Tusimpi 17:1-28
17 Kulya kankwa kayumu muluumuno nkubotu+Kwiinda ŋanda iizwide zyakulya* pele kakuli mazwanga.+
2 Mubelesi musongo uyakweendelezya mwana uucita zintu zijazya nsoni;Uyooba acaabilo calukono mbuli umwi wabanabokwabo.
3 Mpoto yakunyengulwida njansiliva alyalo bbibi lyamulilo ndyangolida,+Pele Jehova nguulingula myoyo.+
4 Muntu mubi ulaabikkila maano majwi mabi,Alimwi mubeji ulaswiilila mulaka wabunjaka.+
5 Kufwumbwa ooyo uufwubaazya mucete usampaula Mulengi wakwe.+Alimwi kufwumbwa ooyo uusekelela ciindi mweenzinyina nasikilwa mapenzi takalekwi buyo kakunyina kusubulwa.+
6 Musini wabantu bacembeede mbazyukulu babo,Alimwi bulemu bwabana mbaamausyi.*
7 Mufwubafwuba teeleli pe kwaamba ziluleme.*+
Eelo kaka cilaindila kubija imuleli* kwaamba zyakubeja!+
8 Cipego cili mbuli bbwe liyandisi kuli yooyo uucijisi;*+Kufwumbwa nkwagama, ulazwidilila.+
9 Kufwumbwa uulekelela* cibi uyandaula luyando,+Pele ooyo uuzumanana kwaamba kaambo nkeena waandaanya balongwe beni-beni.+
10 Kukalalilwa kulamunjila kapati mumoyo muntu uulaamaano+Ikwiinda kuuma mufwubafwuba ziindi zili 100.+
11 Muntu mubi uyandaula buyo buzangi,Pele uyootuminwa silunya kuti amusubule.+
12 Cilainda kubota kuyaanya munyama wabutambo uutegwa bbeya iwasweekelwa bana bakweIkwiinda kuyaanya muntu uutakwe maano abufwubafwuba bwakwe.+
13 Kufwumbwa muntu uujola bubi kububotu,Bubi tabukazwi kuŋanda yakwe pe.+
14 Kutalisya nkondo kuli mbuli kujalwida maanzi manji;*Kubwesyanya kakutanatalika, kozwa buyo aawo.+
15 Kufwumbwa muntu waamba mubi kuti tajisi mulandu ayooyo uupa muntu uululeme mulandu+—Boonse buyo ncisesemyo kuli Jehova.
16 Ino cigwasya buti kuti mufwubafwuba ulijisi ziyandika kuti ajane busongoKakuli takwe maano aakuti abujane?+
17 Mulongwe mwini-mwini ulatondezya luyando ciindi coonse,+Alimwi ngomunyoko wakazyalilwa kuti akugwasye muziindi zyamapenzi.+
18 Muntu uutakwe maano* ulasukana mumaanza akuzuminaKuba amukuli wakubbadela* cikwelete kumbele lyamweenzinyina.+
19 Muntu uuyanda mazwanga uyanda cinyonyoono.+Kufwumbwa muntu uulampya mulyango wakwe uliletela lunyonyooko.+
20 Ooyo uulaamoyo wabumpelenge takazwidilili pe,*+Awalo ooyo waambaula cabumpelenge uyoonjila mumapenzi.
21 Mwaalumi uujisi mwana mufwubafwuba ulausa;Alimwi usyi wamwana uutakwe maano takkomani pe.+
22 Moyo uukkomene musamu mubotu uuponya,+Pele kupengana mumizeezo kupa kuti muntu amaninwe nguzu.*+
23 Muntu mubi ulatambula cisinkamulomo cakusisikizya*Kutegwa anyonganye lubeta.+
24 Busongo buli kumbele lyamuntu uumvwisya zintu,Pele meso aamufwubafwuba alalanga-langa mane kumagolelo aanyika.+
25 Mwana uutakwe maano uletela bausyi mauseAlimwi ucisizya moyo* wabanyina bakamuzyala.+
26 Tacili kabotu pe kusubula* muntu uululeme,Akwalo kukwibbaula bantu balemekwa kulakazyanya acintu ciluzi.
27 Muntu uujisi luzyibo ulalijata kwaambaula,+Alimwi muntu uulaamaano ulazumanana kukkazika moyo.*+
28 Naba mufwubafwuba iwuumuna buyo uyoobonwa kuti musongo,Awalo ooyo uujala mulomo wakwe, uyoobonwa kuti ulaamaano.
Bupanduluzi buyungizyidwe
^ Mu Chihebrayo, “zipaizyo.”
^ Naa “mbazyali babo.”
^ Naa “zibotu.”
^ Naa “nkumekume.”
^ Naa “ndibbwe limupa kukkomaninwa ooyo uulijisi.”
^ Mu Chihebrayo, “uuvwumba.”
^ Naa “mbuli kujalula damu.” Mu Chihebrayo, “kusinkula maanzi.”
^ Mu Chihebrayo, “uutakwe moyo.”
^ Naa “Akusyomezya kubbadela.”
^ Mu Chihebrayo, “takajani bubotu.”
^ Naa “kuti mafwuwa ayuminine.”
^ Mu Chihebrayo, “cisinkamulomo kuzwa acamba.”
^ Mu Chihebrayo, “ulaluzya moyo.”
^ Naa “kumubbadelesya.”
^ Mu Chihebrayo, “amuuya uutontola.”
