Zefaniya 3:1-20
3 Maawe kumunzi ooyo uuzangide, uusofweede alimwi uudyaaminina!+
2 Tiiwakaswiilila jwi;+ tiiwakazumina kulaigwa.+
Kunyina nowakamusyoma Jehova;+ tiiwakaswena afwaafwi a Leza wanguwo.+
3 Basilutwe banguwo ibali mulinguwo mbaasyuumbwa bavwuluma.+
Babetesi banguwo mbaaumpe bamasiku;Tabasiyi nociba cifwuwa cakupulukuta kusikila mafwumofwumo.
4 Basinsimi banguwo mbaasicinguni, mbampelenge.+
Bapaizi banguwo basofwaazya zintu zisalala;+Batyola mulawo.+
5 Jehova uliluleme akati kamunzi;+ taciti cintu citaluzi pe.
Lyoonse mafwumofwumo ulazyibya mbeta zyakwe ziluleme,+Taleki pe mbubonya mboutamani mumuni wazuba.
Pele muntu uutaluleme talisendi pe.+
6 “Ndakanyonyoona zisi; ingazi zyanzizyo zyamumakkona zyakanyonyoonwa.
Ndakanyonyoona migwagwa yanzizyo, cakuti kunyina muntu wakali kwiinda.
Minzi yanzizyo yakaba matongo, imunyina muntu naba omwe, imunyina muntu uuli woonse uukkala mumo.+
7 Ndakati kumunzi, ‘Masimpe uyoondiyoowa akuzumina kulaigwa,’*+
Ikutegwa busena bwanguwo bwakukkala butanyonyoonwi+—Nkaambo ndilausubula akaambo kazintu zyoonse eezyi.
Nokuba boobo bakaindila buya kuyanda kucita zintu zibi.+
8 ‘Aboobo amuzumanane kundilangila,’*+ mbwaamba Jehova,‘Kusikila buzuba mbondiyooboola kuzoosaala,*Nkaambo ndikanzide kubunganya masi, kuyobolola mami,Kuti ndaatile bukali bwangu, kunyema kwangu koonse kuvwilima mbuli mulilo;+Nkaambo nyika yoonse iyoonyonyoonwa cakumaninina+ amulilo wabusungu bwangu.
9 Nkaambo kuciindi eeco ndiyoosandula mwaambo wabantu kuba mwaambo uusalala,Kutegwa boonse kabaita zina lya Jehova,Akuti kabamubelekela calukamantano.’*+
10 Kuzwa kucooko camilonga yaku Etiopiya,Aabo bandikombelezya, nkokuti mwana musimbi wabantu bangu bamwaikide, bayoondiletela cipego.+
11 Mubuzuba oobo tokafwi nsoni peAkaambo kamicito yako yoonse eeyo njookacita nookandizangila,+Nkaambo kuciindi eeco ndiyoobagusya mulinduwe bantu balikankaizya akulisumpula;Alimwi kunyina noyoolisumpula limbi mucilundu cangu cisalala.+
12 Mulinduwe ndiyoosiya bantu ibalicesya alimwi babombe myoyo,+Eelyo bayooyuba muzina lya Jehova.
13 Ibasyeede akati kabana Israyeli+ tabakaciti zintu zitaluleme;+Tabakaambi zyakubeja pe, alimwi mukanwa lyabo tamukajaniki mulaka walweeno;Bayoolya akulyoonena, alimwi kunyina muntu naba omwe uuyoobayoosya.”+
14 Koongolola cakukondwa, omwana musimbi wa Ziyoni!
Koongolola cakukkomana, O Israyeli!+
Kokondwa akusekelela camoyo woonse, omwana musimbi wa Jerusalemu!+
15 Jehova waleka kukusubula.+
Wamutanda sinkondonyoko.+
Imwami wa Israyeli, Jehova, uli mulinduwe.+
Kunyina limbi noyakuyoowa mapenzi.+
16 Mubuzuba oobo Jerusalemu uyakwaambilwa kuti:
“Utayoowi pe, O Ziyoni.+
Maanza aako atalebuki pe.
17 Jehova Leza wako uli mulinduwe.+
Mbubonya mbuli sikalumamba singuzu, uyookufwutula.
Uyoosekelela akaambo kanduwe kakkomene kapati.+
Uyakuumuna wi muluyando lwakwe.
Uyookkomana akaambo kanduwe akoompolola calukkomano.
18 Aabo bajisi buumba akaambo kakutajanika kumapobwe aako ndiyoobabunganya antoomwe;+Tiibakaliko mulinduwe, akaambo kakunyamuna masampu aabo.+
19 Amubone! Kuciindi eeco ndiyoobweza ntaamu yakulwana boonse aabo ibakali kukupenzya;+Alimwi aabo basunkuta ndiyoobafwutula,+Abaabo bamwaikide ndiyoobabunganya antoomwe.+
Ndiyoobapa kutembaulwa akuba ampuwo*Mucisi coonse mobakali kusampaulwa.
20 Kuciindi eeco ndiyoomuleta mucisi canu,Iciindi eeco ndaakumubunganya antoomwe.
Nkaambo ndiyoomupa kuba ampuwo* alimwi akutembaulwa+ akati kabantu boonse bamunyika,Ciindi eeco ndaakubapilusya kwabo baange akati kanu nywebo kamulangilila,” mbwaamba Jehova.+
Bupanduluzi buyungizyidwe
^ Naa “kululamikwa.”
^ Naa “amuzumanane kundilindila cakukkazika moyo.”
^ Naa ambweni, “buzuba mbondiyakwiima kandili kamboni.”
^ Naa “kabamukomba calukamantano.”
^ Mu Chihebrayo, “azina.”
^ Mu Chihebrayo, “azina.”
