Tusimpi 25:1-28
25 Ntootu atumwi tusimpi twa Solomoni+ ntobakalembulula* bantu ba Hezekiya+ mwami wa Juda:
2 Bulemu bwa Leza nkusisa makani aamaseseke,+Alimwi bulemu bwabami nkuvwuntauzya makani cakulomya.
3 Mbubonya majulu mbwaali malamfwu kuya mujulu alimwi anyika mboili ndamfwu kuyaansi,Ayalo myoyo yabami taizyibiki pe.
4 Kogusya tombe lyalubulo lili kunsiliva,Eelyo ilasalala cakumaninina.+
5 Komugusya mubi kumbele lyamwami,Eelyo cuuno cakwe cabwami cilakkazikizyigwa abululami.+
6 Utalipi bulemu omwini kumbele lyamwami,+Alimwi utalibikki-bikki akati kabantu balemekwa,+
7 Nkaambo cilainda kubota ikuti wakwaambila kuti, “Boola uzookkalile waano,”Muciindi cakuti akusampule kumbele lyankumekume.+
8 Utabindi kutola makani kunkuta,Nkaambo ino uyoocita buti kuti mweenzinyoko akakusampaule?+
9 Kobandika kaambo kako amweenzinyoko,+Pele utayubununi makani aamaseseke ngowakaambilwa,*+
10 Kutegwa ooyo uuswiilila atakuusyi nsoniAkuti utamwayi makani mabi* aayo aatakonzyi kujokololwa.
11 Mbuli maapele aangolida mumbale zyansilivaMbolibede jwi lyaambwa aciindi ceelede.+
12 Mbuli sikkiyo lyangolida acilisakatizyo cangolida mbotu kapatiMbwabede muntu musongo uusinsa muntu uujisi kutwi kuswiilila.+
13 Mbuli kutontola kwacaanda mubuzuba bwakutebulaMbwabede mutumwa uusyomeka kuli baabo bamutuma,Nkaambo ukatalusya simalelaakwe.+
14 Mbuli makumbi alimwi amuwo uutaleti mvwulaMbwabede muntu uulidundila cipego citako.*+
15 Kwiinda mukukkazika moyo mweendelezi wabasikalumamba ulakonzya koongelezyegwa,Alimwi mulaka mubombe ulakonzya kutyola cifwuwa.+
16 Ikuti wajana buci, kolya buyo bweelede,Nkaambo kuti waciindizya kubulya, inga wabuluka.+
17 Maulu aako ataunki tubili-tubili kuŋanda yamweenzinyoko,Kutegwa atakucimwi akukusula.
18 Mbuli nkoli, panga alimwi amuvwi uubosyaMbwabede kamboni wakubeja uubejekezya mweenzinyina.+
19 Mbuli lino lityokede naa kuulu kulemene ikusunkutaMbokubede kusyoma muntu uutasyomeki* mubuzuba bwamapenzi.
20 Mbubonya mbuli muntu uusamununa cisani mubuzuba bwampeyoAmbuli waini uupapide uutilwa aasoda*Mbwabede muntu wiimbila moyo uuside.+
21 Ikuti sinkondonyoko* kafwide nzala, komupa cakulya kuti alye;Ikuti kafwide nyota, komupa maanzi aakunywa,+
22 Nkaambo kwiinda mukucita boobo ulalundika makala aamulilo amutwe wakwe,*+Aboobo Jehova uyookupa bulumbu.
23 Muwo uuzwa kunyika uleta mvwula mpati,Awalo mulaka uuvwiya uleta busyu bukali.+
24 Ncibotu kukkala kukkona lyaciluli caŋandaKwiinda kukkala muŋanda yomwe amukaintu uuyandisya kubwesyanya.*+
25 Mbubonya maanzi aatontola mbwaalimvwisya kumuntu uukatedeMboubede mulumbe mubotu uuzwa kucisi cakulamfwu.+
26 Mbuli kasensa kamaanzi kavwundaulwa ambuli mugoti wanyonyoonwaMbwabede mululami uulibombya* kumuntu mubi.
27 Tacili kabotu pe kulya buci bunji kapati,+Alimwi tacimupi bulemu muntu kuliyandawida bulemu walo mwini.+
28 Mbuli munzi wapwaigwa, uutajisi bwaanda,Mbwabede muntu uutakonzyi kulijata kuti wanyema.*+
Bupanduluzi buyungizyidwe
^ Naa “ntobakakkopolola akubikka antoomwe.”
^ Naa “maseseke aabamwi.”
^ Naa “mamvwaamvwa aabunjaka.”
^ Mu Chihebrayo, “cipego cakubeja.”
^ Naa ambweni, “mumpelenge.”
^ Naa “aamusika.”
^ Mu Chihebrayo, “muntu uukusulide.”
^ Nkokuti, kubombya moyo wamuntu kutegwa aleke kuba amoyo muyumu.
^ Naa “uukatazya.”
^ Naa “uuyungwa.” Mu Chihebrayo, “uudadalika kumbele lya.”
^ Naa “uutakonzyi kulesya muuya wakwe.”
