Tusimpi 19:1-29
19 Ncibotu kuba mucete kumwi koenda kakunyina kampenda+
Kwiinda kuba mufwubafwuba akwaamba zyakubeja.+
2 Muntu uutajisi luzyibo tali kabotu pe,+Alimwi ooyo uucita zintu cakubinda* ucita cibi.
3 Bufwubafwuba bwamuntu mbobupilinganya nzila yakwe,Kumane moyo wakwe ukalalila Jehova.
4 Buvwubi bupa kuba abalongwe banji,Pele mucete naba mweenzinyina ulamutantamuka.+
5 Kamboni wakubeja takalekwi buyo kakunyina kusubulwa,+Alimwi ooyo waamba zyakubeja zyalo-zyalo takatiji pe.+
6 Mbanji bantu balikombelezya kunkumekume,*Alimwi bantu boonse mbalongwe bamuntu uupa zipego.
7 Mucete balimusulide banabokwabo boonse;+Eelo kaka balongwe bakwe baliindide kumutantamuka!+Ulabatobela kuti abalombe cintu cimwi, pele taakwe naba omwe uuvwiila.
8 Kufwumbwa ooyo uujana maano* ulaliyanda mwini.+
Alimwi kufwumbwa ooyo uuyandisya bupampu ulazwidilila.*+
9 Kamboni wakubeja takalekwi buyo kakunyina kusubulwa,Alimwi ooyo waamba zyakubeja zyalo-zyalo uyooloba.+
10 Buumi bwakulya bukkede tabumweeleli pe muntu mufwubafwuba;Eelo kaka taceeleli kumubelesi ikweendelezya basilutwe!+
11 Bupampu bwamuntu bulamulesya kufwambaana kunyema,+Alimwi cilamubotela kujatila* milandu.*+
12 Bukali bwamwami buli mbuli kuvwuluma kwasyuumbwa,*+Pele kukkomaninwa anguwe kuli mbuli mume uuli abwizu.
13 Mwana mufwubafwuba uleta mapenzi kuli bausyi,+Alimwi mukaintu uuyandisya kubwesyanya* uli mbuli ciluli citaleki kuzwizya.+
14 Iŋanda alubono zilakonwa kuzwa kumausyi,Pele mukaintu uucenjede uzwa kuli Jehova.+
15 Butolo bupa muntu koona cakufwa,Alimwi muntu mutolo unoofwa nzala.+
16 Ooyo uutobela mulawo ubamba buumi bwakwe;+Ooyo muyamba munzila zyakwe uyoofwa.+
17 Ooyo uufwida luzyalo muntu uupengede ukweletesya Jehova,+Eelyo walo uyoomupa bulumbu akaambo kazintu eezyo nzyacita.+
18 Kolaya mwanaako nokucili bulangizi,+Alimwi utabi nduwe uumupa kuti afwe.+
19 Muntu mukali uyoolunga;Ikuti naa kosola kumuvwuna, unoocita oobo cakwiinduluka-induluka.+
20 Koswiilila lulayo akuzumina kulaigwa,+Kutegwa ukabe musongo kumbele aamazuba.+
21 Minji mizeezo iili mumoyo wamuntu,Pele makanze aa Jehova ngaayoozwidilila.+
22 Cintu ciyandwa mumuntu nduyando lwakwe lutamani;+Alimwi cilainda kubota kuba mucete kwiinda kuba muntu uubeja.
23 Kuyoowa Jehova kusololela kubuumi;+Muntu uumuyoowa uloona kaliibide, kunyina cibi ciyoomucitikila.+
24 Mutolo unjizya janza lyakwe mumutiba wacakulya,Pele talipenzyi akulileta kumulomo wakwe.+
25 Komuuma sikasampusampu+ kutegwa ooyo uutakwe luzyibo acenjele,+Alimwi komusinsa muntu uulaamaano kutegwa ayungizye luzyibo.+
26 Mwana uupenzya bausyi alimwi akutanda banyinaUlajazya nsoni alimwi ulasampuzya.+
27 Mwanaangu, ikuti uleke kuswiilila lulayo,Nkokuti ulaleya kumajwi aaluzyibo.
28 Kamboni wabuyo unyansya bululami,+Alimwi mulomo wabantu babi ulya zintu zibi.+
29 Zisubulo zilindila basikasampusampu,+Azimboko zibambilidwe kukwibbaula misana yabafwubafwuba.+
Bupanduluzi buyungizyidwe
^ Mu Chihebrayo, “uubinda amaulu aakwe.”
^ Naa “kumuntu mwaabi.”
^ Mu Chihebrayo, “uujana moyo.”
^ Mu Chihebrayo, “ulajana bubotu.”
^ Mu Chihebrayo, “kulekelela.”
^ Naa “nsotoko.”
^ Naa “kwasyuumbwa uucili mwana-mwana.”
^ Naa “uukatazya.”
