Zekariya 1:1-21
1 Mumwezi walusele mumwaka wabili wa Dariyo,+ ijwi lya Jehova lyakamusikila musinsimi Zekariya*+ imwana wa Berekiya imwana wa Ido, kaliti:
2 “Jehova wakabanyemena kapati bamauso.+
3 “Kobaambila kuti, ‘Mboobu mbwaamba Jehova wamakamu: “‘Amujokele kulindime,’ mbwaamba Jehova wamakamu, ‘eelyo andime ndilajokela kulindinywe,’+ mbwaamba Jehova wamakamu.”’
4 “‘Mutabi mbuli bamauso aabo basinsimi bakaindi mbobakali kukambaukila kuti: “Mboobu mbwaamba Jehova wamakamu, ‘Akaka amuleke nzila zyanu zibi amicito yanu mibyaabi.’”’+
“‘Pele balo tiibakaswiilila, alimwi tiibakandibikkila maano,’+ mbwaamba Jehova.
5 “‘Ino lino bamauso bali kuli? Alimwi sena basinsimi bakazumanana kupona lyoonse mane kukabe kutamani?
6 Nokuba boobo, majwi aangu alimwi amalailile ngondakapede babelesi bangu basinsimi akabasikila bamauso, sena tabusyi?’+ Aboobo bakapiluka kulindime akwaamba kuti: ‘Jehova wamakamu watucitila kweelana anzila zyesu alimwi amicito yesu, kweelana ambwaakakanzide kutucitila.’”+
7 Mubuzuba bwa 24 bwamwezi wa 11, nkokuti mwezi wa Sebati,* mumwaka wabili wa Dariyo,+ ijwi lya Jehova lyakamusikila musinsimi Zekariya imwana wa Berekiya imwana wa Ido kaliti:
8 “Ndakabona cilengaano masiku. Ndakabona mwaalumi katantide bbiza lisalala pyu, alimwi wakaliimvwi akati kazisamu zyamisiwe mukkuti; eelyo musyule lyakwe kwakali mabbiza aasalala pyu, aasalala-salala, alimwi aatuba.”
9 Aboobo ndakabuzya kuti: “Omwami wangu, ino aaba mbaani?”
Mungelo iwakali kwaambaula andime wakandivwiila kuti: “Ndilakutondezya ncobaiminina aaba.”
10 Mpoonya mwaalumi ooyo iwakaimvwi akati kazisamu zyamisiwe wakaamba kuti: “Aaba mbambabo Jehova mbaatuma kuti beendeende munyika.”
11 Kumane bakaambila mungelo wa Jehova iwakaimvwi akati kazisamu zyamisiwe, kuti: “Tweendeenda munyika, eelyo twajana kuti nyika yoonse ili muluumuno alimwi kunyina manyongwe.”+
12 Aboobo mungelo wa Jehova wakaamba kuti: “O Jehova wamakamu, ino kulainda ciindi cilamfwu buti yebo kotatondezyi lubomba kumunzi wa Jerusalemu alimwi akuminzi ya Juda,+ eeyo njoonyemena myaka eeyi iili 70 ?”+
13 Amajwi mabotu alimwi aaumbulizya, Jehova wakavwiila mungelo ooyo iwakali kwaambaula andime.
14 Mpoonya mungelo ooyo iwakali kwaambaula andime wakandaambila kuti: “Koongolola, waambe kuti, ‘Mboobu mbwaamba Jehova wamakamu: “Ndilisungweede kapati kujatikizya Jerusalemu alimwi a Ziyoni.+
15 Ndilinyemede kapati akaambo kazisi ziliibide,+ nkaambo mebo ndakanyema buyo asyoonto,+ pele zyalo zyakaciindizya kuleta mapenzi.”’+
16 “Aboobo, mboobu mbwaamba Jehova: ‘“Ndiyoojokela ku Jerusalemu calubomba,+ eelyo ŋanda yangu iyooyakululwa mulinguwo,”+ mbwaamba Jehova wamakamu, “alimwi ntambo yakupimya iyootandabulwa kupima Jerusalemu.”’+
17 “Koongolola alimwi, waambe kuti, ‘Mboobu mbwaamba Jehova wamakamu: “Minzi yangu iyoozula zintu zibotu alimwi; eelyo Jehova uyakuumbulizya Ziyoni alimwi,+ akusala Jerusalemu alimwi.”’”+
18 Mpoonya ndakawaala meso akubona meja one.+
19 Aboobo ndakabuzya mungelo ooyo iwakali kwaambaula andime kuti: “Ino meja aaya aamba nzi?” Wakandivwiila kuti: “Aaya ngameja aakamwaya Juda,+ Israyeli+ alimwi a Jerusalemu.”+
20 Mpoonya Jehova wakanditondezya basyaabupampu bone.
21 Aboobo, ndakabuzya kuti: “Ino aaba baboola kuzoocita nzi?”
Wakaamba kuti: “Aaya ngameja aakamwaya Juda cakuti kunyina naba omwe iwakali kukonzya kwiintamuna mutwe wakwe. Aaba bambi bayooboola kuzoobayoosya, akuzoolosya meja aazisi eezyo zyakanyamuna meja aanzizyo kulwana cisi ca Juda, kutegwa bantu bali mumo bamwaike.”
