambaula a Musa kuti alipange kweelana acitondezyo ncaakabona.+
45 Alimwi bamatata bakalikona kuli bamausyi eelyo bakalileta antoomwe a Joshua munyika yabamasi,+ aabo Leza mbaakatanda kumbele lyabamatata.+ Lyakazumanana ooko mane kusikila kumazuba aa Davida.
46 Wakali kukkomaninwa a Leza, alimwi wakalomba kupegwa coolwe cakuyakila Leza wa Jakobo ŋanda yakukkala.+
47 Pele ngu Solomoni iwakamuyakila ŋanda.+
48 Nokuba boobo, Mupatikampatila takkali mumaanda aayakidwe amaanza,+ mbubonya musinsimi mbwaamba kuti:
49 ‘Ijulu ncuuno cangu cabwami,+ eelyo nyika ncilyatilo camaulu aangu.+ Ino niŋanda yamusyobo nzi njomuyoondiyakila? Jehova* mbwaamba. Naa, ino buli kuli busena bwangu bwakulyookezyela?
50 Sena talili janza lyangu lyakapanga zintu eezyi zyoonse?’+
51 “Nywebo nobasicinguni alimwi batapalwidwe mumyoyo akumatwi, lyoonse mulaukazya muuya uusalala; mbubonya mbobakacita bamauso, anywebo mbomucita.+
52 Nguni akati kabasinsimi ngobatakapenzya bamauso?+ Inzya, bakabajaya aabo bakasinsima kujatikizya kuboola kwamululami ooyo,+ ooyo lino nywebo ngomwakaaba akujaya,+
53 nywebo nomwakatambula Mulawo wakapegwa kwiinda mubangelo+ pele ngomutatobeli pe.”
54 Lino nobakamvwa makani aaya, bakanyema kapati mumyoyo yabo* akutalika kumulumina ntwino.
55 Pele walo kazwide muuya uusalala, wakalanga kujulu akubona bulemu bwa Leza a Jesu kaimvwi kujanza lya Leza lyalulyo,+
56 eelyo wakati: “Amubone! Ndibwene julu lijalukide a Mwanaamuntu+ kaimvwi kujanza lya Leza lyalulyo.”+
57 Nobakamvwa boobo bakoompolola ajwi pati akulisinka mumatwi amaanza aabo, mpoonya caantoomwe boonse bakabalikila kulinguwe.
58 Nobakamusowela kunze aamunzi, bakatalika kumupwaya mabwe.+ Bakamboni+ bakabikka zisani zyabo zyaatala kumaulu aamulombwana uutegwa Saulo.+
59 Nobakali kumupwaya mabwe Sitefano, walo wakalomba kuti: “O Mwami Jesu, kotambula muuya wangu.”
60 Mpoonya kafwugeme, wakoompolola ajwi pati ulaamba: “Jehova,* utabapi mulandu kucibi eeci.”+ Eelyo naakamana kwaamba majwi aaya wakoona mulufwu.
Bupanduluzi buyungizyidwe
^ Mu Chigiriki, “ambuto.”
^ Naa “akubatundulula.”
^ Naa ambweni, “wakacita mbubonya kuli.”
^ Naa “bamatata.”
^ Naa “kwakali maila.”
^ Naa “wakali mubotu mumeso aa Leza.”
^ Naa “kuyoolingula.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “myoyo yabo yakacisa kapati.”
^ Amubone Makani Aayungizyidwe A5.
