Milimo 8:1-40
8 Saulo awalo wakakuzuminizya kujaigwa kwa Sitefano.+
Ibuzuba oobo mbungano iyakali mu Jerusalemu yakatalika kupenzyegwa kapati; eelyo basikwiiya boonse bakamwaikila mumasena oonse aamu Judaya a Samariya, kwakasyaala buyo baapostolo.+
2 Pele baalumi bamwi bakombi bakamubweza Sitefano akuyoomuzikka, alimwi bakamulila kapati.
3 Pele Saulo wakatalika kupenzya mbungano ciyoosya. Wakali kunjila muŋanda aŋanda kayaabukwelaanya baalumi abamakaintu akubatola kuntolongo.+
4 Pele aabo bakamwaikide bakainda koonse-koonse kabayaabwaambilizya makani mabotu aajwi lya Leza.+
5 Filipo wakaselemukila kumunzi wa Samariya+ akutalika kubakambaukila makani aa Kristo.
6 Lino makamu aabantu oonse akali kubikkila maano kuzintu nzyaakali kwaamba Filipo kumwi kabaswiilila akulangilila zitondezyo nzyaakali kucita.
7 Nkaambo bantu banji bakajisi myuuya iisofweede, alimwi eeyi yakali koompolola ajwi pati akuzwa mulimbabo.+ Kunze lyaboobo, bantu banji ibakalebukide mibili alimwi abalemene bakaponesyegwa abalo.
8 Aboobo bantu bakakondwa kapati mumunzi ooyo.
9 Lino mumunzi ooyo kwakali mwaalumi umwi uutegwa Simoni, walo kacitanasika ciindi eeci wakali simasalamuzi alimwi wakali kubagambya bantu bamucisi ca Samariya, kalikankaizya kuti wakali muntu mupati.
10 Boonse buyo, kutalikila kumwana akusikila kumupati, bakali kubikkila maano kulinguwe akwaamba kuti: “Ooyu muntu Ninguzu zya Leza, eezyo izitegwa Nzipati.”
11 Aboobo bakali kubikkila maano kulinguwe nkaambo kwaciindi cilamfwu wakali kubagambya amasalamuzi aakwe.
12 Pele nobakamusyoma Filipo iwakali kwaambilizya makani mabotu aa Bwami bwa Leza+ azina lya Jesu Kristo, bakatalika kubbapatizyigwa, ibaalumi alimwi abamakaintu.+
13 Naba Simoni wakasyoma awalo, alimwi naakabbapatizyigwa, lyoonse buyo wakali kuyanzana a Filipo;+ alimwi wakali kugambwa naakali kubona zitondezyo amilimo mipati yanguzu yakali kucitika.
14 Lino ibaapostolo mu Jerusalemu nobakamvwa kuti bana Samariya bakalitambula jwi lya Leza,+ bakabatumina Petro a Johane;
15 eelyo aaba bakaselemuka kuya nkuko akuyoobapailila kuti batambule muuya uusalala.+
16 Nkaambo kunyina naba omwe akati kabo wakatambwide kale muuya uusalala, pele bakabbapatizyidwe buyo muzina lya Mwami Jesu.+
17 Mpoonya bakabikka maanza aabo aalimbabo,+ eelyo bakatalika kutambula muuya uusalala.
18 Lino Simoni naakabona kuti muuya wakali kupegwa ibaapostolo nobakali kubikka maanza aabo abantu, wakali kuyanda kubapa mali,
19 kati: “Amundipe nguzu eezyi andime, kutegwa kufwumbwa ngondibikka maanza aangu atambule muuya uusalala.”
20 Pele Petro wakamwaambila kuti: “Mali aako aansiliva aafwidilile antoomwe anduwe, nkaambo uyeeya kuti cipego ca Leza citabbadelwi inga caulwa amali.+
21 Tojisi cibeela nociba caabilo mumakani aaya, nkaambo moyo wako taululeme pe mumeso aa Leza.
22 Aboobo koempwa kububi bwako oobu, akukombelezya Jehova* kutegwa ambweni inga walekelelwa kumakanze mabi aamumoyo wako;
23 nkaambo ndabona kuti ulaandulwe iijaya* alimwi uli muzike wakutalulama.”
