Tusimpi 20:1-30
20 Waini ulasampuzya,+ bukoko bulanyonganya;+Kufwumbwa muntu uuleya akaambo kanzizyo tali musongo.+
2 Bukali bwamwami bulayoosya mbuli kuvwuluma kwasyuumbwa;*+Kufwumbwa muntu uubusya bukali bwakwe ubikka buumi bwakwe muntenda.+
3 Cimupa kuba abulemu muntu ikuti katayandi zyakukazyanya,+Pele muntu woonse mufwubafwuba momumo mwalinjizya.+
4 Mutolo talimi pe ciindi camupeyo,Aboobo unoolombelela ciindi cakutebula, ciindi natajisi cili coonse.*+
5 Mizeezo* iili mumoyo wamuntu ili mbuli maanzi aali mumugoti mulamfwu,Pele mupampu nguukonzya kwiiteka.
6 Bantu banji balaambilizya luyando lutamani ndobajisi,Pele ino nguni uukonzya kujana muntu uusyomeka?
7 Mululami uleenda mubululami bwakwe.+
Bana bakwe ibaboola musyule lyakwe balikkomene.+
8 Ciindi mwami nakkala acuuno cabwami kuti abeteke,+Ulaseba bubi boonse ameso aakwe.+
9 Nguni uunga waamba kuti: “Ndausalazya moyo wangu;+Ndilasalala kucibi cangu”?+
10 Zipimyo zyabumpelenge alimwi azyeelesyo zyakubeja,*Zyoonse buyo ncisesemyo kuli Jehova.+
11 Naba mwana musyoonto ulazyibwa kumicito yakwe,Kuti naa ulasalala alimwi uliluleme mukulilemeka kwakwe.+
12 Ikutwi kumvwa alimwi aliso libona—Zyoonse buyo Jehova nguwakazilenga.+
13 Utayandisisyi koona, buyo-buyo ulacetaala.+
Jalula meso aako, eelyo ulakkuta cakulya.+
14 Sikuula waamba kuti: “Ncibi, ncibi!”Kumane ngooyo waunka akutalika kulidunda.+
15 Kuli ngolida, alimwi amabwe mayandisi manji aamulwizi,Pele milomo yaluzyibo miyandisi kapati.+
16 Kobweza cisani cakwe, ikuti naa muntu ooyo wapa cisyomezyo cakubbadela cikwelete camweenzu;+Kobweza cizumina mulandu kulinguwe ikuti wacita boobo akaambo kamukaintu muzwakule uutalilemeki.+
17 Cakulya cijanwa munzila yabumpelenge cilamunonena muntu,Pele kumamanino mukanwa lyakwe muyoozula buyo lubwe-lubwe.+
18 Kwiinda mukubandika* makanze alazwidilila,+Alimwi kwiinda mubusolozi bwamaano* kolwana nkondo yako.+
19 Sikubejekezya uleendeenda kayaabuyubununa makani aamaseseke;+Utanoomvwani amuntu uuyandisya kuvwiya.*
20 Kufwumbwa muntu uutukila bausyi abanyina,Lambe lyakwe liyoozimwa mudima waakusika.+
21 Lukono ilusaanguna kujanwa cabusyaacivwulemwanguKumamanino talukabi cileleko pe.+
22 Utaambi kuti: “Ndilajolela cibi!”+
Syoma Jehova+ eelyo walo ulakufwutula.+
23 Zipimyo zyabumpelenge* nzisesemyo kuli Jehova,Alimwi zikkelo zyalweeno tazili kabotu pe.
24 Jehova nguusololela ntaamu zyamuntu;+Ino muntu inga waizyiba buti nzila yakwe mwini?*
25 Nkulinjizya mukakole ikuti muntu wafwambaanina kupozomoka kuti, “Cilisetekene!”+
Pele amana kukonka nayaalange-lange zijatikizyidwe.+
26 Mwami musongo ulapupulula bantu babi+Alimwi ulabaziya amavwili.+
27 Muya wamuntu ndilambe lya Jehova,Lilalingula muzizo zyakwe zyamukati.
28 Luyando lutamani alimwi akusyomeka nzyezikwabilila mwami;+Kwiinda muluyando lutamani ulakkazikizya cuuno cakwe cabwami.+
29 Bulemu bwabalombwana ninguzu zyabo,+Bweebesi bwabamadaala nimvwi zyabo.+
30 Mibundu* alimwi azilonda zyakuumwa nzyezigwisya bubi,+Alimwi zimboko nzyezipa kuti muntu asalale mumoyo.
Bupanduluzi buyungizyidwe
^ Naa “kwasyuumbwa uucili mwana-mwana.”
^ Naa ambweni, “Kuciindi cakutebula bayooyandaula pele taakwe ncobayoojana.”
^ Naa “Makanze.” Mu Chihebrayo, “Lulayo.”
^ Naa “Zipimyo zyobilo zitakozyenye alimwi azyeelesyo zyobilo zitakozyenye.”
^ Naa “mululayo.”
^ Naa “mubusolozi bwabusongo.”
^ Naa “woongelezya amilomo yakwe.”
^ Naa “Zipimyo zyobilo zitakozyenye.”
^ Naa “nzila yakutozya?”
^ Bamwi baamba kuti “mibbundu; mibunda.”
