Tusimpi 28:1-28
28 Ibabi balatija nokuba kuti taakwe uubatandaanya,Pele balulami mbaasicamba mbuli syuumbwa.*+
2 Ikuti kakuli kusotoka mulawo* mucisi, basilutwe bancico balazumanana kulidilana mazina,+Pele kwiinda mukugwasyigwa amuntu musongo alimwi uulaaluzyibo, silutwe ulakkala kwaciindi cilamfwu.+
3 Imucete wuunina bantu bapengede+Uli mbuli mvwula iikukulula cakulya coonse.
4 Aabo baleka kutobela mulawo balumbaizya muntu mubi,Pele aabo batobela mulawo banyemena baabo baleka kuutobela.+
5 Bantu babi tabakonzyi kubumvwisya bululami,Pele aabo bayandaula Jehova balakonzya kumvwisya zintu zyoonse.+
6 Muntu mucete iweenda kanyina kampenda mubotuKwiinda muvwubi uulaanzila zyabumpelenge.+
7 Mwana uulaamaano utobela mulawo,Pele ooyo uumvwana abalyato usampuzya bausyi.+
8 Ooyo uuvwuzya lubono lwakwe kwiinda mucinyonamucila alimwi akaloba,+Uluyobolweda buyo yooyo uufwida luzyalo bacete.+
9 Ooyo uukaka kumvwa mulawo,Nouba mupailo wakwe ulasesemya.+
10 Ooyo uupa kuti balulami basweeke akunjila munzila mbyaabi uyoowida mucilindi cakwe mwini,+Pele aabo banyina kampenda bayookona zintu zibotu.+
11 Muvwubi musongo mumeso aakwe mwini,+Pele mucete uujisi bupampu ulakonzya kumuzyiba maano aakwe.+
12 Balulami nobazunda, ciletela bulemu bupati;Pele bantu babi nobatalika kulela, bantu balatija akuyuba.+
13 Ooyo uusisa zinyonyoono zyakwe takoozwidilila pe,+Pele kufwumbwa uulyaambilila akuzileka ulafwidwa luse.+
14 Ulikkomene muntu uupakamene ciindi coonse,*Pele ooyo uuyumya moyo wakwe ulawida mumapenzi.+
15 Mbuli syuumbwa uuvwuluma amunyama wabutambo uutegwa bbeya uuvwuumukilaMbwabede muleli mubi weendelezya bantu bapengede.+
16 Musololi uutajisi bupampu tazibelesyi kabotu nguzu zyakwe,+Pele ooyo uusula mpindu iijanwa cabumpelenge uyoolampya buumi bwakwe.+
17 Muntu walemenwa mulandu wabulowa bwamuntu unootija mane akanjile mucuumbwe.*+
Kutabi muntu naba omwe uumugwasya.
18 Ooyo weenda kanyina kampenda uyoofwutuka,+Pele ooyo uulaanzila zyabumpelenge uyakuwa cakutayeeyelwa.+
19 Ooyo uulima nyika yakwe unoojisi cakulya cinji kapati,Pele ooyo uusungweede kutobela zintu zinyina mpindu uyoocetaala kapati.+
20 Muntu uusyomeka uyoojana zileleko zinji,+Pele ooyo uufwamvwaanya kujana buvwubi takoozumanana kubula mulandu.+
21 Tacili kabotu pe kutondezya lusalululo;+Pele muntu ulakonzya kubisya kutegwa ajane kakulya kaniini buyo.
22 Syaacivwulemwangu ulayandisya kuvwuba,Pele tazyi kuti bucete bulamusikila.
23 Ooyo uusinsa mweenzinyina+ kumamanino ulakkomaninwa kapati+Kwiinda yooyo uulumbaizya cakuupaupa ameso amulaka wakwe.
24 Kufwumbwa muntu uubbida bausyi abanyina akwaamba kuti, “Tacilubide pe,”+
Mweenzinyina amuntu uuleta lunyonyooko.+
25 Syaacivwulemwangu* ulabusya mazwanga,Pele ooyo uusyoma Jehova ulazwidilila.*+
26 Kufwumbwa uusyoma moyo wakwe mwini mufwubafwuba,+Pele ooyo weenda cabusongo uyoofwutuka.+
27 Kufwumbwa uupa bacete takapengi cintu nociba comwe,+Pele ooyo uujala meso aakwe kulimbabo uyootukilwa kapati.
28 Bantu babi nobatalika kulela, muntu ulayuba,Pele nobanyonyoonwa, balulami balavwula.+
Bupanduluzi buyungizyidwe
^ Naa “syuumbwa uucili mwana-mwana.”
^ Naa “buzangi.”
^ Naa “uuyoowa ciindi coonse.”
^ Naa “mucilindi.”
^ Naa ambweni, “Sikulisumpula.”
^ Mu Chihebrayo, “ulaneneya.”