24 Aboobo Simoni wakati kulimbabo: “Amundikombelezyele kuli Jehova* kutegwa nditacitikilwi cintu cili coonse akati kazintu nzyomwaamba.”
25 Aboobo nobakapa bumboni cakulomya akubandika jwi lya Jehova,* bakapiluka ku Jerusalemu alimwi bakali kuyaabwaambilizya makani mabotu muminzi minji yabana Samariya.+
26 Pele mungelo wa Jehova*+ wakaambila Filipo kuti: “Nyamuka uunke kumusanza kunzila iiselemuka kuzwa ku Jerusalemu kuya ku Gaza.” (Eeyi ninzila yiinda mucimpayuma.)
27 Eelyo wakanyamuka akuunka, lino ooko wakajana muntu umwi uulemekwa* muna Etiopiya, imwaalumi wakajisi cuuno cipati mubwami bwa Kandake mwami mukaintu wabana Etiopiya alimwi nguwakali kulanganya lubono loonse lwamwami mukaintu ooyu. Wakaunkide ku Jerusalemu kuyookomba,+
28 lino wakali kupiluka kwabo alimwi wakalikkede munkalaki yakwe kabala cakupozya mubbuku lyamusinsimi Isaya.
29 Aboobo muuya wakaambila Filipo kuti: “Koya afwaafwi ankalaki eeyi.”
30 Filipo wakabalikila kumbali aankalaki alimwi wakamumvwa kabala cakupozya mubbuku lyamusinsimi Isaya, eelyo wakati: “Sena mubwini ulicizyi* eeco ncobala?”
31 Wakati: “Mubwini mbuti mbondinga ndacizyiba ikuti kakunyina uundipandulwida?” Eelyo wakalomba Filipo kuti atante munkalaki akukkala anguwe.
32 Lino cibalo ca Magwalo ncaakali kubala cakupozya nceeci: “Mbubonya mbuli mbelele wakaletwa kukujaigwa, alimwi mbuli mwanaambelele uutalili ciindi sikugela namugela boya, awalo tajaluli mulomo wakwe.+
33 Naakali kusampaulwa tanaakabetekwa cabululami.+ Ino nguni uuyakwaamba makani oonse aazyalani lyakwe? Nkaambo uyoojaigwa anyika.”+
34 Mpoonya muntu ooyo uulemekwa wakati kuli Filipo: “Ndakulomba ndaambile, ino nguni ngwaamba musinsimi kujatikizya zintu eezyi? Sena ulyaamba lwakwe mwini naa waamba muntu uumbi?”
35 Filipo wakatalika kwaambaula, eelyo kutalikila alugwalo oolu, wakamukambaukila makani mabotu aajatikizya Jesu.
36 Lino nobakali kuyaabweenda munzila, bakasika abusena aakali maanzi, eelyo muntu uulemekwa ooyo wakati: “Bona! Ngaaya maanzi; ino ncinzi cindilesya kubbapatizyigwa?”
37 *—
38 Mpoonya muntu ooyo uulemekwa wakaimika nkalaki, eelyo boonse bobilo, Filipo amuntu ooyo uulemekwa bakaseluka akunjila mumaanzi, mpoonya Filipo wakamubbapatizya.
39 Nobakazwa mumaanzi, cakufwambaana muuya wa Jehova* wakamutola kumbi Filipo, alimwi muntu ooyo uulemekwa tanaakamubona limbi Filipo, pele wakazumanana mulweendo lwakwe kakkomene kapati.
40 Pele Filipo wakaakulijana ku Asidodi, alimwi wakainda mucilawo coonse eeco akuzumanana kwaambilizya makani mabotu muminzi yoonse mane waakusika ku Kaisareya.+
Bupanduluzi buyungizyidwe
^ Amubone Makani Aayungizyidwe A5.
^ Mu Chigiriki, “ulaakalulizya.” Bamwi baamba kuti “kalulwe.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “sinkuta.”
^ Naa “ulacimvwisya.”
^ Amubone Makani Aayungizyidwe A3.
^ Amubone Makani Aayungizyidwe A5.
