Tusimpi 31:1-31
31 Ngaaya majwi aa Mwami Lemueli, imakani mapati ngobakamwaambila banyina kuti bamuyiisye:+
2 Ino ndikwaambile nzi, mwanaangu,Ndikwaambile nzi mwanaangu yebo ookazwa mwida lyangu,Inzya buya, ino ndikwaambile nzi yebo omwana wazikonke zyangu?+
3 Utamanini nguzu zyako kuli bamakaintu,+Nokuba kutobela nzila zinyonyoona bami.+
4 Taceeleli kubami pe, akaka Lemueli,Ncobeni taceeleli kubami pe kunywa wainiNokuba kubaleli ikwaamba kuti, “Ino buli kuli bukoko bwangu?”+
5 Kutegwa batanywi akuluba mulawo uubikkidweAlimwi akusinkilila bantu bapengede kuti batacitilwi nzyobeelede.
6 Amubape bukoko aabo balaafwaafwi kufwa+Alimwi amubape waini aabo bapengede mumoyo.*+
7 Abanywe kuti balube bucete bwabo;Bataayeeyi limbi mapenzi aabo.
8 Kobaambilila aabo batakonzyi kwaambaula;Kobaiminina kuti bacitilwe nzyobeelede aabo boonse balaafwaafwi kufwa.+
9 Koambaula, ubeteke cabululami;Bantu bapengede alimwi abacete kobaiminina kuti bacitilwe nzyobeelede.*+
א [Aleph]
10 Ino nguni uukonzya kujana mukaintu uulomene?*+
Uladula kapati kwiinda mabwe mayandisi aamulwizi.
ב [Beth]
11 Mulumaakwe ulamusyoma amoyo woonse,Alimwi kunyina cintu cibotu ncabulide mulinguwe.
ג [Gimel]
12 Mazuba oonse aabuumi bwakwe mukaintu ooyuUcitila mulumaakwe zintu zibotu kutali zibi.
ד [Daleth]
13 Ulalijanina boya bwambelele amilembo miteteete;Ulakkomana kubeleka amaanza aakwe.+
ה [He]
14 Uli mbuli mato aasimakwebo,+Ulaleta zyakulya zyakwe kuzwa kulamfwu.
ו [Waw]
15 Ulabuka kakucisiya,Akupa bamuŋanda yakwe cakulyaAlimwi akwaabila babelesi bakwe basimbi zyaabilo.+
ז [Zayin]
16 Ulayeeya zyakujana muunda mpoonya ulawuula;Ulasyanga muunda wamisaansa kubelesya nguzu zyakwe.*
ח [Heth]
17 Ulalibambila kubeleka canguzu,*+Alimwi ulayumya maanza aakwe.
ט [Teth]
18 Ubona kuti makwebo aakwe aleta mpindu;Lambe lyakwe talizimi pe masiku.
י [Yod]
19 Maanza aakwe alajata kasamu kazambailidwe ntali,Alimwi maanza aakwe alajata kasamu kakusumya.+
כ [Kaph]
20 Ulatambika janza lyakwe kumuntu uupengede,Alimwi ulavwungulula maanza aakwe kubacete.+
ל [Lamed]
21 Talibiliki kuti bamuŋanda yakwe balaandwa mpeyo akaambo kacaanda,Nkaambo boonse bamuŋanda yakwe basamide zisani zikasaala.*
מ [Mem]
22 Ulalisumina zivwumbyo zyabulo.
Zisani zyakwe nzyamilembo miteteete alimwi nzyaboya bwambelele zyacisombo.
נ [Nun]
23 Mulumaakwe ulizyibidwe kapati kumilyango yamunzi,+Ooko nkwakkala antoomwe abapati bamucisi.
ס [Samekh]
24 Ulasuma akusambala zisani zyamilembo miteteete*Alimwi ulasambala ntambo zyakulyaanga mucibuno kuli basimakwebo.
ע [Ayin]
25 Usamide nguzu abulemu,Alimwi tayoowi ziboola kumbele.*
פ [Pe]
26 Waambaula cabusongo najalula mulomo wakwe;+Mulawo waluzyalo* uli amulaka wakwe.
צ [Tsade]
27 Ulalangilila kubona mbozyeenda zintu muŋanda yakwe,Alimwi talyi cakulya cabutolo.+
ק [Qoph]
28 Bana bakwe balanyamuka akumulumbaizya;Mulumaakwe awalo ulanyamuka akumutembaula.
ר [Resh]
29 Kuli bamakaintu banji balomene,*Pele yebo, inzya yebo ulabainda boonse.
ש [Shin]
30 Kweebeka kulakonzya kweena, akubota ciwa kulakonzya kumana,*+Pele mukaintu uuyoowa Jehova ngonguwe uulumbaizyigwa.+
ת [Taw]
31 Amumupe bulumbu bwazintu nzyacita,*+Alimwi milimo yakwe aimutembaule kumilyango yamunzi.+
Bupanduluzi buyungizyidwe
^ Naa “balaamyoyo iicisa.”
^ Naa “kobabetekela twaambo twabo.”
^ Naa “uuli kabotu.”
^ Naa “zintu nzyajana.” Mu Chihebrayo, “kuzwa kumicelo yamaanza aakwe.”
^ Mu Chihebrayo, “Ulalyaanga mutusolo anguzu.”
^ Mu Chihebrayo, “bailikizya zisani.”
^ Naa “zisani zyamukati.”
^ Naa “ulaseka buzuba bwakumbele.”
^ Naa “Malailile aapegwa caluyando; Mulawo waluyando lutamani.”
^ Naa “bali kabotu.”
^ Naa “nkwabuyo.”
^ Mu Chihebrayo, “Amumupe micelo yamaanza aakwe.”
