Tusimpi 8:1-36
8 Sena busongo tabwiiti?
Sena bupampu taboompololi?+
2 Bulaimikila atala aamasena aasumpukide+ kumbali aanzila,Aamaswaanganino aamigwagwa.
3 Kumbali aamilyango yamunzi,Akumanjililo aamilyango yamunzi,Buluujisi koompolola kuti:+
4 “Ndiita ndinywe nobantu;Ijwi lyangu liita bantu boonse.*
5 Nywebo nomutajisi luzyibo, amucenjele;+Nywebo nobafwubafwuba, amube amoyo uumvwisya zintu.
6 Amuswiilile, nkaambo zintu nzyondaamba zilayandika kapati,Mulomo wangu waamba zintu ziluleme;
7 Nkaambo mulomo wangu waambaula zintu zyamasimpe caansaansi,Alimwi mulomo wangu ulasesemwa bubi.
8 Majwi oonse aazwa kumulomo wangu ngabululami.
Akati kangawo, kunyina noliba lyomwe lipilingene naa lipotene.
9 Oonse buyo aliluleme kubapampuAlimwi aliluzi kubantu bajana luzyibo.
10 Kosala lulayo lwangu ikutali nsiliva,Aluzyibo kutali ngolida mbotu kapati,+
11 Nkaambo busongo mbubotu kapati kwiinda mabwe mayandisi aamulwizi;Zintu zimbi zyoonse ziyandwa kapati tazikonzyi kweelana ambubo.
12 Mebo ndebusongo, tukkede limwi akucenjela;Ndajana luzyibo alimwi akuyeeya kabotu.+
13 Ikuyoowa Jehova caamba kusulaika bubi.+
Kulitukumuna, kulisumpula,+ nzila mbyaabi alimwi amajwi aabumpelenge,+ zyoonse buyo ndilizisulide.
14 Ndilijisi lulayo lubotu abusongo bugwasya;+Ndilaamaano+ alimwi anguzu.+
15 Akaambo kandime, bami baluujisi kweendelezya,Alimwi balupati-pati bapanga milawo iiluleme.+
16 Akaambo kandime, basilutwe baluujisi kulela,Alimwi nkumekume zilabeteka cabululami.
17 Aabo bandiyanda andime ndilabayanda,Alimwi aabo bandiyandaula balandijana.+
18 Buvwubi abulemu zilaandime,Lubono* lutamani alimwi abululami.
19 Micelo yangu mibotu kapati kwiinda ngolida, noiba ngolida iisalazyidwe,Alimwi zintu zizwa kulindime nzibotu kwiinda nsiliva mbotu kapati.+
20 Ndeendela munzila yabululami,Akati-kati kamigwagwa yakubeteka cabululami;
21 Aabo bandiyanda ndilabapa lukono lubotu kapati,Alimwi ndilazuzya ziyobwedo zyabo.
22 Jehova wakandilenga kandili matalikilo aamilimo yakwe,+Ndime ngwaakasaanguna kulenga akati kamilimo yakwe yakaindi kapati.+
23 Kuzwa kaindi eelyo ndakabikkwa,+Kuzwa kumatalikilo, inzya kuzwa ciindi nyika kaitanabako.+
24 Kakutaningaba maanzi malamfwu ndakazyalwa,+Kakutaningaba tusensa tuzwa maanzi manji.
25 Malundu kaatanabikkwa mumasena aangawo,Kakutaningaba tulundu, ndakazyalwa,
26 Kataningapanga nyika alimwi amyuunda yanjiyoAmavwunga* aanyika aakusaanguna.
27 Ciindi naakabamba julu+ ndakaliko;Eelyo naakeenga mubalo atala aamaanzi manji,+
28 Naakabikka* makumbi mujulu,Naakapanga tusensa twamaanzi malamfwu,
29 Naakalubikkila munyinza lwiziKutegwa maanzi aandulo atasotoki mulawo wakwe,+Ciindi naakabikka* ntalisyo zyanyika,
30 Ndakali kumbali lyakwe kandili mubelesi uucibwene.+
Ndime ngwaakali kuyanda kapati+ buzuba abuzuba;Ndakali kukkomana kapati kumbele lyakwe ciindi coonse;+
31 Ndakali kukkomanina nyika yakwe mbotu,Alimwi ncindakali kuyanda kapati mbana babantu.*
32 Aboobo lino, nobana bangu, amundiswiilile;Ncobeni, balikkomene aabo batobela nzila zyangu.
33 Kamumvwa kulaigwa+ kutegwa mube basongo,Alimwi mutalunyansyi lulayo pe.
34 Ulikkomene muntu ooyo uundiswiililaKwiinda mukufwuma kuboola* kumilyango yangu buzuba abuzuba,Kwiinda mukulindila kuzikunguzyo* zyamilyango yangu;
35 Nkaambo ooyo uundijana uyoojana buumi,+Alimwi ulakkomaninwa a Jehova.
36 Pele ooyo uutandibikkili maano ulalicisa alikke,Alimwi aabo bandisulide bayanda lufwu.”+
Bupanduluzi buyungizyidwe
^ Mu Chihebrayo, “liita bana babantu.”
^ Naa “Lukono.”
^ Bamwi baamba kuti “makomwe.”
^ Mu Chihebrayo, “Naakayumya.”
^ Naa “naakalailila.”
^ Naa “mbantu.”
^ Naa “Kwiinda mukulangila.”
^ Bamwi baamba kuti “minsende.”
