Tusimpi 29:1-27
29 Muntu uuyumya nsingo yakwe* nokuba kuti wasinswa ziindi zinji+Uyootyolwa cakutayeeyela cakuti takaponi alimwi.+
2 Balulami nobavwula, bantu balasekelela,Pele muntu mubi nalela, bantu balatongela.+
3 Muntu uuyandisya busongo ukkomanisya bausyi,+Pele ooyo weenda aabavwuule unyonyoona lubono lwakwe.+
4 Kwiinda mubululami mwami upa kuti cisi ciyume,+Pele muntu uuyanda makulo ulacinyonyoona.
5 Muntu uulumbaizya mweenzinyina cakuupaupa amesoUmuteya lunsabwe lwakuca maulu aakwe.+
6 Muntu mubi ulacegwa acinyonyoono cakwe mwini,+Pele mululami uloongolola cakukondwa alimwi ulakkomana.+
7 Mululami ulibikkide maano kukubona kuti twaambo twabacete twabetekwa bweelede,+Pele muntu mubi taciti oobo pe.+
8 Bantu balidunda balabusya manyongwe mumunzi,+Pele basongo balalesya bukali.+
9 Muntu musongo nakazyanya amufwubafwuba,Mufwubafwuba ulapozomoka kwaambaula alimwi ulafwubaazya, pele eeci tacileti luumuno pe.+
10 Bantu bafwide nyota yakutila bulowa balamusulaika muntu uunyina mulandu,*+Alimwi bayanda kujaya mululami.*
11 Mufwubafwuba ulatondezya bukali* boonse buli mumoyo wakwe,+Pele musongo ulakkazika moyo alimwi ulalijata.+
12 Muleli nabikkila maano kumakani aakubeja,Babelesi bakwe boonse baba bantu babi.+
13 Mucete alimwi amuntu uudyaaminina bamwi baleelene* mukuti:Jehova nguumunikila meso aabo boonse.*
14 Ciindi mwami nababeteka cabululami bacete,+Cuuno cakwe cabwami cinoositikide lyoonse.+
15 Muluso* alimwi akukalalila nzyezipa busongo,+Pele mwana uulekwa buyo ulajazya banyina nsoni.
16 Bantu babi nobavwula, zinyonyoono zilavwula,Pele baluleme bayoobona mbobayakuwa bantu aaba.+
17 Komulaya mwanaako eelyo ulakupa kupumuna;Alimwi ulakupa kubotelwa kapati.+
18 Eelyo nokutakwe cilengaano,* bantu balaintila,+Pele balikkomene aabo batobela mulawo.+
19 Mubelesi takoozumina kululamikwa amajwi buyo,Nkaambo nokuba kuti wamvwa, taciti ncaambilwa pe.+
20 Sena wamubona muntu wiingana kwaambaula?+
Mufwubafwuba ulijisi bulangizi kwiinda nguwe.+
21 Ikuti mubelesi kalendekezyegwa kuzwa kubwana,Kumbele aamazuba uyooba muntu uutalumbi.
22 Muntu mukali ubusya mazwanga;+Muntu uuli woonse uunyema-nyema buyo ucita zinyonyoono zinji.+
23 Kulisumpula kwamuntu kuyoomupa kucesyegwa,+Pele kufwumbwa muntu uujisi muuya wakulicesya uyoolemekwa.+
24 Ooyo uumvwana amubbi ulilisulide mwini.
Nkaambo ulakonzya kumvwa kwaambilizya kwakuti ape bumboni,* pele walo taambi makani ngazyi.+
25 Kuyoowa bantu nkulinjizya mukakole,*+Pele ooyo uusyoma Jehova unookwabilidwe.+
26 Mbanji bantu bayanda kubandika* amuleli,Pele nkuuli Jehova muntu nkwajana bululami.+
27 Muntu uucita zintu zitaluleme ncisesemyo kubalulami,+Pele muntu uululeme munzila yakwe ncisesemyo kumuntu mubi.+
Bupanduluzi buyungizyidwe
^ Naa “uuzumanana kucita nkazi.”
^ Naa “kampenda.”
^ Naa ambweni, “Pele mululami ulayanda kukwabilila buumi bwakwe.”
^ Mu Chihebrayo, “muuya.”
^ Mu Chihebrayo, “baliswaangene.”
^ Nkokuti, ulabapa buumi.
^ Naa “Kulaya; Kusubula.”
^ Naa “cilengaano cabusinsimi; ciyubunuzyo.”
^ Naa “cikonke cijatikizya kusinganizyigwa.”
^ Naa “nkuliteya kakole.”
^ Naa ambweni, “bayanda kukkomaninwa.” Mu Chihebrayo, “bayandaula busyu bwa.”
