Zekariya 10:1-12
10 “Amumulombe mvwula Jehova kuciindi camvwula yamamanino.
Jehova ngonguwe uupanga makumbi aamvwula mpati,Ngonguwe uuwisizya bantu mvwula yamucobocobo,+Alimwi nguupa boonse zisyango zyamumuunda.
2 Nkaambo mituni* yaamba zintu zyalweeno;*Abalo basikusonda babona zilengaano zyakubeja,
Baamba buyo ziloto zitagwasyi,Alimwi baile kulipenzya kuumbulizya bantu.
Nkakaambo kaako bayakwiingaila mbuli mbelele.
Bayoopenga, nkaambo kunyina mweembezi.
3 Bukali bwangu bupati bwabukila beembezi,Abalo basololi* basikupenzya ndiyoobasubula;Nkaambo Jehova wamakamu wabikkila maano kubutanga bwakwe,+ kuli bamuŋanda ya Juda,Alimwi wabacita kuba mbuli bbiza lyakwe lyabulemu munkondo.
4 Kulinguwe nkokuzwa muntu uuyandika kapati,*Kulinguwe nkokuzwa mweendelezi uugwasya,*Kulinguwe nkokuzwa buta bwankondo;Kulinguwe nkokuzwa balangizi boonse,* inzya bantu boonse aaba.
5 Aboobo bayooba mbuli basikalumamba,Ibalyatauka mankanda aamunzila ciindi cankondo.
Bayoolwana nkondo, nkaambo Jehova ulaambabo;+Eelyo basimabbiza bayoofwa nsoni.+
6 Ndiyoobasumpula bamuŋanda ya Juda,Abalo bamuŋanda ya Josefa ndiyoobafwutula.+
Ndiyoobapilusya kwabo,Nkaambo ndiyoobafwida luse;+Aboobo bayooba mbuli kuti kunyina nindakabakakide;+Nkaambo ndime Jehova Leza wabo, aboobo ndiyoobavwiila.
7 Bana Efraimu bayooba mbuli sikalumamba singuzu,Ayalo myoyo yabo iyookondwa mbuli kuti banywa waini.+
Ibana babo bayoobona akukondwa;Myoyo yabo iyookondwa muli Jehova.+
8 ‘Ndiyoobasibila mulosi akubabunganya antoomwe;Nkaambo ndiyoobanununa,+ eelyo bayoovwula,Alimwi bayoovwula mbuli mbobakavwulide kaindi.
9 Nokuba kuti ndabamwaya mbuli mbuto akati kabantu bamasi,Bayoondiyeeya kumasena aayo aakule;Bayoobukuluka antoomwe abana babo akupiluka.
10 Ndiyoobapilusya kuzwa kucisi ca EgepitaAkubabunganya antoomwe kuzwa kucisi ca Asuri;+Ndiyoobaleta kucisi ca Gileadi+ aca Lebano,Alimwi bayoobula abusena bwakukkala.+
11 Uyakwiinda mulwizi amapenzi;Alimwi uyakuuma mayuwe mulwizi;+Mpisi zyoonse zyamulonga wa Nile ziyooyuminina.
Kulisumpula kwa Asuri kuyoomanizyigwa,Ayalo nkoli yabwami ya Egepita iyooloba.+
12 Ndiyoobasumpula muli Jehova,+Alimwi bayakweendeenda muzina lyakwe,’+ mbwaamba Jehova.”
Bupanduluzi buyungizyidwe
^ Naa “baleza bamuŋanda.”
^ Naa “zyamasalamuzi; zyamizimo.”
^ Mu Chihebrayo, “bajembwe.”
^ Mu Chihebrayo, “ngazi yakukkona,” ikwiiminina silutwe.
^ Mu Chihebrayo, “nembe,” ikwiiminina muntu uugwasya; mweendelezi.
^ Naa “bakapitawu.”
