Obadiya 1:1-21
1 Nceeci cilengaano ca Obadiya:*
Mboobu mbwaamba Mwami Singuzuzyoonse Jehova kujatikizya Edomu:+
“Twamvwa mulumbe kuzwa kuli Jehova,Mutumwa watumwa akati kamasi, kaamba kuti:
‘Amunyamuke, tulibambile kuyoomulwana.’”+
2 “Bona! Ndakupa kuti ube muniini akati kamasi;Ulasampaulwa kapati.+
3 Kulisumpula kwamoyo wako kwakweena,+Yebo ookkala mumampangala aamwala,Ookkala kujulu, yebo oolyaambauzya mumoyo wako kuti,‘Nguni uukonzya kundiselusya ansi?’
4 Nokuba kuti wasumpula cuuno cako mujulu* mbuli sikwaze,Naa kubikka citeente cako akati kanyenyeezi,Ndilakonzya kukuselusya ansi kuzwa kooko,” mbwaamba Jehova.
5 “Ikuti babbi bakusikila, ikuti zigwebenga zyakuboolela masiku,(Eelo kaka inga wanyonyoonwa!)
Sena inga tiibabba buyo zyeezyo nzyobayanda?
Alimwi ikuti naa mbaasikucela misaansa ibakunjilila,Sena inga tiibasiya misaansa imwi yakuvwulula?+
6 Eelo kaka Esau wayandaulwa!
Eelo kaka lubono lwakwe lusisidwe lwalangaulwa!
7 Yebo bakutandila kumunyinza.
Boonse aabo mbobeleka limwi* bakweena.
Bantu bakkede muluumuno anduwe bakuzunda.
Aabo balya cakulya anduwe bayookuteya lunsabwe,Pele yebo tokazyibi pe.
8 Mubuzuba oobo,” mbwaamba Jehova,“Sena tandikanyonyooni basongo mu Edomu+Abapampu munyika yamalundu ya Esau?
9 Abalo basikalumamba bako bayooyoowa,+ O Temani,+Akaambo kakuti umwi aumwi wabo munyika yamalundu ya Esau uyoonyonyoonwa kwiinda mukujaigwa.+
10 Akaambo kakuti wakalwana mwanookwanu Jakobo,+Nsoni ziyookujaya,+Alimwi uyoonyonyoonwa mane kukabe kutamani.+
11 Mubuzuba obuya nookaima kumbali kolangilila buyo,Mubuzuba oobo beenzu nobakatola impi yakwe yabasikalumamba mubuzike,+Abamuzwakule nobakanjila mumulyango wamunzi wakwe alimwi nobakaumina Jerusalemu cisolo,+Yebo wakacita zintu mbuli umwi wabo.
12 Toyelede kusekelela mubuzuba bwamwanookwanu, ibuzuba nali mumause,+Toyelede kukondwa akaambo kabana Juda mubuzuba mbobanyonyooka,+Alimwi toyelede kwaambaula cakulisumpula mubuzuba mbobali mumapenzi.
13 Toyelede kunjila mumulyango wamunzi wabantu bangu mubuzuba mbobasikilwa mapenzi,+Toyelede kusekelela akaambo kamakatazyo aakwe mubuzuba mbwasikilwa mapenzi,Alimwi toyelede kutandabika janza lyako kulubono lwakwe mubuzuba mbwasikilwa mapenzi.+
14 Toyelede kwiima aandaanina nzila kutegwa ujaye bantu bakwe ibatija,+Alimwi toyelede kwaaba bantu bakwe bafwutuka mubuzuba bwamapenzi.+
15 Nkaambo buzuba bwa Jehova bwakulwana masi oonse bulaafwaafwi.+
Mbubonya mboocita, mboyoocitilwa anduwe.+
Micito yako njookacitila bamwi iyookupilukila amutwe wako.
16 Nkaambo mbubonya nywebo mbomwali kunywa atala aacilundu cangu cisalala,Mbombubo masi oonse mbwaanoonywa ciindi coonse.+
Ayoonywa akumena,Eelyo ayooba mbuli kuti kunyina naakaliko.
17 Pele a Cilundu ca Ziyoni mpobayooba aabo batija,+Alimwi ciyooba busena busalala;+Abalo bamuŋanda ya Jakobo bayookona lubono lwabo.+
18 Bamuŋanda ya Jakobo bayooba mulilo,Bamuŋanda ya Josefa bayooba mabangabanga aamulilo,Mpoonya bamuŋanda ya Esau bayooba mbuli makuba;Bayoobadoneka mulilo akubaumpa boonse,Aboobo takukabi naba omwe uuyoofwutuka akati kabamuŋanda ya Esau,+Nkaambo Jehova nguwaamba.
19 Bayookona cooko cakumusanza ca Negebi anyika yamalundu ya Esau,+Antoomwe acooko ca Sepela alimwi acisi caba Filisiti.+
Bayookona gundu lya Efraimu alimwi agundu lya Samariya,+Mpoonya Benjamini uyookona Gileadi.
20 Bantu ibakatolwa mubuzike kuzwa mumunzi ooyu uukwabilidwe+Nkokuti bana Israyeli, bayookona nyika yabana Kanana kusikila ku Zarefati.+
Alimwi bantu bakatolwa mubuzike kuzwa mu Jerusalemu, ibakali mu Sefaradi, bayookona minzi yacooko cakumusanza ca Negebi.+
21 Mpoonya bavwuni bayootanta atala aa Cilundu ca ZiyoniKutegwa bakabeteke nyika yamalundu ya Esau,+Eelyo bwami buyooba bwa Jehova.”+
Bupanduluzi buyungizyidwe
^ Nkokwaamba kuti “Mubelesi wa Jehova.”
^ Naa ambweni, “wauluka kuya mujulu.”
^ Naa “aabo bali mucizuminano anduwe.”
