Myeelwe 24:1-25
24 Balamu naakabona kuti Jehova ulayanda kulongezya bana Israyeli, kunyina naakaunka alimwi kuyoobalangawida malweza mbuli mbwaakacitide musyule,+ pele wakalanga kunkanda.
2 Mpoonya naakatambya meso aakwe akubona bana Israyeli kabakkede munkamu zyamisyobo yabo,+ muuya wa Leza wakamusikila.+
3 Mpoonya wakaamba kasimpi aaka kakuti:+
“Mboobu mbwaamba Balamu imwana wa Beori,Ambwaamba mwaalumi uuli ameso aajalukide,
4 Mbwaamba ooyo uumvwide majwi aa Leza,Iwakabona cilengaano ca Singuzuzyoonse,Iwakakotama, meso aakwe kaajalukide:+
5 Ma! Eelo kaka matente aako aleebeka, O Jakobo,Imasena mokkala O Israyeli!+
6 Alindandeme kusikila kule mbuli tulonga twamukkuti,+Mbuli myuunda iili kumbali aamulonga,Mbuli masamu aa aloye Jehova ngaakasyanga,Mbuli masamu aakkedari aali kumbali amaanzi.
7 Maanzi alakunka kuzwa muzilongo zyakwe zyobilo,Alimwi mbuto yakwe* isyangidwe kumbali amaanzi manji.+
Mwami wakwe+ uyooba mupati kwiinda Agagi,+Abwami bwakwe buyoosumpulwa.+
8 Leza wamugwisya mu Egepita;Uli mbuli meja aamunyati kulimbabo.
Uyoobanyonyoona bamasi, basikumupenzya,+Alimwi mafwuwa aabo uyakwaatyolaula alimwi uyoobavwinyauna amivwi yakwe.
9 Walandabala akulala ansi mbuli syuumbwa,Alimwi mbwaanga uli mbuli syuumbwa, nguni uunga wasola kumubusya?
Aabo bakulongezya balilongezyedwe,Alimwi aabo bakusinganya balisinganizyidwe.”+
10 Mpoonya Balaki wakakalalila Balamu. Balaki wakakamba maanza aakwe cakusampaula akumwaambila kuti: “Ndakakuletela kuti ubasinganye basinkondoma,+ pele yebo wabalongezya buya ziindi eezyi zyotatwe.
11 Anu kopiluka kwanu ino-ino. Ndakali kuyanda kukupa bulemu bupati,+ pele lino bona! Jehova wakukasya kuti upegwe bulemu.”
12 Mpoonya Balamu wakaingula Balaki kuti: “Sena batumwa bako mbookatumide tiindakabaambila kuti,
13 ‘Nokuba kuti Balaki wandipa ŋanda yakwe iimugeme iizwide nsiliva angolida, tandikonzyi* kusotoka malailile aa Jehova, mucintu cisyoonto naa cipati. Ndiyakwaamba buyo eeco Jehova ncayoondaambila’?+
14 Lino ndaunka kwesu. Boola ndikwaambile ncobayoocita bantu aaba kubantu bako kumbele aamazuba.”
15 Mpoonya wakaamba kasimpi aaka kakuti:+
“Mboobu mbwaamba Balamu imwana wa Beori,Ambwaamba mwaalumi uuli ameso aajalukide,+
16 Mbwaamba ooyo uumvwide majwi aa Leza,Uujisi luzyibo kuzwa ku Mupatikampatila,Iwakabona cilengaano ca SinguzuzyoonseCiindi naakali kukotama ansi, meso aakwe kaajalukide:
17 Ndiyoomubona, pele kutali lino;Ndiyoomubona, pele kutali ino-ino.
Muli Jakobo muyoozwa nyenyeezi,+Alimwi mu Israyeli+ muyoozwa nkoli+ yabwami.
Alimwi uyoopwayaula nkumo ya Moabu,*+Akupwayaula zipapa zyamitwe yabana balupyopyongano.
18 Edomu uyooba lukono lwakwe,+Inzya, Seiri+ uyooba lukono lwabasinkondonyina,+Eelyo Israyeli nanootondezya busicamba bwakwe.
19 Muli Jakobo muyoozwa yooyo uyakuunka kayaabuzunda,+Alimwi uyoonyonyoona kufwumbwa uyoosyaala mumunzi.”
20 Naakabona bana Amaleki, wakazumanana kwaamba kasimpi kakwe kati:
“Amaleki ngowakali musyobo mutaanzi,+Pele kumamanino uyoonyonyoonwa.”+
21 Naakabona bana Keni,+ wakazumanana kwaamba kasimpi kakwe kati:
“Cikkalilo cako cilikwabilidwe, alimwi ciyakidwe atala aandomba.
22 Nokuba boobo, umwi uyakuumpa Kaini.
Ino kusyeede ciindi cilamfwu buti kuti Asuri akutole mubuzike?”
23 Alimwi wakazumanana kwaamba kasimpi kakwe kati:
“Maawe! Nguni uyoofwutuka eelyo Leza aakucita boobo?
24 Mato ayooboola kuzwa kunkomwe ya Kitimu,+Eelyo ayoopenzya Asuri,+Alimwi ayoopenzya Eberi.
Pele awalo uyoonyonyoonwa cakumaninina.”
25 Mpoonya Balamu+ wakanyamuka akupiluka kwabo. Eelyo awalo Balaki wakaunka kwakwe.
Bupanduluzi buyungizyidwe
^ Naa “lunyungu lwakwe.”
^ Mu Chihebrayo, “kuzwa mumoyo wangu tandikonzyi.”
^ Naa “mpobe zyamutwe wa Moabu.”
